Ilustracyjny zdymak. Fota: «Naša Niva»
Najaŭnyja, krypta, afšornyja firmy
Zabarona na ekspart u Rasiju mašyn z ruchavikom abjomam bolš za 1,9 litra abo daražejšych za 50 tysiač jeŭra (u niezaležnaści ad abjomu ruchavika) dziejničaje jašče z 23 červienia 2023 hoda. Pilna sačyć za vykanańniem hetych abmiežavańniaŭ pačali tolki ciapier. Praz heta paciarpieli i biełaruskija pierahonščyki.
Da 23 sakavika 2024 hoda luksavyja aŭto, častka ź jakich kaštavała navat daražej za 100 tysiač jeŭra, biez prablem pierasiakali miežy ES i Biełarusi. Častka ź ich pa dakumientach nakiroŭvałasia ŭ Biełaruś, a inšyja — u krainy Centralnaj Azii, choć kančatkovym punktam pryznačeńnia źjaŭlałasia Rasija.
Ź Jeŭropy praz Čornaje mora
Časta za takija aŭto raźličvalisia najaŭnymi, kryptavalutaj abo z dapamohaj afšornych firm, zarehistravanych u trecich krainach. Ciapier šlach u Rasiju dla ich budzie pralahać nie praź Biełaruś, a praz Turcyju.
Častka takich mašyn užo ŭ darozie. Jak stała viadoma «Našaj Nivie», za dastaŭku aŭto z Hiermanii, Polščy abo Litvy da tureckaha porta Karasu biaruć kala 2500 jeŭra. Marskaja dastaŭka da rasijskaha porta kaštuje jašče 1900 jeŭra. Jašče kala 1000 jeŭra daviadziecca zapłacić za dastaŭku da Maskvy abo Minska.
Atrymlivajecca, što dastaŭka padsankcyjnaha aŭto abydziecca ŭ sumu kala 5500 jeŭra. Dla paraŭnańnia, dastaŭka z Hiermanii da Minska abychodziłasia ŭ 1500-2000 jeŭra ŭ zaležnaści ad habarytaŭ aŭto. Jašče za 500-700 jeŭra mašynu dastaŭlali da Maskvy abo Pieciarburha.
Pry hetym važna, što pakidać ES aŭtamabil budzie pa adnych dakumientach, naprykład, aformlenych nibyta dla ekspartu ŭ Turcyju. A ŭžo na paromie budzie adbyvacca padmiena dakumientaŭ na Rasiju abo na Biełaruś.
Pieravozčyki abiacajuć, što dastaŭka aŭto ź Jeŭropy praz Turcyju zojmie 25-30 dzion.
Ilustracyjny zdymak. Fota: «Naša Niva»
Dvuchlitrovy «Pasat» bolš nie pryvieźci ŭ Biełaruś?
Tym nie mienš heta nie aznačaje, što ciapier usie aŭtamabili, zabaronienyja dla ekspartu ŭ Rasiju, zmohuć trapić u Biełaruś tolki takim składanym i darahim šlacham.
Ź ES u Biełaruś pa-raniejšamu pryjazdžajuć aŭtamabili z abjomam ruchavika bolš za 1,9 litra. Ale zrabić heta nie tak prosta, jak raniej.
Bo, naprykład, Polšča raniej była samaj łajalnaj i prapuskała praz svaju miažu aŭto, nabytyja ŭ roznyja krainach ES, biez dadatkovych pytańniaŭ. Ich nie cikaviła, chto i jak zapłaciŭ za aŭto, kudy jano nakiroŭvajecca, čamu pakupnik — adzin čałaviek, a viazie inšy.
Ciapier ža dla paśpiachovaha ekspartu aŭto treba mieć pašyrany pakiet dakumientaŭ, jakija paćviardžajuć, što pakupnik ź Biełarusi, a nie z Rasii.
Dla hetaha davodzicca mieć z saboju paćviardžeńnie pieravodu ad pakupnika, jaki raźličvaŭsia za mašynu praź biełaruski bank, a taksama paćviardžeńnie ad pradaŭca, što jon pryniaŭ hetyja hrošy ad biełaruskaha pakupnika bankaŭskim pieravodam. Aproč hetaha, mytnia moža zapatrabavać listy ad pradaŭca i pakupnika, jakija harantujuć, što aŭtamabil pryznačany dla ekspłuatacyi ŭ Biełarusi, a nie dla pieraprodažu ŭ Rasiju.
Ilustracyjny zdymak. Fota: «Naša Niva»
Pa słovach pieravozčykaŭ, z aŭtamabilami koštam da 50 tysiač jeŭra prajechać praź Litvu abo Łatviju možna biez dadatkovych składanaściaŭ — hałoŭnaje, kab dakumienty byli ŭ paradku.
Turcyja — vychad dla zamožnych rasijan
«Z aŭtamabilami, daražejšymi za 50 tysiač jeŭra składaniej, ale varyjanty jość. Tyja, chto nie moža zrabić «roŭny» pakiet dakumientaŭ, ciapier adrazu raźličvajuć vydatki na transparciroŭku ŭ abychod Biełarusi», — tłumačyć surazmoŭca.
Na dumku pierahonščyka, praz Turcyju ŭ Rasiju buduć uvozić u pieršuju čarhu premijalnyja aŭto koštam ad 100 tysiač jeŭra. «Dla hetaha siehmientu aŭto dadatkovyja 3-5 tysiač jeŭra na łahistyku nie stanuć niepieraadolnaj pieraškodaj».
Čytajcie taksama:
Polšča pierastała vypuskać u Biełaruś luksavyja aŭto pa prośbie Łatuški?
Nie tolki luksavyja aŭtamabili. Jakija jašče tavary mohuć zabaranić vyvozić z Polščy ŭ Biełaruś
Nie tolki zamianić pakryški. Pra što varta pakłapacicca aŭtamabilistam z nadychodam ciapła
