Mahiloŭ. Zatoplenaje pierakryžavańnie vulic Pieršamajskaj i Cimirazieŭskaj. Fota: sacyjalnyja sietki
Daždžy zalivajuć uschodnija rehijony Biełarusi ŭžo niekalki dzion. Siońniašnija apadki sinoptyki kvalifikavali jak duža mocnyja.
Na Mahiloŭ navalnica abrynułasia 27 lipienia paśla abiedu.
«Doždž — kapiec poŭny!» — adreahavała žycharka abłasnoha centra na pytańnie pra situacyju ŭ horadzie.
Mahiloŭ. Ručaj Strušnia staŭ paśla zalevy nieŭtajmavanym patokam brudnaj vady. Fota: sacyjalnyja sietki
Pavodle słoŭ žančyny, nievialikija miascovyja račułki pieratvarylisia ŭ šumnyja patoki brudnaj vady.
Fota— i videazdymkami z nastupstvami niepahadzi strakaciać čaty aŭtamabilistaŭ.
Kiroŭcy adzin adnamu paviedamlajuć, kudy lepš nie jechać. Pad vadoju apynulisia prajeznyja častki vulic jak u centry Mahilova, tak i ŭ spalnych rajonach.
Zvykłaj spravaj staŭ patop na skryžavańni vulic Pieršamajskaj i Cimirazieŭskaj. Hetaja haradskaja miaścina niepadalok ad budynka abłvykankama. Miascovaja daždžavaja kanalizacyja nie spraŭlajecca ź vialikaj vadoj.
Mahiloŭ paśla zalevy. Prajeznaja častka vulicy Kasmanaŭtaŭ pad vadoju. Skryn videa z sacyjalnych sietak
Daśviedčany kiroŭca papiaredžvaje svaich kaleh-pačatkoŭcaŭ być abačlivymi, vyjazdžajučy z vulicy Łazarenki da budynka dramatyčnaha teatra (heta centr horada):
«Z razhonu ŭ łužyny zajazdžać nie treba, a to ŭžo paru čałaviek zahłuchła, bo zaliło ruchavik daždžavoj vadoj».
«Pierakryžavańnie Simanava i Astroŭskaha — basiejn…» — zaścierahaje jašče adzin kiroŭca kaleh. Heta haradskaja miaścina ŭ Zadniaproŭi.
Adna z hałoŭnych mahistralaŭ Zadniaproŭja — vulica Habraŭskaja — taksama apynułasia pad vadoj.
Mahiloŭ. Abstanoŭka paśla zalevy na vulicy Habraŭskaj. Skryn videa z sacyjalnych sietak
«Budźcie na joj aściarožnyja. Šmat vady», — papiaredžvaje kiroŭca kaleh.
Pra situacyju ŭ inšym miescy horada napisaŭ nastupny ŭładalnik aŭto:
«Kalco Kasmanaŭtaŭ — vielmi vialikaja łužyna, abjazdžajcie».
Jaho kaleha dadaje:
«Dapamahaje DAI, vyciahvajuć z łužyn…»
Mahiloŭ. Vulica Simanava paśla zalevy. Skryn videa z sacyjalnych sietak
Žycharam adnaho z damoŭ na vulicy Hryšyna daviałosia dabiracca da padjezda pa kalena ŭ vadzie. Svaim horam jany padzialisia na fota ŭ sacsietkach.
Vulica Hryšyna ŭ Mahilovie paśla zalevy. Fota: sacyjalnyja sietki
Prahnozy sinoptykaŭ na zaŭtrašni dzień abnadziejvajuć: daždžy sunimucca.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
U Klimavickim rajonie žančyny vyklikali doždž pry dapamozie admysłovaha abradu FOTY
Klimatołah tłumačyć, u čym pryčyny svavolstva nadvorja i čym pahražaje doŭhaja adsutnaść daždžoŭ
Padrabiaznaści trahiedyi na Minskim mory, dzie ŭ niepahadź zahinuła 19-hadovaja dziaŭčyna
U Paŭdniovaj Afrycy vypaŭ śnieh. Takoha tam nie było 10 hadoŭ
