Ałkaholnaja reakcyja pačyrvanieńnia, ułaścivaja amal pałovie žycharoŭ Kitaja, moža być vynikam charčavańnia rysam, jaki 7–10 tysiač hadoŭ tamu vyklikaŭ adpaviednuju mutacyju hiena.
Kala 50% nasielnictva azijackich krainaŭ majuć cikavuju asablivaść arhanizmu: varta čałavieku vypić krychu ałkaholu, jak jaho skura adrazu pačynaje čyrvanieć, pavialičvajecca puls, rezka skača cisk, źjaŭlajucca prystupy ŭdušša, balić hałava. Takija pavodziny arhanizmu naŭrad ci buduć spryjać žadańniu mnoha pić. Mienavita tamu mnohija žychary Azii viaduć zdarovy ład žyćcia i nie adčuvajuć z hetaj pryčyny dyskamfortu.
Hetaja reakcyja arhanizmu nosić aficyjnuju miedycynskuju nazvu «ałkaholnaja reakcyja pačyrvanieńnia».
Jana prajaŭlajecca ŭ tych ludziej, u jakich adbyłasia asablivaja mutacyja aldehiddehidrahienazy (ADH1B*47His) – adnaho ź fiermientaŭ, jakija mietabalizujuć (razburajuć) ałkahol u piečani.
Hrupa navukoŭcaŭ z Kitajskaj akademii navuk praviała hienietyčnyja daśledavańni 38 etničnych hrup nasielnictva Kitaja pa ŭsioj krainie, u tym liku tytulnaj kitajskaj nacyi chań i tybieckich hrupaŭ. U ahulnym byŭ vyvučany hienietyčny materyjał 2245 čałaviek.
Daśledčyki vyjavili, što nazvanaja mutacyja źjaviłasia 7–10 tysiač hadoŭ tamu.
Vyvučyŭšy hieahrafičnaje raźmierkavańnie ŭtrymańnia «antyałkaholnaj» aleli aldehiddehidrahienazy ADH1B*47His, navukoŭcy vyjavili, što jano supadaje z dadzienymi historykaŭ i archieołahaŭ pra toje, kali i ŭ jakich miascovaściach pačała ŭźnikać kultura vyroščvańnia i ŭžyvańnia rysu. Takoje supadzieńnie moža značyć, što mienavita ŭžyvańnie rysu pryviało da źjaŭleńnia ałkaholnaj reakcyi pačyrvanieńnia ŭ žycharoŭ Azii.
«Heta jaskravy prykład taho, jak adbyvajecca hienietyčnaja adaptacyja čałavieka da źmienaŭ u sielskaj haspadarcy i charčavańni ŭ pieryjad niealitu», – śćviardžajuć daśledčyki.
