Viarchoŭny sud nie zadavoliŭ skarhu HA »Biełaruskaja asacyjacyja žurnalistaŭ» (BAŽ) na papiaredžańnie Ministerstva justycyi. Pretenzii Miniusta da arhanizacyi abhruntavanyja i papiaredžańnie admienie nie padlahaje — takoje rašeńnie 22 sakavika abviaściŭ sudździa Anatol Cierach.
Namieśnik staršyni BAŽ Andrej Bastuniec zaznačyŭ, što rašeńnie Viarchoŭnaha suda ŭvachodzić u siłu z momantu jaho abviaščeńnia. «Chacia hety paradak parušaje kanstytucyjnyja pałažeńni, my padumajem, jak možna jaho abskardzić. My budziem vykarystoŭvać usie najaŭnyja ŭ nas mahčymaści, u tym liku i skarhi ŭ nadnacyjanalnyja orhany», — padkreśliŭ Bastuniec.
Nahadajem, BAŽ abskardziŭ papiaredžańnie, vyniesienaje arhanizacyi Miniustam 13 studzienia hetaha hoda. U papiaredžańni havorycca, što na vokładcy paśviedčańnia člena BAŽ niepravamierna raźmieščany nadpis »Presa» (na biełaruskaj i anhlijskaj movach), bo heta parušaje normy zakona «Ab srodkach masavaj infarmacyi». Takim čynam, miarkujuć u Miniuście, maje miesca «nieabhruntavanaje prysvajeńnie» paŭnamoctvaŭ žurnalista srodku masavaj infarmacyi.
Aprača taho, Centr pravavoj abarony ŚMI, jaki dziejničaje pry BAŽ, nie praduhledžany statutam hramadskaha abjadnańnia, ličać u Miniustie. «Bolš za toje, zadačy hetaha farmiravańnia, vykładzienyja ŭ pałažeńni ab im, vychodziać za miežy statutnych zadač HA «BAŽ», — havorycca ŭ papiaredžańni ministerstva.
