Ivan Michajłaŭ, jaki asudžany za admovu słužyć u armii z‑za relihijnych pierakanańniaŭ, 10 sakavika vyzvaleny z žodzinskaj turmy №8 (Minskaja vobłaść).
Pra heta paviedamiła pres‑sakratar mižnarodnaj maładziožnaj arhanizacyi «Małady front» Taćciana Šapućka.
9 sakavika kalehija Minskaha abłasnoha suda razhledzieła kasacyjnuju skarhu Michajłava na prysud, vyniesieny jamu Minskim rajonnym sudom, i vyrašyła nakiravać spravu na paŭtorny razhlad. Akramia taho, kalehija pastanaviła vyzvalić Michajłava, źmianiŭšy jamu mieru strymańnia z utrymańnia pad vartaj na padpisku ab niavyjeździe.
Jak paviedamiła Šapućka, rodnyja Ivana źbiralisia sustreć jaho 9 sakavika kala turmy. «Adnak supracoŭniki papraŭčaj ustanovy admovilisia jaho vypuskać, spasyłajučysia na toje,
što vypiska z rašeńnia kasacyjnaha orhana nie źjaŭlajecca padstavaj dla faktyčnaha vyzvaleńnia Michajłava.
Jany zapatrabavali pradjaŭleńnia poŭnaha tekstu rašeńnia ab źmianieńni miery strymańnia. Siońnia hetyja dakumienty byli pradstaŭlenyja, i Ivana vypuścili z turmy», — raskazała Šapućka.
21‑hadovy viernik abščyny «Novy zapaviet» Ivan Michajłaŭ admoviŭsia prachodzić terminovuju vajennuju słužbu, na jakuju byŭ pryzvany ŭ śniežni 2008 hoda. Jon zajaviŭ pryzyŭnoj kamisii Minskaha rajona, što słužba ŭ armii supiarečyć jaho relihijnym pierakanańniam, i zaprasiŭ alternatyŭnuju słužbu ŭ adpaviednaści z art. 57 Kanstytucyi. U hetym jamu było admoŭlena z‑za adsutnaści alternatyŭnaj hramadzianskaj słužby. Michajłavu taksama było admoŭlena ŭ słužbie ŭ reziervie.
15 śniežnia 2009 hoda małady čałaviek byŭ aryštavany ŭ Salihorsku i źmieščany ŭ śledčy izalatar, a 1 lutaha Minski rajonny sud pryznaŭ jaho vinavatym
va ŭčynieńni kryminalnaha złačynstva za ŭchileńnie ad mierapryjemstvaŭ pryzyvu na vajennuju słužbu i pryhavaryŭ da troch miesiacaŭ aryštu. Dla adbyvańnia pakarańnia Michajłaŭ byŭ adpraŭleny ŭ turmu № 8 u Žodzina.
Pravaabarončaja arhanizacyja «Mižnarodnaja amnistyja» pryznała Ivana Michajłava viaźniem sumleńnia.
18 lutaha 2010 hoda Alaksandr Łukašenka daručyŭ raspracavać zakon ab prachodžańni ŭ Biełarusi alternatyŭnaj słužby ŭ adpaviednaści z 57‑m artykułam Kanstytucyi krainy. Takoje daručeńnie prezident daŭ dziaržsakrataru Savieta biaśpieki Leanidu Malcavu, byłomu ministru abarony krainy.
