Ina Zajcava ličyć, što biełarusy vyrašyli, što ich žyćcio nie kaštuje taho, kab u Biełarusi adbylisia źmieny. Skryn videa
Adnosna pretenzij, jakija hučali ad Zianona Paźniaka ci asobnych bajcoŭ-kalinoŭcaŭ, nakont taho, što pratestam u Biełarusi ŭ 2020-m brakavała rašučaści, Ina Zajcava zaŭvažaje, što na vuličnyja pratesty ŭ pieršyja paślavybarčyja dni rašyłasia vyjści ŭsiaho niekalki dziasiatkaŭ tysiač čałaviek.
«Nichto nie pieraškadžaŭ pratestu być niamirnym. Chto chacieŭ, [u taho] byŭ niamirnym».
Ina Zajcava zhadvaje, jak prysutničała 10 žniŭnia 2020 hoda la stancyi mietro «Puškinskaja»: «Mnie było soramna, tamu što heta było, z adnaho boku, pra niamirny pratest. A z druhoha — ludziej było vielmi mała. Nie było kamu zakidvać kamieńniem AMAP i ŭsich astatnich. Nie było.
Pa sutnaści, vializnaja masa ludziej paŭstała nie stolki praz vybary, jakija ŭ ich skrali, a praz nasille, jakoje adbyłosia paźniej. Mienavita jano ŭskałychnuła nas tady. Mienavita nasille. A vybary biełarusy ŭ svajoj bolšaści dazvalali ŭ siabie skraści, tamu što na «Puškinskaj» było mała ludziej».
Ina pryhadvaje padziei viečara paśla vybaraŭ kala stancyi mietro «Puškinskaja»: «My staim. Ja kažu: «Pajšli tudy. U samuju hušču». A moj muž mnie adkazvaje: «Za kaho? Za tych, chto ciapier śpić? Tut kolki ludziej? Dziesiać tysiač. U nas skrali vybary. Ludziej, jakija viedajuć, što ŭ nas skrali vybary, vielmi mnoha. Kolki tut? Ty suprać kaho chočaš? Navošta? Ty straciš žyćcio».
Akryvaŭleny demanstrant u Minsku. 9 žniŭnia 2020 hoda, rajon Steły. Fota: «Naša Niva»
Ina adznačaje, što jaje muž šmat raspaviadaŭ pra los palitykaŭ. «Heta ludzi, jakija addali svoj los, svajo narmalnaje žyćcio, zabrali siabie ŭ dziaciej. Jany vielmi šmat addali dla ludziej, jakija stajali na parkoŭkach u supiermarkietach u dzień, kali my vychodzili suprać zabojstva Bandarenki», — kazaŭ muž Iny.
Ina ličyć: «Pratest prajhraŭ nie tamu, što jon byŭ niamirny i my nie zachoplivali budynkaŭ. Biełarusy vielmi razvažliva vyrašyli nie addavać svajho žyćcia. I heta vybar. Jany vyrašyli, što ich žyćcio nie kaštuje taho, kab u Biełarusi adbylisia źmieny. Ja hatovaja trapić u turmu, adsiedzieć tam, naprykład, 5—10 hadoŭ. A addać žyćcio nie hatovaja».
Budaŭniki pratestujuć. Minsk, žnivień 2020-ha. Fota: «Naša Niva»
Na dumku Iny, pratest prajhraŭ taksama tamu, što «biełarusy nie hatovyja byli rublom achviaravać. Navat nie žyćciom. Kali Cichanoŭskaja abviaściła zabastoŭku, i jana nie adbyłasia. Voś u hety momant jon prajhraŭ. A nie tamu, što jon byŭ niamirny. Jon byŭ niedastatkova salidarny na ŭzroŭni nie prosta padtrymki słovami, a dziejańniami.
Nie było ŭ nas dastatkova salidarnaści dla takoha pratestu. My mahli pieramahčy Łukašenku mirna. Jany bajalisia zabastoŭki. Jak ahniu bajalisia».
Hladzicie całkam:
