42-hadovamu hramadzianinu Biełarusi i Kipra Alaksandru Klimienku vystaŭlenaje abvinavačańnie ŭ «złačynnaj zmovie z metaj admyvańnia hrošaj i viadzieńni nielicenzavanaha biźniesu pa akazańni hrašovych pasłuh», paviedamlaje «Pozirk» sa spasyłkaj na Ministerstva justycyi ZŠA.
Mužčynu aryštavali ŭ Łatvii 21 śniežnia 2023 hoda na zapyt ZŠA, jon užo vydadzieny amierykanskamu boku. Jamu pahražaje da 25 hadoŭ pazbaŭleńnia voli.
Śćviardžajecca, što z 2011 pa lipień 2017 hoda Klimienka razam z hramadzianinam Rasii Alaksandram Vińnikam i inšymi asobami nibyta kantralavaŭ biržu ličbavych valut BTC-e, a taksama, jak miarkujecca, kampaniju pa ažyćciaŭleńni technałahičnych pasłuh Soft-FX i finansavuju kampaniju FX Open.
Paviedamlajecca, što BTC-e była bujnoj strukturaj, jakaja zajmałasia «kibierzłačynnaściu i admyvańniem hrošaj u internecie», dazvalała svaim karystalnikam «handlavać bitkoinam z vysokim uzroŭniem ananimnaści». Arhanizacyja «stvaryła klijenckuju bazu, jakaja ŭ značnaj stupieni zaležyła ad złačynnaj dziejnaści». Hetaja baza, «mierkavana, vykarystoŭvałasia dla sadziejničańnia złačynstvam, pačynajučy ad kampjutarnych uzłomaŭ i zakančvajučy machlarstvam, kradziažom asabistych źviestak, schiemami viartańnia padatkaŭ, dziaržaŭnaj karupcyjaj i niezakonnym abarotam narkotykaŭ».
BTC-e i jaje apieratary dla realizacyi svaich schiem, vierahodna, vykarystoŭvali ŭ tym liku sierviery, raźmieščanyja ŭ ZŠA. Jany «byli arandavanyja i absłuhoŭvalisia Klimienkam i kampanijaj Soft-FX».
Pavodle infarmacyi bits.media, birža VTS maje rasijskija karani.
