Dzień Voli ŭ 2009 h.
Minharvykankam dazvoliŭ demakratyčnym arhanizacyjam pravieści 25 sakavika ŭ Minsku akcyju z nahody Dnia Voli, ale pry hetym unios karektyvy ŭ jaje scenar,
paviedamiŭ BiełaPAN staršynia staličnaj arhanizacyi Partyi BNF Viktar Ivaškievič.
«My płanavali prajści ad Akademii navuk pa tratuarach da skviera Janki Kupały, kab pravieści tam mitynh.
Adnak haradskija ŭłady tradycyjna prapanavali nam pravieści mitynh na płoščy Banhałor», — skazaŭ jon.
Pavodle słoŭ Ivaškieviča, čas i miesca zboru ŭdzielnikaŭ mierapryjemstva zastalisia raniejšymi — u 18.00 na placoŭcy kala budynka prezidyuma Nacyjanalnaj akademii navuk. «Tak što ludzi mohuć bieśpieraškodna prychodzić, kab adśviatkavać Dzień Voli, prynosić nacyjanalnuju simvoliku.
Jak dać praciah śviatkavańniu, vyrašym na miescy», — dadaŭ jon.
18 sakavika na pres‑kanfierencyi ŭ Minsku lider Partyi BNF Alaksiej Janukievič adznačyŭ, što dziejańni arhanizataraŭ akcyi «buduć zaležać ad kolkaści ludziej, jakija sabralisia ŭziać udzieł u šeści, i ich nastroju». «U nas jość roznyja varyjanty raźvićcia padziej, ale adno mahu skazać dakładna,
što na płošču Banhałor my ludziej nie paviadziem», — padkreśliŭ lider Partyi BNF.
Na pres‑kanfierencyi taksama było abjaŭlena pra pačatak zboru podpisaŭ pad adozvaj da ŭład abjavić 25 sakavika i 8 vieraśnia dziaržaŭnymi śviatami. «25 sakavika my ličym dniom niezaležnaści Biełarusi, 8 vieraśnia — dniom biełaruskaj voinskaj słavy i abaroncaŭ Ajčyny. Tamu my siońnia abjaŭlajem pra pačatak kampanii pa zbory podpisaŭ hramadzian, kab zrabić hetyja dni dziaržaŭnymi śviatami i abvieścić ich vychadnymi», — skazaŭ sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski.
Da adozvy, pavodle jaho słoŭ, mohuć dałučycca ŭsie, chto pažadaje. Paśla hety dakumient z podpisami budzie pieradadzieny va ŭrad.
Pad adozvaj užo padpisalisia lidery apazicyjnych partyj i ruchaŭ Alaksiej Janukievič, Alaksandr Milinkievič, Vital Rymašeŭski, Pavieł Sieviaryniec, Viktar Ivaškievič.
25 sakavika pad dakumientam zmohuć pastavić svaje podpisy ŭdzielniki śviatočnaj akcyi.
