Rekłamnaje ahienctva Adell Saatchi & Saatchi pa zamovie Dziaržaŭnaha ahienctva raźvićcia turyzmu (TAVA) prydumała dla Łatvii novy słohan: Vest enjoyed slowly («Lepš atrymlivać asałodu pavolna»). Stvareńnie novaha słohana abyšłosia ahienctvu ŭ 10 tys. łataŭ (14 tys. jeŭra).
Novy słohan źjaviŭsia ŭ miežach rekłamnaj kampanii, jakaja prasoŭvaje łatvijski rehijanalny turyzm. Słohan «Lepš atrymlivać asałodu pavolna» zaklikany pavialičyć płyń turystaŭ, što addajuć pieravahu spakojnamu adpačynku ŭ sielskaj miascovaści, rybałcy i prahułkam pa zapaviednych zonach.
U adroźnieńnie ad raniejšaha słohana «Kraina, jakaja śpiavaje», jaki hałoŭnym čynam charaktaryzuje łatvijskuju stalicu, novy słohan lepš adlustroŭvaje śpiecyfiku turystyčnaha adpačynku dla ŭsioj krainy. Pa słovach ministra ekanomiki Łatvii Artysa Kamparsa, Ryha źjaŭlajecca absalutna inšym turystyčnym praduktam, i rekłamavać jaje treba asobna. Stalicy pryśviečanaja asobnaja rekłamnaja kampanija sa słohanam Live Riga, vydatki na jakuju ŭ 2010 hodzie składuć 2 młn łataŭ (2,8 młn jeŭra).
Metavaj aŭdytoryjaj novaj rekłamnaj kampanii stali ludzi va ŭzroście ad 55 hadoŭ, jakija składajuć najbolšuju častku turystaŭ ź Jeŭropy. Rekłama aryjentavanaja zbolšaha na skandynavaŭ, niemcaŭ i ruskich.
Masavaja rekłamnaja kampanija novaj turystyčnaj kancepcyi pačniecca ŭ 2011 hodzie.
