5 sakavika skončyŭsia etap zboru podpisaŭ kandydatami ŭ deputaty miascovych savietaŭ. Ciapier ich na sapraŭdnaść praviarajuć vybarčyja kamisii. Salihorski «maładafrontaviec» Alaksiej Vałabujeŭ raskazvaje pra pieršy etap vybarčaj kampanii.
«Naša Niva»: Jak aceniš etap zboru podpisaŭ na svajoj akruzie?
Alaksiej Vałabujeŭ: U pryncypie, pazityŭna. Ahułam maja kamanda naźbirała 507 podpisaŭ z 2800 žycharoŭ akruhi. Za mianie padpisaŭsia kožny piaty. Padčas zboru my zajšli absalutna ŭ kožny dom, padjezd, pazvanili ŭ kožnuju kvateru. Ale dzieści nie było haspadaroŭ. U ideale my pavinny byli viarnucca tudy znoŭ, ale na heta ŭžo nie chapiła času. Kali zarehistrujuć kandydatam, znoŭ daviadziecca abyści kožnuju kvateru.
«NN»: A admovaŭ šmat było?
AV: Zusim niašmat. My pačali źbirać podpisy ŭ pieršy ž dzień. Tamu dla ludziej my byli takimi śviežańkimi, novymi, cikavymi. Jany vielmi pazityŭna da nas stavilisia. Asnoŭnaja častka majoj kamandy — biełaruskamoŭnyja ludzi. Ludzi ŭsprymali toje, jak naležnaje. Moža, spačatku i dumali, što pryjšoŭ niejki biespracoŭny partyjec, ale potym, kali hladzieli, što małady inžynier, dyk z radaściu padtrymlivali. Babulki ŭžo zahadzia rychtavali pašparty.
«NN»: A niehatyŭ niejki byŭ?
AV: Dy nie skazaŭ by. Užo ŭ samym kancy zboru podpisaŭ pa niekatorych damach raniej za nas prajšli našy kankurenty. Tamu ludzi z hetych damoŭ krychu napružvalisia. Kazali, što da ich užo prychodzili źbirać podpisy. Ale heta nie tamu, što mienavita my im nie padabajemsia.«NN»: A viedaješ svaich kankurentaŭ pa akruzie?
AV: U vykankamie nam takuju infarmacyju nie dali, ale nie vielmi i chaciełasia. U minuły raz pa hetaj akruzie išła ciapierašniaja staršynia rajsavieta spn.Kliševič. Mahli b vybrać i bolš lohkuju akruhu, ale nam niama asablivaj roźnicy, kaho pieramahać.
«NN»: To bok vieryš u pieramohu?
AV: Nu što takoje vieryš? Ja viedaju, što ŭžo pieramoh padčas zboru podpisaŭ. Baču, što bolšaść addaść za mianie svaje hałasy. Pytańnie tolki, nakolki spraviadliva ich buduć ličyć i ci zarehistrujuć mianie.
«NN»: A čamu ŭ Salihorsku i rajonie hetym razam na vybary idzie tak mała apazicyi?
AV: U nas apazicyja dosyć stałaha vieku. Jana prajšła praz šmat padobnych kampanij. Napeŭna, niekatoryja prosta stamilisia. U nas maładaja kamanda. My raźličvajem na pierśpiektyvu. Kab u vypadku čaho ŭvajści va ŭładu.
