Žurnalistcy Marynie Koktyš 18 sakavika viarnuli aŭtamabil, zatrymany mytnikami na biełaruska-litoŭskaj miažy.
Nahadajem, namieśnik hałoŭnaha redaktara haziety «Narodnaja vola» była zatrymanaja 12 sakavika pry pierasiačeńni biełaruska-litoŭskaj miažy na nabytym joju ŭ Litvie aŭtamabili «Tajota». Rabotniki biełaruskaj mytni zajavili, što mašyna moža być abvieščanaja ŭ mižnarodny vyšuk. Žurnalistku pratrymali na mytni amal sutki. U vyniku aŭtamabil zatrymali i adpravili na ekśpiertyzu ŭ Ašmianskuju mytniu, a Koktyš vydzielili transpart dla taho, kab jana zmahła viarnucca damoŭ.
Pradstaŭniki kampanii «Tajota» ŭ Minsku zajavili Koktyš, što numar nabytaha joju aŭtamabila zarehistravany ŭ aficyjnaj bazie danych aŭtamabilaŭ hetaj marki i nie ličycca va ŭhonie.
Jak paviedamiła Koktyš, paśla afarmleńnia adpaviednych dakumientaŭ aryštavany aŭtamabil joj viarnuli,
pry hetym joj daviałosia zapłacić za niekalki sutak jaho zachoŭvańnia na mytnaj stajancy.
Zaraz žurnalistka jedzie na aŭtamabili ŭ Minsk.
Nahadajem, 17 lutaha supracoŭniki milicyi kanfiskavali ŭ Maryny Koktyš sistemny błok rabočaha kampjutera. Žurnalistku vyklikali va UUS Leninskaha rajona Minska na dopyt u suviazi z publikacyjaj u «Narodnaj voli» materyjałaŭ pa tak zvanaj palaŭničaj spravie, a zatym supracoŭniki milicyi pryjšli ŭ redakcyju z vobyskam.
