U Minsku zatrymana siem udzielnikaŭ akcyi ŭ pamiać pra vykradzienaha ministra ŭnutranych spraŭ Juryja Zacharanku. Siarod zatrymanych — lider Abjadnanaj hramadzianskaj partyi Anatol Labiedźka.
Udzielniki akcyi sabralisia ŭ 15.00 kala univiersama «Mahiloŭski» i adtul u supravadžeńni supracoŭnikaŭ milicyi prajšli da doma pa vulicy Žukoŭskaha, dzie žyŭ Juryj Zacharanka. Paśla taho, jak udzielniki akcyi ŭskłali kvietki da ścien doma, ich pasadzili ŭ mikraaŭtobus i pavieźli ŭ nieviadomym napramku.
Dzie zaraz znachodziacca zatrymanyja, nieviadoma. Anatol Labiedźka na telefonnyja zvanki nie adkazvaje.
Hienierał‑major Juryj Zacharanka źnik 11 hadoŭ tamu, 7 maja 1999 hoda, pry niavyśvietlenych akaličnaściach.
Padčas vybaraŭ pieršaha prezidenta Biełarusi jon uvachodziŭ u kamandu Alaksandra Łukašenki, a ŭ 1994—1996 hadach zajmaŭ pasadu ministra ŭnutranych spraŭ.
Syšoŭšy ŭ apazicyju, u 1998 hodzie Zacharanka staŭ členam «cieniavoha ŭrada», dzie ŭznačaliŭ kamitet pa biaśpiecy. Viasnoj 1999 hoda hienierał braŭ aktyŭny ŭdzieł u arhanizavanaj apazicyjaj kampanii pa vybarach prezidenta. Jon uvajšoŭ u kamandu eks‑premjera Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.
Karystajučysia aŭtarytetam siarod supracoŭnikaŭ MUS, Zacharanka stvaryŭ alternatyŭny sajuz aficeraŭ. Pavodle adnoj ź viersij, mienavita heta i stała asnoŭnaj pryčynaj raptoŭnaha źniknieńnia byłoha ministra. Jaho vykrali viečaram 7 maja ŭ rajonie vulicy Mahiloŭskaj u Minsku pa darozie dadomu. U chutkim časie siamja Zacharanki atrymała palityčny prytułak u Hiermanii.
