Z 10 pa 14 lutaha projdzie ChVII Minskaja mižnarodnaja knižnaja vystava-kirmaš. Niahledziačy na kryzis, na joj čakajecca kala 600 udzielnikaŭ z 25 krain.
Hanarovym hościem sioleta budzie Francyja. Heta pieršaja kraina z Zachodniaj Jeŭropy, jakaja atrymała taki status. Da hetaha im hanaravalisia Kazachstan, Izrail i Rasija.
Padčas vystavy zapłanavana praviadzieńnie niekalkich bujnych prezientacyj z udziełam zamiežnych piśmieńnikaŭ. Ale arhanizatary nie śpiašajucca raskryvać ich proźviščy.
Viadoma pakul, što pryjedzie rasijski litaratar Michaił Vieler.
11 lutaha adbudziecca mižnarodny kruhły stoł, pryśviečany stasunkam pamiž biełaruskimi i zamiežnymi piśmieńnikami. Udzieł u im voźmuć pradstaŭniki z Łatvii, Litvy, Rasii, Tadžykistana, Francyi. U miežach kruhłaha stała buduć prezientavany pierakłady na tadžykskuju movu knih biełaruskich aŭtaraŭ Mikoły Miatlickaha, Juryja Sapažkova i Siarhieja Trachimionka.
Padobnaja vystava-kirmaš admietnaja tym, što ŭ biełaruskaj stalicy źbirajucca nie tolki ajčynnyja vydaŭcy, ale i zamiežnyja. I kali, da prykładu, u Biełarusi litaratura pa-ŭkrainsku nie vychodzić, a patreba takaja jość, to možna nabyć jaje niepasredna va ŭkrainskich vydaŭcoŭ. Akramia hetaha, tut knihi pradajucca biez handlovaj nakrutki.
A dyrektar «Biełknihi» Juryj Chmyroŭ paabiacaŭ, što na vydańnie, jakoha nie budzie ŭ prodažy na kirmašy, možna budzie pakinuć zamovu.
I jaje zadavolać.
Hanarovym hościem na nastupnaj vystavie ŭ Minsku budzie Hiermanija. Pakul hetaja kraina vyrašaje, jakim čynam siabie pradstavić, arhanizataraŭ turbuje inšaja prablema. Jany zadajucca pytańniem: «Dzie projdzie ChVIII Minskaja mižnarodnaja vystava-kirmaš?». Bo ŭ vystavačnym kompleksie «BiełEKSPA» (vuł. Janki Kupały, 27) vydaŭcy źbiarucca apošni raz. Užo sioleta budynak płanujuć źnieści, a na jaho miescy ŭźviaduć hatel.
