Nacyjanalny bank Biełarusi nie płanuje źmianiać strukturu svaich valutnych reziervaŭ u suviazi z vahańniami kursaŭ suśvietnych valut. Pra heta paviedamiŭ načalnik hałoŭnaha ŭpraŭleńnia mižnarodnych apieracyj Nacyjanalnaha banka Biełarusi Taras Nadolny.
«My pakul nie płanujem rabić rezkich krokaŭ pa źmianieńniu struktury valutnych reziervaŭ, bo ŭ vyniku možam dvojčy stracić», — skazaŭ Taras Nadolny.
Jon rastłumačyŭ, što ŭ hetym pytańni Nacyjanalny bank Biełarusi aryjentujecca na valutnuju strukturu źniešniehandlovaha bałansu krainy (ciapier bolš ździełak pravodzicca ŭ dalarach ZŠA). Nahadajem, hałoŭny bank zachoŭvaje valutnyja reziervy ŭ jeŭra, dalarach ZŠA, rasijskich rublach i kitajskich juaniach. Pracentnyja suadnosiny hetych valut u ahulnym abjomie reziervaŭ Nacbank nie nazyvaje.
«Nacyjanalny bank Biełarusi zastajecca kansiervatyŭnym u padychodach da źmianieńnia struktury reziervaŭ. Dziejučaja faktyčnaja valutnaja struktura całkam adpaviadaje zaćvierdžanaj u Nacyjanalnym banku narmatyŭnaj valutnaj struktury. U suviazi z hetym, a taksama ŭ suviazi ź niavyznačanaściu na suśvietnym finansavym rynku, my nie bačym nieabchodnaści rezka reahavać na vahańni pary «dalar — jeŭra», — adznačyŭ śpiecyjalist Nacbanka.
Jak paviedamlajuć infarmahienctvy, u suviazi ź ciapierašnimi vahańniami kursaŭ dalara i jeŭra centrabanki šeraha krain pryniali rašeńnie ab prodažy častki svaich reziervaŭ u jeŭra i skupcy dalaraŭ ZŠA i zołata. Naprykład, śpiecyjalisty finansavych rynkaŭ adznačajuć, što arabskija dziaržavy Piersidskaha zaliva pačali pazbaŭlacca ad jeŭra. Razam z tym analityki miarkujuć, što źnižeńnie jeŭra na hetym etapie vyčarpała siabie. U siońniašnim kursie adzinaj valuty adnosna amierykanskaha dalara ŭžo zakładzieny ŭvieś mahčymy niehatyŭ. Valuta vielmi pierapradana. U suviazi z hetym čakajecca razvarot pary «jeŭra — dalar» na ŭzychodny padjom kursu jeŭra.
Kurs biełaruskaha rubla adnosna karziny zamiežnych valut z pačatku hoda ŭmacavaŭsia na 1,04 pracenta i z 4 červienia ŭstanoŭleny na ŭzroŭni Br1025,52.
Pavodle źviestak Nacyjalnaha banka Biełarusi, z pačatku hoda dalar ZŠA ŭmacavaŭsia adnosna biełaruskaha rubla na 4,96%, jeŭra źniziŭsia na 10,14%, rasijski rubiel umacavaŭsia na 2,76%.
