Jak paviedamiŭ žurnalistam ministr adukacyi Biełarusi Alaksandr Radźkoŭ, maładziožnaja kartka — heta aficyjna padtrymany Radaj Jeŭropy prajekt.
Takaja kartka dazvalaje jaje ŭładalnikam atrymlivać źnižki na prajezd, pry naviedvańni muziejaŭ, teatraŭ, raźmiaščeńni ŭ hatelach padčas padarožžaŭ.
Dziaržava, jakaja padpisała Častkovaje pahadnieńnie pa maładziožnaj kartcy, biare na siabie abaviazacielstva ŭ davańni skidak uładalnikam kartak. Radźkoŭ nazvaŭ vielmi pierśpiektyŭnym prajekt pa maładziožnych kartkach, pakolki jon dapamahaje moładzi vyvučać kulturu inšych krain.
Razam z tym jon zajaviŭ, što biełaruski bok pavinien pravieści «ekanamičny analiz dadzienaha pahadnieńnia». Padčas sustrečy Ralf‑Renie Vajnhiertnier paviedamiŭ ab pierśpiektyvach supracoŭnictva ź Biełaruśsiu ŭ pytańniach, što tyčacca maładziožnaj palityki, u tym liku ŭ miežach realizacyi prahramy «Uschodniaje partniorstva».
Płanujecca raźvivać uzajemarazumieńnie pamiž maładymi ludźmi va Uschodniaj Jeŭropie; arhanizoŭvać kanfierencyi pa pytańniach maładziožnaj palityki i supracoŭnictva pamiž krainami ŭ hetaj śfiery. Zapłanavany taksama ŭdzieł ekśpiertaŭ z krain «Uschodniaha partniorstva» ŭ mierapryjemstvach, što pravodziacca pad ehidaj Jeŭrasajuza.
Vajnhiertnier paraiŭ biełaruskim maładziožnym arhanizacyjam bolš aktyŭna supracoŭničać ź Jeŭrapiejskim maładziožnym fondam, jaki štohod vydzialaje na realizacyju maładziožnych prajektaŭ kala 3 młn. jeŭra. Jon zaŭvažyŭ, što dyrektarat Savieta Jeŭropy pa pytańniach moładzi i sportu supracoŭničaje z usimi hramadskimi maładziožnymi arhanizacyjami za vyklučeńniem nieanacysckich, nieafašysckich i inšych antysacyjalnych hrup.
