Ihar Siečyn i jaho syn Ivan
Jak paviedamlałasia, u lutym raptoŭna pamior 35-hadovy Ivan Siečyn, syn kiraŭnika «Rasnafty» Ihara Siečyna. Ciapier stali viadomy niekatoryja fakty pra jaho žonku. Telehram-kanał VČK-OHPU, jaki zajmajecca raskryćciom tajamnic rasijskich čynoŭnikaŭ, aliharchaŭ i siłavikoŭ śćviardžaje, što pierad viasiellem ź Ivanam Siečynym žančyna całkam źmianiła svajo imia, proźvišča i imia pa baćku.
Sapraŭdnaje imia 36-hadovaj niaviestki Ihara Siečyna — Taćciana Sułtanava. Da šlubu ź Ivanam jana była zamužam za viadomym u Rasii ŭdzielnikam vuličnych honak Siarhiejem Varabjovym, jaki paźniej staŭ dyrektaram etapa Formuły 1 u Sočy.
Siarhiej Varabjoŭ i Taćciana Sułtanava. Fota: vchkogpu / Telegram
Siarhiej Varabjoŭ byŭ dobra znajomy ź Iharam Siečynym. Kiraŭnik «Rasnafty» navat chryściŭ dačku Siarhieja Varabjova i Taćciany Sułtanavaj.
Siečyn-starejšy paprasiŭ Varabjova ŭziać apieku nad svaim synam, jaki zachaplaŭsia aŭtahonkami. U vyniku Ivan Siečyn staŭ naviedvacca ŭ dom dyrektara etapa «Formuły-1» u Sočy, a kali vystupaŭ na spabornictvach, dla kanśpiracyi vykarystoŭvaŭ proźvišča «Varabjoŭ».
Žurnalisty źviartajuć uvahu na toj fakt, što Siarhiej Varabjoŭ i Taćciana Sułtanava pažanilisia tolki praź niekalki hadoŭ paśla znajomstva. A praz čatyry miesiacy paśla viasiella Varabjoŭ raptoŭna pamior va ŭzroście 43 hadoŭ. Taćciana ŭ spadčynu atrymała ŭsiu majomaść muža.
Praź niekalki miesiacaŭ jana pačała sustrakacca ź Ivanam Siečynym.
Jak śćviardžajecca, Ihar Siečyn byŭ suprać takoha vybaru svajho syna. Ale kali Taćciana pražyła ź Ivanam niekalki hadoŭ i zaciažaryła, Siečyn-starejšy ŭsio ž daŭ zhodu na šlub, ale z umovaj.
Žančyna całkam źmienić svajo imia, proźvišča i imia pa baćku, kab nijak nielha było vyznačyć jaje asobu. U červieni 2018 hoda Taćciana Michajłaŭna Sułtanava atrymała dakumienty na imia Kryściny Uładzimiraŭny Ščadrynoj. A praź niekalki miesiacaŭ adbyłosia viasielle. Paśla jaho žančyna ŭziała proźvišča muža i stała Kryścinaj Siečynaj.
Pražyŭšy ŭ šlubie z Kryścinaj-Taćcianaj piać hadoŭ, u lutym 2024 hoda Ivan Siečyn raptoŭna pamior. Abstaviny byli sapraŭdy dziŭnyja — kali mužu stała drenna, žonka adpraviła achoŭnika ŭ apteku i tolki jon viarnuŭsia, vyklikała chutkuju dapamohu. Pryčym nie płatnuju ci «kramloŭskuju», jak pryniata ŭ maskoŭskaj elity, a zvyčajnuju. Kali daktary dajechali da pacyjenta, to zmahli tolki kanstatavać jaho śmierć.
Taki los mužoŭ stvaryŭ Sułtanavaj u peŭnych kołach reputacyju «siniaj barady ŭ spadnicy».
Čytajcie jašče:
Raptoŭna pamior 35-hadovy syn Ihara Siečyna — kiraŭnika «Rasnafty»
Kiraŭnik «Rasnafty» Ihar Siečyn padaŭ pozvu suprać «Novaj haziety» za artykuł pra jachtu za $100 młn
Pucin uznaharodziŭ 25-hadovaha syna Siečyna za «šmathadovuju pracu»
