Były staršynia Hrodzienskaha abłvykankama Uładzimir Saŭčanka ab padrychtoŭcy ŭ dačynieńni da jaho terakta daviedaŭsia ad śledčych.
Pra heta jon zajaviŭ 1 krasavika padčas dopytu ŭ Viarchoŭnym sudzie pa spravie vaŭkavyskich pradprymalnikaŭ Mikałaja Aŭtuchoviča i Uładzimira Asipienki, paviedamiŭ lider arhkamiteta pa stvareńni ruchu salidarnaści «Razam» Viačasłaŭ Siŭčyk.
Jak paviedamiŭ Siŭčyk, pakazańni Saŭčanki nie tolki nie paćviardžajuć vinu Mikałaja Aŭtuchoviča ŭ padrychtoŭcy zabojstva Saŭčanki, ale i abviarhajuć pakazańni jašče adnaho fihuranta hetaj spravy Alaksandra Łaryna, jakomu nibyta Aŭtuchovič zamoviŭ zabojstva Saŭčanki. «Saŭčanka skazaŭ, što pakazańni Łaryna niedakładnyja.
Što jon naohuł žyvie nie na tym pavierchu, na jaki ŭkazvaŭ Łaryn, što jon nijakaj sočki za saboj nie zaŭvažaŭ, ničoha ab hetym skazać nie moža, i naohuł zamach, jaki nibyta rychtavaŭsia na jaho, daviedaŭsia ad śledčych, a da Aŭtuchoviča jon nijakich pretenzij nie maje»,
— skazaŭ Siŭčyk.
«U asnoŭnym ničoha novaha i važnaha Saŭčanka nie skazaŭ. Ja dumaju, jaho na hety praces chtości vyhnaŭ, kab pakazać jaho narodu, pakolki ŭ apošni čas chadzili roznyja čutki pra jaho fizičnaje zdaroŭje i psichičny stan», — adznačyŭ Siŭčyk.
Akramia Saŭčanki na pracesie byŭ dapytany śviedka Ivan Zajac. «Zajac zajaviŭ, što nie budzie davać pakazańni adkryta, pakolki baicca za žyćcio svajho znajomaha. Nibyta hety znajomy raskazaŭ Zajcu ab tym, što Aŭtuchovič zamaŭlaŭ padpały doma byłoha načalnika Vaŭkavyskaha RAUS Vitala Kacuby i padatkovaha inśpiektara Mandzika. Nibyta Aŭtuchovič zamoviŭ padpały Juryju Arciukieviču, jaki raniej u hetym ža sudzie pryznaŭsia, što nijakich padpałaŭ Aŭtuchovič jamu nie zamaŭlaŭ», — paviedamiŭ Siŭčyk.
Jak skazaŭ Siŭčyk, Zajac na pytańnie advakata Uładzimira Asipienki Tamary Sidarenki, adkul takuju infarmacyju maje jaho znajomy, adkazaŭ: «Ad svajho znajomaha». «
Tut užo nie vytrymaŭ Aŭtuchovič i zajaviŭ, što ŭ pracesie, abvinavačvańnie ŭ jakim budujecca na słovach «znajomaha majho znajomaha», jon udzielničać nie źbirajecca.
Akramia hetaha, takija pakazańni vyklikali burnuju reakcyju ŭ zale suda. Sudździa vymušany byŭ vydalić niekalki čałaviek z zały, pakolki nie śmiajacca było niemahčyma», — adznačyŭ Siŭčyk.
Nahadajem, u Viarchoŭnym sudzie razhladajecca kryminalnaja sprava, pa jakoj prachodziać Mikałaj Aŭtuchovič, Uładzimir Asipienka, Alaksandr Łaryn i Michaił Kazłoŭ. Pieršych troch abvinavačvajuć u padrychtoŭcy terarystyčnaha akta ŭ dačynieńni da namieśnika ministra pa padatkach i zborach Vasila Kamianko i byłoha staršyni Hrodzienskaha abłvykankama Uładzimira Saŭčanki. Aŭtuchovič i Asipienka taksama abvinavačvajucca ŭ arhanizacyi padpału doma byłoha načalnika Vaŭkavyskaha RAUS Vitala Kacuby ŭ 2004 hodzie.
Padpałkoŭnik milicyi Michaił Kazłoŭ, były kiraŭnik UBAZ pa Hrodzienskaj vobłaści, abvinavačvajecca ŭ tym, što viedaŭ pra płany padrychtoŭki terarystyčnaha akta, ale nie rabiŭ zachadaŭ pa jaho praduchileńni.
