Bačańnie farmatu hetaha tradycyjnaha mierapryjemstva sioleta padzialiła apazicyju.
Na pres-kanfierencyi, što prajšła ŭ Minsku 19 krasavika i była pryśviečanaja praviadzieńniu «Čarnobylskaha šlachu 2010», prysutničali sustrašynia BCHD Vital Rymašeŭski, lider «Maładoha frontu» Źmicier Daškievič, mastak Alaksiej Maračkin, jaki pradstaŭlaŭ Partyju BNF, Mikoła Statkievič (BSDP «NH») i inš.
Vital Rymašeŭski zajaviŭ, što padčas Čarnobylskaha šlachu 2010 maje być prezientavanaja novaja hramadskaja kampanija «U abaronu žyćcia». Pavodle palityka, jana pavinna spynić praces vymirańnia biełaruskaj nacyi.
Pieršym krokam novaha hramadskaha ruchu budzie zbor podpisaŭ u abaronu kankretnych patreb hramadstva. A mienavita, za stvareńnie sistemy kantrolu ŭzroŭniu radyjoaktyŭnaj zabrudžanaści i spynieńnie vytvorčaści praduktaŭ charčavańnia na zabrudžanych terytoryjach.
Inšy pradstaŭnik arhkamitetu, Źmicier Daškievič, adznačyŭ, što pierad arhanizatarami staić meta viarnuć akcyi žałobny charaktar.
«Prysutnaść anarchistaŭ i pradstaŭnikoŭ seksualnych mienšaściaŭ my budziem rasceńvać jak pravakacyju», – adznačyŭ Z.Daškievič. I dadaŭ, što pradstaŭniki Maładoha frontu «buduć źviazvać i zdavać milicyi» pravakataraŭ.
Nahadajem, što na pres-kanfierencyi, jakuju pravioŭ staršynia BNF Alaksiej Janukievič 15 krasavika, było adznačana, što BNF vyrašaje admovicca ad tradycyjnaha farmatu akcyi.
«Na žal, u apošnija hady «Čarnobylski šlach» pieratvaryŭsia ŭ rytualnaje mierapryjemstva, na jakoje prychodziać usie, ad ultrapravych da anarchistaŭ. Adnak jany zajmajucca nie prablemami nastupstvaŭ avaryi na Čarnobylskaj AES, a prosta samarekłamaj. I my nie chočam źbirać ludziej dla ich rekłamy», — zaznačyŭ Janukievič.
Lider BNF taksama adznačyŭ, što siabry BNF płanujuć naviedać rajony, jakija najbolš paciarpieli ad avaryi na ČAES. «Płanujecca, što my prajedziem pa poŭdni Mahiloŭskaj vobłaści, a adtul – u Homielskuju vobłaść. My naviedajem hetyja rajony, pryviaziem ludziam humanitarnuju dapamohu, nakolki heta mahčyma, pahutarym ź imi, a taksama praviadziem pracy na pomnikach adsielenym vioskam», — skazaŭ A.Janukievič.
Palitołah Vital Silicki tak prakamientavaŭ «NN» vartaść praviadzieńnia tradycyjnych masavych akcyj apazicyjaj u tym samym farmacie, što i ŭ 90-ja:
«Pakolki ŭ hramadstvie zusim zahasła vola da supracivu — pra što varta havaryć asobna — to pravodzić takija akcyi u «zmaharskim» styli biessensoŭna. Jany ŭžo nikoli nie źbiaruć bolš za tysiaču čałaviek.
Sprava ŭ tym, što pamiać pra Čarnobyl užo zbolšaha ściortaja ŭładaj, a značyć, što takija padziei musiać być zbolšaha nie palityčnymi, a infarmacyjna-adukacyjnymi. Naturalna, kali apazicyja žadaje źviarnuć uvahu na hetyja prablemy. Heta, naturalna, užo nie farmat šeścia. Toje ž možna skazać i pra 25 Sakavika — kolki biełarusaŭ viedajuć, što heta takoje?».
Arhanizatary ČŠ-2010 zaklikajuć prychodzić da Akademii navuk a 18-aj 26 krasavika.
Miarkujecca, što ŭdzielniki akcyi projduć šeściem da Kastryčnickaj płoščy, adnak arhanizatary adznačyli, što prymuć i toj scenar, jaki prapanuje ułada. Vierahodna, što adbudziecca šeście da Čarnobylskaj kaplicy. Arhanizatary płanujuć zaprasić na jaho pradstaŭnikoŭ dziaržaŭnych arhanizacyi i BRSM.
