Meryjem Hierasimienka. Skryn videa «Noč z Čałym»
Śpiavačka raskazvaje, što pryciahnuła ŭvahu da siabie jašče ŭ 2020-m, kali napisała pieśniu «Nie zabudziem, nie darujem».
U śniežni 2020-ha na jaje napisała ananimku adna z žančyn, jakoj Meryjem admoviła ŭ supracy, kab śpiavačku pravieryli, bo jaje tvorčaść nibyta prapahanduje nianaviść da biełaruskaha narodu. Meryjem vyklikali na dopyt, na dva tydni zabaranili vyjazdžać ź Biełarusi. Ale paśla spravu nie stali zavodzić.
Zatrymali Meryjem u žniŭni 2022 hoda paśla kancerta ŭ minskim bary «Banki-butyłki», dzie śpiavačka vykonvała pieśniu «Obijmi» hurta «Okiean Elzi» ŭ padtrymku Ukrainy. Fakt vykanańnia pieśni na ŭkrainskaj movie aburyŭ prapahandystaŭ.
Dziaŭčynu zatrymali nie adrazu paśla kancerta.
«Pieršy zvanok ad supracoŭnika mnie pastupiŭ paśla abiedu na nastupny dzień. Mnie nichto nie skazaŭ pra toje, što jość pytańni da majho kancertu. Była vydumana historyja, što ja prachodžu śviedkaj pa niejkim vypadku.
Ale ja, na ščaście, skančvała jurfak, i vielmi mnohija maje adnahrupniki pracujuć u orhanach. I tolki adzin zvanok, dzie ja skazała čałavieku: prabi mianie, kali łaska, pa bazie i skažy, jakija pytańni da mianie. I jon mnie prosta kaža: «A ty naohuł u kryminalnym vyšuku».
Na kvateru da śpiavački pryjechali siłaviki, vyłamali dźviery.
«Pretenzija — zmaharka, jakaja padtrymlivaje fašyzm», — tak apisvaje Meryjem toje, u čym jaje vinavacili.
Siłaviki dakazvali dziaŭčynie, što na fota z Bali jana siadzić pad biełaruskim nacyjanalnym ściaham (a toje byŭ čyrvona-bieły ściah Indanezii). Meryjem praviała 12 hadzin u RUUS, paśla jaje adpravili na Akreścina, praz paru hadzin adpuścili i skazali pryjści ŭ sud.
Siabry prapanoŭvali vyvieźci dziaŭčynu adrazu, ale jana chacieła adpačyć i paspać.
«Praz hadzinu my pračynajemsia, bo try ambały z HUBAZa ź pistaletami kažuć «tvaram u padłohu»,
— zhadvaje jana.
Z kašalka ŭ dziaŭčyny dastali hrošy, zabrali kartki. Jaje i chłopca zabrali ŭ HUBAZiK.
«Majho maładoha čałavieka pasadzili ŭ kabiniet, naciahnuli łastaŭkaj — heta kali čatyry čałavieki ciahnuć za ruki, za nohi. Źbivali jaho prosta da stanu kamatozu, tamu što jon admaŭlaŭsia davać iłžyvyja pakazańni. Jany jaho prymušali skazać, što srodki z majho dabračynnaha kancerta ŭ «Banki-butyłki» adpraŭlalisia na spansavańnie USU Ukrainy, bajraktaraŭ».
Paŭhoda śpiavačka praviała ŭ SIZA.
«Maja muzyka, moj hołas dapamahali nie tolki mnie — jany dapamahli majoj usioj kamiery».
Śpiavačka zhadvaje, jak u SIZA daviedalisia, što jaje pryvieźli.
«U nas u kamiery siadzieła žančyna, jakaja tam była ŭžo 2,5 hoda, i jana była takim lohkim aŭtarytetam. I kali ja zajšła, usie mianie paznali. A jana takaja: «A što tut mnie kažuć, što ty śpiavaješ». I ja takaja staju sa svaim baułam, kažu: možna, ja krychu paźniej śpiaju. Jana siadzić kuryć sižku. «Ty kuryš?» Ja nie kuryła, ale ŭ SIZA zakuryła. «Nu, davaj, kali mnie spadabajecca, jak ty budzieš pieć, to budzieš sa mnoj kuryć. Tut nichto nie kuryć». Ja dumaju: nu, treba za miesca pad soncam zmahacca».
Meryjem śpieła «Kukušku» Coja, i pałova žanočaha korpusu apładziravała joj. Dziaŭčyna pa niadzielach časam śpiavała za kratami.
Pieršaje, što śpiavačka zrabiła paśla vyzvaleńnia, — pajechała ŭ SK davać pakazańni pa spravie, dzie prachodziła paciarpiełaj (čałavieka, jaki padmanuŭ jaje na hrošy, asudzili paźniej na niekalki hadoŭ). A paśla pajechała ŭ «Makdonalds».
Muzyčnuju škołu, jakuju trymała Meryjem, zakryli ŭ pieršy miesiac, pakul jana siadzieła.
U studzieni 2024-ha śpiavačka vyjechała ź Biełarusi. Muzyki, ź jakimi jana vystupała ŭ žniŭni 2022-ha kala minskaha bara, taksama emihravali.
Čytajcie taksama:
Meryjem Hierasimienka dali try hady «chatniaj chimii»
Śpiavačcy Meryjem Hierasimienka, jakaja śpieła «Obijmi» na Zybickaj, dali 15 sutak
