Alaksandr Łukašenka nie turbujecca nakont vybarčych kampanij, jakija majuć adbycca. Pra heta jon zajaviŭ padčas pres‑kanfierencyi dla biełaruskich ŚMI 30 śniežnia.
«Budzie narmalna raźvivacca ekanomika, vykanajem my toje, što abiacali, ludzi padtrymajuć dziejnuju ŭładu, dziejnaha prezidenta, — skazaŭ jon.
— Nie budzie hetaha, buduć inšyja ludzi».
Łukašenka paabiacaŭ, što ź jaho boku nijakaha cisku ŭ chodzie vybarčych kampanij nie budzie. «Ja dumaju, što pryjšoŭ toj pieryjad, kali nijakaj baraćby nie pavinna z majho boku być — ni za prezidenckuju pasadu, kali ja ŭ hetych vybarach budu ŭdzielničać, ni za toje, kab upłyvać niejkim čynam, administracyjna ŭpłyvać, na hety praces. Ludzi sami pavinny vyznačycca. My pamiatajem tyja pieršyja vybary, kali mianie abrali. Adna z pryčyn majoj pieramohi była ŭ hetym žudasnym cisku ludziej, jakija tady byli va ŭładzie. Takaja ž situacyja ŭ mianie: luby cisk budzie mieć zvarotny efiekt», — zajaviŭ kiraŭnik dziaržavy.
«Tamu ja nie napružvajusia nakont hetych palityčnych kampanij. My budziem sumlenna ščyra iści na vybary», — dadaŭ Łukašenka.
Što da vybaraŭ u miascovyja saviety, to prezident nazvaŭ heta
važniejšaj palityčnaj kampanijaj 2010 hoda.
Pavodle słoŭ Łukašenki, jaho zadavalniaje rabota miascovych uładaŭ. «Ja im pavinien skazać dziakuj za toje, što jany jak barjer pierad prezidentam, vierchnimi orhanami ŭłady stali, tvaram da tvaru pierad ludźmi. Jany prymajuć asnoŭnyja ŭdary, krytyku — časam niezasłužana, tamu što nie jany vyrašajuć niekatoryja pytańni. Ale jany prymajuć na siabie hety ŭdar», — skazaŭ Łukašenka.
Jon padkreśliŭ, što «pytańnie stabilnaści i paradku ŭ dziaržavie šmat u čym zaležyć ad miascovych orhanaŭ ułady».
