Pałata pradstaŭnikoŭ na pasiadžeńni 2 krasavika ratyfikavała dahavor ab dziaržaŭnaj miažy z Ukrainaj.
Staršynia Dziaržaŭnaha pamiežnaha kamiteta Ihar Račkoŭski paviedamiŭ, što dakumient vyznačaje paniaćcie dziaržaŭnaj miažy na sušy, vodach, nietrach i pavietranaj prastory. Demarkacyja dziaržmiažy budzie ažyćciaŭlacca śpiecyjalnaj sumiesnaj kamisijaj.
Račkoŭski zaznačyŭ, što praces demarkacyi zojmie kala dziesiaci hadoŭ. Pavodle jaho słoŭ, prablem pa vyznačeńni miažy šmat, ale ŭsie jany vyrašalnyja. U pracesie demarkacyi mahčymy abmien terytoryjami pamiž krainami. Račkoŭski padkreśliŭ, što dahavor nie ŭtrymlivaje ekanamičnych, palityčnych i inšych niehatyŭnych nastupstvaŭ dla Biełarusi.
Dahavor byŭ padpisany biełaruskim i ŭkrainskim bakami jašče ŭ 1997 hodzie.
Viarchoŭnaja rada Ukrainy ratyfikavała hety dakumient u 1999 hodzie. Biełaruś pahadžałasia ratyfikavać dahavor tolki ŭ vypadku pryznańnia Ukrainaj dziaržaŭnym doŭhu ŭkrainskich subjektaŭ haspadarčaj dziejnaści, jaki, na dumku Minska, uźnik u pačatku 1990‑ch hadoŭ.
5 listapada 2009 hoda padčas vizitu Alaksandra Łukašenki ŭ Kijeŭ prezidenty dźviuch krain zajavili, što majuć namier jak maha chutčej zaviaršyć praces dahavorna‑pravavoha afarmleńnia dziaržaŭnaj miažy. «Ja chaču infarmavać ukrainskaje i biełaruskaje hramadstva, što ŭ sumiesnym kamiunikie my damovilisia ab rašeńni ŭniasieńnia na ratyfikacyju Nacyjanalnaha schodu Respubliki Biełaruś dahavora pamiž našymi krainami ab dziaržaŭnaj miažy, — zajaviŭ pa vynikach vizitu Viktar Juščanka, jaki zajmaŭ na toj čas pasadu prezidenta Ukrainy. — Heta pytańnie, jakoje my hadami nie mahli zrušyć ź miesca. Siońnia heta stała pradmietam našaj ahulnaj damoŭlenaści. Ja chacieŭ by vykazać udziačnaść za toje, što biełaruski bok pahadziŭsia na taki pryncyp rašeńnia i ŭnios u nacyjanalny parłamient pahadnieńnie ab dziaržaŭnaj miažy z Ukrainaj na ratyfikacyju».
