Ukazam prezidenta № 129 ad 3 sakavika zaćvierdžana pałažeńnie ab paradku ŭzajemadziejańnia apierataraŭ elektrasuviazi (za vyklučeńniem tych, što akazvajuć pasłuhi pa raspaŭsiudžvańni prahram televizijnaha i radyjoviaščańnia) z orhanami, jakija ažyćciaŭlajuć apieratyŭna‑vyšukovuju dziejnaść (AVD).
Dakumient rehłamientuje paradak ich uzajemadziejańnia pry: akazańni sadziejničańnia ŭ praviadzieńni apieratyŭna‑vyšukovych mierapryjemstvaŭ i stvareńni ŭmoŭ dla ich praviadzieńnia na sietkach elektrasuviazi; zabieśpiačeńni dostupu da baz danych, aŭtamatyzavanych sistem apierataraŭ, infarmacyi pra abanientaŭ i pra akazanyja im pasłuhi elektrasuviazi, a taksama da inšaj infarmacyi, nieabchodnaj dla vykanańnia zadač, uskładzienych na ŭpaŭnavažanyja orhany — tyja, jakija zajmajucca AVD.
U pałažeńni vykarystoŭvajecca paniaćcie «addalenyja punkty kiravańnia sistemami techničnych srodkaŭ dla zabieśpiačeńnia apieratyŭna‑vyšukovych mierapryjemstvaŭ» (SZVM). Takimi punktami źjaŭlajucca abjekty z aparatnymi i prahramnymi srodkami dla kiravańnia SZVM, što vykarystoŭvajucca orhanami dziaržbiaśpieki i Apieratyŭna‑analityčnym centram pry prezidencie.
Pałažeńnie, u pryvatnaści, praduhledžvaje: pry pabudovie sietki elektrasuviazi apieratar abaviazany vykarystoŭvać srodki elektrasuviazi, jakija dazvalajuć zabiaśpiečyć ukaranieńnie i ekspłuatacyju SZVM, što praduhledžvajuć niezaležnaje padklučeńnie addalenych punktaŭ kiravańnia SZVM orhanaŭ dziaržbiaśpieki i Apieratyŭna‑analityčnaha centra.
Dakumient rehłamientuje pytańni nabyćcia i ekspłuatacyi bakami nieabchodnaha abstalavańnia. Tak, naprykład, jon abaviazvaje apieratara za košt ułasnych srodkaŭ i inšych krynic, nie zabaronienych zakanadaŭstvam: nabyvać, ustanaŭlivać, absłuhoŭvać i ramantavać SZVM, za vyklučeńniem addalenych punktaŭ kiravańnia SZVM; abaraniać źviestki pra taktyku praviadzieńnia AVD, abmiažoŭvać koła asob, jakija pryciahvajucca da ŭstanoŭki, absłuhoŭvańnia i ramontu SZVM; nabyvać i ekspłuatavać kanałaŭtvaralnaje abstalavańnie, raźmieščanaje na abjektach elektrasuviazi, dla arhanizacyi kanałaŭ suviazi z addalenymi punktami kiravańnia SZVM.
Pavodle patrabavańnia orhanaŭ, upaŭnavažanych na praviadzieńnie AVD, apieratar abaviazany davać biaspłatny kruhłasutačny addaleny dostup da baz danych abanientaŭ z vykarystańniem techničnych srodkaŭ hetych orhanaŭ.
U adpaviednaści z pałažeńniem bazy źviestak abanientaŭ — fizičnych asobaŭ pavinny ŭtrymlivać: abaniencki numar, proźvišča, imia, imia pa baćku, adras abanienta ci adras ustanoŭki kancavoha abanienckaha abstalavańnia (terminała), danyja, jakija dazvalajuć vyznačyć (identyfikavać) abanienta ci jaho terminał, a dla abanientaŭ sietki sotavaj ruchomaj elektrasuviazi — taksama rekvizity dakumienta, što śviedčać asobu (jaho nazva, sieryja, numar, data vydačy i najmieńnie dziaržaŭnaha orhana, jaki vydaŭ dakumient); ahulnyja źviestki ab pasłuhach elektrasuviazi, aktyvavanych abanientam.
