Zališniaje spažyvańnie vysokakałaryjnaj ježy vyklikaje ŭ mazhavoj sistemie źmieny, charakternyja dla narkatyčnaj zaležnaści. Da takich vysnovaŭ pryjšli supracoŭniki Daśledčaha instytuta Skrypsa (ZŠA) u vyniku praciahłaha vyvučeńnia pavodzinaŭ pacukoŭ, što pakutavali na abžorstva.
U chodzie ekśpierymientu, jaki doŭžyŭsia bolš za try hady, navukoŭcy zabiaśpiečyli paddoślednym žyviołam nieabmiežavany dostup da vysokakałaryjnaj ježy, pryvabnaj jak dla ludziej, tak i dla hryzunoŭ, — biekona, kaŭbasy, kandytarskich vyrabaŭ i h.d. Jak i čakałasia, pacuki, jakija atrymlivali takuju ježu, jeli bolš i nabirali vahu značna chutčej, čym ich braty z kantrolnaj hrupy, jakaja siłkavałasia zvyčajnym kormam.
Pry hetym źmieny, što naziralisia ŭ pavodzinach hryzunoŭ, byli padobnyja da reakcyj, charakternych dla narkatyčnaj zaležnaści. Straciŭšy dostup da ŭlubionych praduktaŭ, pacuki admaŭlalisia ad zvyčajnaha kormu, pryčym takaja «haładoŭka» mahła praciahvacca da dvuch tydniaŭ. U chodzie inšaha ekśpierymientu imknieńnie pacukoŭ da vysokakałaryjnaj ježy zastavałasia navat tady, kali jaje atrymańnie supravadžałasia balučymi ŭdarami tokam.
Daśledujučy mozh paddoślednych žyvioł, navukoŭcy vyjavili ŭ pacukoŭ, što pryachvocilisia da kałaryjnaj ježy, prykmietnaje skaračeńnie kolkaści dapaminavych receptaraŭ D2 u strukturach sistemy ŭznaharody mozhu. Źnižeńnie kolkaści hetych receptaraŭ nazirajecca pry praciahłym užyvańni narkotykaŭ, u pryvatnaści kakainu. Navukoŭcy atrymali dadatkovaje paćvierdžańnie suviazi hetaha pracesu z raźvićciom zaležnaści i kampulsiŭnych pavodzinaŭ, štučna skaraciŭšy kolkaść receptaraŭ D2 u mozhu pacukoŭ. Niepieraadolnaja ciaha da vysokakałaryjnaj ježy u hetych žyvioł raźvivałasia značna chutčej, čym u zvyčajnych hryzunoŭ.
Pa słovach viadučaha aŭtara daśledavańnia Poła Kieni, atrymanyja dadzienyja śviedčać ab tym, što zališniaje spažyvańnie vysokakałaryjnaj ježy i niepieraadolnaje imknieńnie atrymlivać ad ježy zadavalnieńnie abumoŭlenyja tymi ž bijachimičnymi miechanizmami, što i narkatyčnaja zaležnaść. Spravazdača daśledavańnia apublikavanaja ŭ časopisie Nature Neuroscience.
