Doŭhi čas Pryhožyn zastavaŭsia ŭ cieni vysokich čynoŭ, ale vychad ź jaho akazaŭsia śmiarotnym. Fota: Stringer / Anadolu Agency via Getty Images
Jaŭhien Pryhožyn, jak i jahony budučy patron Pucin, naradziŭsia ŭ Leninhradzie, ale ŭ 1961 hodzie. Pryhožyn vyras u jaŭrejskaj siamji. Spačatku išoŭ pa šlachu spartoŭca, na jaki jaho pastaviŭ ajčym-trenier, ale los prymusiŭ jaho zbočyć. Užo ŭ 18 hadoŭ niaŭdały spartsmien-łyžnik atrymaŭ svoj pieršy termin za kradziež, ale tady jašče ŭmoŭny. Tady ž Žako (iranična, ale, mahčyma, ad Žarkoj — proźvišča ajčyma, jaki nakiroŭvaŭ jaho zusim u inšy bok), jak jaho prazvali pamahatyja, staŭ na čale miascovaj złačynnaj hrupoŭki.
Žako, pa nazirańniach jaho znajomaha, jakoha cytuje rasijskaje vydańnie «Projekt», ułaścivaja «ŭnutranaja žorstkaść», i jana dazvalała jamu padparadkoŭvać svajoj voli ludziej. Jahonaja hrupoŭka paśpiachova ŭzłomvała i rabavała kvatery, ale papaŭsia Žako na sprobie abrabavać dziaŭčynu. Jon atrymaŭ 13 hadoŭ pazbaŭleńnia voli za kradziež, razboj, machlarstva i ŭciahvańnie niepaŭnaletniaha ŭ złačynnuju dziejnaść.
U źniavoleńni jon adśviatkavaŭ svajo 19-hodździe. Mienavita ŭ kałonii Pryhožyn straciŭ fałanhu bieznazoŭnaha palca levaj ruki. U budučyni pa hetaj prykmiecie sapraŭdnaha Pryhožyna buduć adroźnivać ad jahonych dvajnikoŭ.
Svajho terminc jon całkam nie adsiadzieŭ i ŭ 1990 hodzie vyjšaŭ z kałonii, raptam apynuŭšysia ŭ zusim inšaj krainie. Nijakich praŭdzivych śviedčańniaŭ pra hety pieryjad žyćcia Pryhožyna nie isnuje. Sam jon śćviardžaŭ, što pradavaŭ chot-dohi, inšyja ž śćviardžajuć, što kruciŭsia kala stychijnaha aŭtarynku, dzie pačynali svaju karjeru pieciarburhskija bandyty. Tut jon handlavaŭ trochi padłatanymi paślaavaryjnymi mašynami.
Praź niekalki hod kryminalniku dapamoža pačać svoj šlach u vialiki biznes były adnakłaśnik Barys Śpiektar, jaki razam sa svaim partnioram, bandytam Michaiłam Miryłašvili, adkryŭ u Pieciarburhu niekalki kazino, a taksama vałodaŭ sietkaj praduktovych kram. Pryhožyna jon pastaviŭ jakraz top-mieniedžaram roźničnaj sietki.
Pryhožyn na sustrečy Uładzimira Pucina z Džordžam Bušam-małodšym u 2006 hodzie. Fota: Sergei Zhukov, Sputnik, Kremlin Pool Photo via AP
U kancy 1995 hoda pobač sa strełkaj Vasiljeŭskaha vostrava Pryhožynym byŭ adkryty restaran z redkimi tady fua-hra i vustrycami, na jaki jamu dali hrošy Miryłašvili i Śpiektar. Ustanovu chutka acanili pieršyja ludzi ŭ horadzie, tut byvaŭ z žonkaj tahačasny mer Anatol Sabčak, a taksama jahony namieśnik — Uładzimir Pucin. Tak Pryhožyn upieršyniu ź im i paznajomiŭsia.
Ale pierałomnym momantam u karjery staŭ inšy prajekt Pryhožyna — pieraabstalavany ŭ 1997 hodzie pad płyvučy restaran prahułačny ciepłachod ź vidam na Isakijeŭski sabor i Admirałciejstva. Mienavita tut Pucin, kali stanie prezidentam, budzie pravodzić sustrečy z suśvietnymi lidarami, u tym liku z Bušam-małodšym i Žakam Šyrakam, i śviatkavać svaje dni narodzinaŭ.
Pryhožyn absłuhoŭvaje za stałom prezidenta Rasii — za heta jon atrymaje mianušku «Kuchara Pucina», 2011 hod. Fota: AP Photo
Pucin, vidać, acaniŭ toje, jak Pryhožyn ź ničoha padniaŭ paśpiachovy biznes. Pryhožynu ž da prezidenta jašče bolš nablizicca dapamoh kiraŭnik spraŭ Pucina.
Były kryminalnik staŭ atrymlivać dobryja zakazy na absłuhoŭvańnie dziaržaŭnych bankietaŭ, pieratvaryŭšysia ŭ taho samaha «Kuchara Pucina».
Partnioraŭ, jakija kaliści davali jamu hrošy na jahonuju spravu, Pryhožyn pazbyŭsia — usie ichnija restarany raptam dastalisia Pryhožynu.
Pryhožyn nie curaŭsia hvałtu. U jahonym ofisie hvałt «byŭ pastaŭleny na patok»,
i za hetym sačyŭ śpiecyjalny čałaviek. Rasśledavańnia vypadkaŭ złačynstvaŭ, učynienych Pryhožynym, pravaachoŭnyja orhany nie pravodzili zusim abo pravodzili maksimalna farmalna. Viadoma, prynamsi, pra paŭtara dziasiatka vypadkaŭ, kali jaho supracoŭnikaŭ padazravali ŭ źbivańni ludziej, jakija skončylisia śmierciu abo surjoznaj škodaj dla zdaroŭja achviar. Nichto ź ich nie panios adkaznaści.
Aficyjanty padsłuchoŭvali svaich klijentaŭ u čas pryjomaŭ i danosili sens hutarak da svajho kiraŭnika. Na klučavych mierapryjemstvach z udziełam kiraŭnictva krainy Pryhožyn pracavaŭ asabista. Pra Pucina jon zaŭsiody adhukaŭsia z demanstratyŭnaj pavahaj, a kali pisaŭ pra jaho, to vyklučna vialikimi litarami — JON.
«Fabryka trolaŭ» stała pieršym važnym palityčnym prajektam Pryhožyna. Pavodle adnoj ź viersij, jon stvaryŭ jaje paśla hutarak ź Viačasłavam Vałodzinym. Da hetaha na srodki Pryhožyna byŭ źniaty film «Anatomija pratestu», u jakim raskazvałasia, što na mitynhi apazicyi ludziej nibyta zvoziać za hrošy.
U 2010-ja hady rasijskija ŭłady padhladzieli ideju pryvatnych vajskovych kampanij, što składalisia ź siłavikoŭ, jakija farmalna vyjšli na piensiju, ale prajšli padrychtoŭku i majuć dośvied bajavych dziejańniaŭ. Vysokapastaŭlenyja aficery Minabarony Rasii padtrymali ideju stvareńnia PVK i davieryć jaje «Kucharu Pucina». Pieršapačatkova Pryhožyn byŭ nie ŭ zachapleńni.
Pryhožyn siarod rasijskich vajskoŭcaŭ na naradzie pa Livii. Fota: Libyan National Army via AP
Hetaja vajenizavanaja hrupoŭka, jak vyśvietliłasia paśla, udzielničała jašče ŭ rasijskaj ahresii suprać Ukrainy na Danbasie, ale ŭpieršyniu pra PVK «Vahnier» zahavaryli ŭ 2015 hodzie, kali kampanija šukała bajcoŭ dla ŭdziełu ŭ vajennaj apieracyi ŭ Siryi. Zatym PVK brała ŭdzieł u Afrycy, dzie rasijskija najmity i palittechnołahi dapamahali miascovym lidaram zachoplivać abo ŭtrymlivać uładu.
Uviesnu 2018 hady kampanii Pryhožyna pačali budavać fabryku pa zdabyčy zołata ŭ Sudanie.
Jaŭhien Pryhožyn u Afrycy, 21 žniŭnia 2023. Fota: Wagner Account / Anadolu Agency via Getty Images
Vychavańnie ŭ jaŭrejskaj siamji nijak nie zaminała Pryhožynu trymać na čale svajoj armii adkrytaha nacysta Dźmitryja Utkina. Pazyŭny Utkina, «Vahnier», uziaty ad proźvišča lubimaha kampazitara Hitlera, navat daŭ nazvu ŭsioj PVK. Paznajomilisia jany ŭ čas ukrainskaj kampanii ŭ 2014 hodzie. Da Pryhožyna prymacavali Vahniera ŭ jakaści kamandzira siłavoj padtrymki.
Pryhožyn doŭhi čas lačyŭsia ad abdaminalnaha raku i prachodziŭ terapiju. Praz svaju chvarobu jon prytrymlivaŭsia strohaj dyjety i vioŭ zdarovy ład žyćcia. Jak čałaviek z ankałohijaj, jon vielmi bajaŭsia karanavirusnaj infiekcyi, pisała rasijskaje vydańnie «Fontanka», i navat pieratvaryŭ adzin z pakojaŭ u svaim zaharadnym domie ŭ balničnuju pałatu na vypadak, kali zachvareje.
Dziela biaśpieki ŭ Pryhožyna byli nie tolki falšyvyja dakumienty, ale i sama mieniej adzin dvajnik.
Kanflikt ź Minabarony ŭ Pryhožyna pačaŭsia jašče da poŭnamaštabnaha ŭvarvańnia va Ukrainu. Z 2017 hoda jon nie moh daravać Šajhu i jaho hienierałam, što jany zabrali sabie ŭsie łaŭry za paŭtorny šturm siryjskaj Palmiry ŭ 2017 hodzie, chacia ŭ im udzielničała PVK «Vahnier». Kazali, što ŭ 2021 hodzie Pryhožyn navat udaryŭ kahości z hienierałaŭ, jakoha Šajhu adpraviŭ da jaho na pieramovy.
Ź lutaha 2022 hoda impieryja Pryhožyna stała nieabchodnaja pucinskamu režymu jak nikoli raniej. Asabliva paśla taho, jak nastup rehularnaj armii faktyčna zachłynuŭsia na bolšaści kirunkaŭ i daviałosia adstupać z užo, zdavałasia b, zaniatych ukrainskich ziamiel. Rasijskija ŭłady adčuli vostry niedachop u žyvoj sile.
Pryhožyn na raźvitańni z Uładlenam Tatarskim na Trajakuraŭskich mohiłkach Maskvy ŭ krasaviku 2023 hoda. Fota: AP Photo
Vypravić situacyju niečakanym čynam uziaŭsia mienavita Pryhožyn, jaki asabista naviedvaŭ rasijskija kałonii, dobra viadomyja jamu pa maładości, i vierbavaŭ źniavolenych u PVK «Vahnier» dla ŭdziełu ŭ vajnie ŭ abmien na volu i pašanu. Ale hetych nieprafiesijnych navabrancaŭ možna było vykarystoŭvać vyklučna jak «harmatnaje miasa», jak, ułasna, Pryhožyn imi i karystaŭsia. Tym nie mienš hetaja taktyka dazvoliła jamu dasiahnuć davoli značnych pośpiechaŭ svaimi prafiesijnymi siłami.
Ź vialikimi prablemami vahnieraŭcy sutyknulisia ŭ čas bajoŭ za Bachmut. Ukraincy zaciata bilisia za kožny kvadratny mietr zrujnavaha daščentu horada, a najmity Pryhožyna, jakomu było palityčna važna zachapić hety nasieleny punkt, masava hinuli pad ahniom, nie majučy mahčymaści paŭnavartasna adkazvać ukraincam. Heta pryviało da taho, što ŭ kancy 2022 hoda znoŭ razhareŭsia kanflikt Pryhožyna ź Minabarony RF. Jon abražaŭ vojenačalnikaŭ, patrabavaŭ bojeprypasy i abvinavačvaŭ ich u vialikich achviarach padčas šturmu horada.
Dniom 23 červienia Jaŭhien Pryhožyn vypuściŭ vialikaje intervju z rezkimi abvinavačvańniami ŭ adras kiraŭnictva Ministerstva abarony Rasii, u jakim zajaviŭ, što toje naŭmysna padmanvała rasijskuju hramadskaść i Uładzimira Pucina ŭ 2022 hodzie i što nijakich padstaŭ dla ŭvarvańnia va Ukrainu nie było.
Pryhožyn adjazdžaje sa štaba PVA ŭ Rastovie 24 červienia 2023. Fota: AP Photo
U svaim čarhovym zvarocie Pryhožyn zajaviŭ, što jahonaje 25-tysiačnaje vojska «idzie raźbiracca, čamu ŭ krainie adbyvajecca biaźmiežža», i zaklikaŭ usich achvotnych dałučacca. Unačy 24 červienia bajcy PVK «Vahnier» uvajšli ŭ Rastoŭ-na-Donie i błakavali klučavyja abjekty ŭ horadzie, u tym liku štab Paŭdniovaj vajskovaj akruhi.
Dniom kałony vahnieraŭcaŭ rušyli pa fiederalnaj trasie ŭ bok Maskvy. U rasijskich praŭładnych kołach i prapahandysckich miedyja pačałasia panika. Uładzimir Pucin padčas zvarotaŭ pa dziaržaŭnych telekanałach nazvaŭ miaciež «zdradaj», a taksama «ŭdaram u śpinu» i paabiacaŭ, što ŭsie, chto staŭ na šlach miaciažu, «paniasuć nieminučaje pakarańnie». Suprać Pryhožyna byli zaviedzienyja kryminalnyja spravy i adbylisia pieratrusy ŭ jaho ofisach i kvaterach.
Adnak sprava niečakana vyrašyłasia miram. Dla hetaha byŭ zadziejničany Alaksandr Łukašenka, jaki byccam by damoviŭsia z Pucinym, što pad jahonyja harantyi Pryhožyn i tyja vahnieraŭcy, jakija pažadajuć, zmohuć pierabracca ŭ Biełaruś. Ruch na Maskvu byŭ spynieny, a pad Asipovičami źjaviŭsia vielizarny łahier. Praŭda, jak zdavałasia spačatku, Pryhožyn nie trapiŭ u apału: jon jeździŭ u Rasiju pa svaich spravach, sustrakaŭsia z Pucinym, kryminalnyja spravy zamiali, majomaść viarnuli, ačarnieńnie va ŭsich miedyja niečakana skončyłasia.
I nijakich prykmiet taho, što rasijski kiraŭnik źbirajecca jamu adpomścić, da ździŭleńnia bolšaści ekśpiertaŭ, byccam by i nie isnavała. Až da siońnia.
Źviazany z PVK «Vahnier» telehram-kanał, kamientujučy hibiel kiraŭnika najmitaŭ, vykazaŭ mierkavańnie, što «ŭ piekle jon budzie najlepšym!».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Śmierć Pryhožyna robić samoha Łukašenku ŭ niejkaj stupieni «novym Pryhožynym»
