Piotr Mamonaŭ, rasijski rok-muzyka i aktor, jaki ŭčora vystupaŭ u Minsku z solnaj prahramaj «Daŭnavata my ciabie nie bačyli» raspavioŭ žurnalistam, kolki jon atrymaŭ za zdymki ŭ rymejku kultavaha filma «Ihołka».«Za adzin dzień zdymak u rymejku stužki «Ihołka», jaki ciapier zdymajecca, režysior Rašyd Nuhmanaŭ, zapłaciŭ mnie 10 tysiačaŭ dalaraŭ», — skazaŭ Piotr Mamonaŭ, paśla taho, jak na scenie minskaj KaZy prapiajaŭ chity hurtu «Zvuki Mu», pakazaŭ pierfomans, i pračytaŭ ułasnasačynionnyja vieršaskazy «Zakaručki».
«Ihołka» — adna ź pieršych u savieckim kiniematohrafie stužak, jakaja zasiarodziłasia na źjavie narkamanii ŭ SSSR. U roli chłopca, jaki sprabuje źniać ź ihołki svaju siabroŭku, źniaŭsia rok-śpiavak Viktar Coj. Piotr Mamonaŭ u hetym filmie atrymaŭ epizadyčnuju, ale jaskrava vykananuju rolu ekscentryčnaha lekara, pastaŭščyka narkotykaŭ.
Da 20-hadovaha jubileju z dnia śmierci vakalista «Kino» kazachska-rasijski režysior Rašyd Nuhmanaŭ nadumaŭ vybudavać svaju ŭłasnuju ścianu Coja, i ŭ žniŭni 2010 hodu maje prezientavać publicy remiks «Ihołka».
«Vializnaja kolkaść ludziej kaža, što vypraviłasia ŭ kinateatry, kab pahladzieć na «Ihołku», — skazaŭ Rašyd Nuhmanaŭ u intervju rasijskaj redakcyi časopisa Rolling Stone. — Tut mnie i ŭroiłasia ŭ hałavu ideja zrabić remiks. Asnovu składaje staraja stužka, jakuju ja pieramanciruju, plus staryja materyjały z Cojem, novyja epizody z Bašyravym i Mamonavym, a taksama ŭsialakija stylnyja damaloŭki».
Piotr Mamonaŭ - vybitny pradstaŭnik rasijskaha intelektualnaha roku, adzin z zasnavalnikaŭ hurtu «Zvuki Mu».Kulturny hieroj pierabudovačnaj smuty: uzhadajem rol zapojnaha saksafanista ŭ «Taksi-bluzie» Paŭła Łunhina. I voś ciapier vykanaŭca niaprostaj roli Ivana Žachlivaha ŭ histaryčnaj dramie «Car», dzie jahonym partnioram pa zdymkach byŭ Aleh Jankoŭski.
