Skryn videa
Na poŭdni Isłandyi abjaŭlena nadzvyčajnaje stanovišča z-za čarhovaha vyviaržeńnia vułkana na paŭvostravie Rejkjanies — čaćviortaha sa śniežnia i samaha mahutnaha na hety momant, piša BBC.
Siarod tych, kaho paprasili evakuiravacca, — žychary nievialikaha miastečka Hryndavik, jaki raniej užo mocna paciarpieŭ u vyniku siejśmičnaj aktyŭnaści.
Ludziej taksama evakuiravali z raźmieščanaj niepadalok Błakitnaj łahuny, adnoj z hałoŭnych słavutaściaŭ Isłandyi. U čas vyviaržeńnia ŭ hetym rajonie znachodziłasia ad 500 da 600 čałaviek.
Pavietranaja prastora krainy zastajecca adkrytaj, niahledziačy na kłuby dymu, što ŭźnimajucca ad raspłaŭlenaj łavy.
Hieafizik Mahnus Tumi Hudmundsan, jaki byŭ siarod tych, chto pralacieŭ nad paciarpiełymi rajonami na viertalocie, raspavioŭ miascovym ŚMI, što subotniaje vyviaržeńnie na ciapierašni momant možna ličyć samym mahutnym.
Dźvie płyni łavy ruchajucca na zachad i na poŭdzień, dzie ŭžo zakranutyja achoŭnyja zbudavańni vakoł Hryndavika. Prykładna čatyrom tysiačam žycharoŭ horada dazvolili viarnucca ŭ svaje damy tolki ŭ minułym miesiacy, paśla taho jak u studzieni ŭ vyniku vyviaržeńnia łavy ŭ horadzie byli razburany try damy. Bolšaść ź ich vyrašyli nie viartacca.
Hudmundsan papiaredziŭ, što łava taksama moža vylicca ŭ mora, kali vułkaničnaja aktyŭnaść nie asłabnie. Kali łava ŭstupić u kantakt z marskoj vadoj, heta moža pryvieści da vyłučeńnia niebiaśpiečnych hazaŭ i nievialikim vybucham.
U Isłandyi znachodziacca 33 dziejučyja vułkaničnyja sistemy. Kraina raźmieščana nad tak zvanym Siaredzinna-Atłantyčnym chrybtom, miažoj pamiž dvuma najbujniejšymi tektaničnymi plitami na płaniecie.
Papiaredni pieryjad vułkaničnaj aktyŭnaści na paŭvostravie Rejkjanies datujecca XIII stahodździem — tady vyviaržeńni praciahvalisia dziesiacihodździami.
Ciapierašniaje vyviaržeńnie — siomaje z 2021 hoda, i navukoŭcy miarkujuć, što rehijon ustupaje ŭ novuju vułkaničnuju eru, jakaja moža doŭžycca dziesiacihodździami ci navat stahodździami.
Čytajcie taksama:
U Isłandyi adbyłosia vyviaržeńnie vułkana. Žycharoŭ najbližejšaha horad evakuiravali
