Rasijskija mabilizavanyja
Kreml prosić prapahandystaŭ «nie źnižać čakańni anansavanaha kontrnastupleńnia Ukrainy pry padtrymcy NATA» i nie kazać pra toje, što «Kijeŭ nibyta nie hatovy da «kontrnastupu».
Praŭładnyja ŚMI, naadvarot, pavinny zrabić akcent na tym, što zachodnija krainy pastaŭlajuć Kijevu ŭzbrajeńnie i ŭsialak padtrymlivajuć Ukrainu.
Dźvie krynicy «Mieduzy», blizkija da Administracyi prezidenta Rasii, rastłumačyli, što ŭ takoha aśviatleńnia kontrnastupleńnia, jakoje rychtujecca, jość prostaje tłumačeńnie:
Kali nastup budzie niaŭdałym, možna budzie kazać: armija [Rasii] ŭmieła adbiła pieraŭzychodziačuju pa mahutnaści ataku. Košt hetaj pieramohi mocna vyraście.
Kali ž Ukraina pry dapamozie zbroi z ZŠA i Jeŭropy dasiahnie niejkich pośpiechaŭ i zojmie terytoryi, ich strata taksama budzie vytłumačalnaja: uvieś Zachad zasiarodziŭ vielizarnyja namahańni na froncie, ale jaho pośpiechi — u paraŭnańni z hetymi namahańniami — vielmi ścipłyja. Heta značyć, rasijskaja armija ŭvohule taksama spraviłasia.
U hetaj samaj mietadyčcy Kreml «raić» prapahandystam «nie piedalavać infarmacyju ab sumach srodkaŭ», jakija nakiroŭvajucca z rasijskaha biudžetu na adnaŭleńnie infrastruktury na akupavanych i anieksavanych ukrainskich terytoryjach.
Zamiest hetaha prapahandysty raskažuć pra toje, jak u Rasii «raźviazvajucca prablemy»: naprykład, pra ramont u škołach, dziciačych sadach i balnicach.
«Zrazumieła, što prablemy [z ekanomikaj] buduć, i zrazumieła, praz što. Vydatki na «śpiecapieracyju» nikudy nie padzienucca. U pieršuju čarhu buduć rezacca vydatki na tuju ž infrastrukturu: atrymajecca, što ŭ novych rehijonach ramantujuć, a ŭ starych — nie.
Reakcyja [žycharoŭ rasijskich rehijonaŭ] zrazumiełaja: u nas zabrali. Lepš nie pakazvać u kankretnych sumach, kolki zabrali. Z Krymam heta ŭžo było», — tłumačyć adna ź blizkich da pucinskaj Administracyi krynic «Mieduzy».
Jašče adnoj «niepažadanaj temaj» dla prapahandy niečakana stali repietycyi parada z nahody 9 Maja. U niekalkich rehijonach Rasii pa mierkavańniach biaśpieki ŭžo vyrašyli całkam admovicca ad śviatkavańnia. Čamu tak — vykazvajucca i viersii, što z-za prablem ź biaśpiekaj, i z-za taho, što na parady mohuć vyvieści tolki staruju techniku i jaje budzie niašmat. «Mieduza» nie viedaje, u čym dakładna pryčyna, adnak Kreml u svajoj mietadyčcy sapraŭdy «rekamienduje» prapahandystam «nie musiravać» temu padrychtoŭki da 9 Maja.
Čytajcie taksama:
