Biez pavyšeńnia stoli (maksimalna dazvolenaha pamieru doŭhu) ułady ZŠA nie zmohuć atrymlivać novyja pazyki.
U paniadziełak Jelen zaklikała Kanhres jak maha chutčej padniać limit, jaki ciapier ustalavany na ŭzroŭni 31,4 tryljona dalaraŭ.
U toj ža dzień Upraŭleńnie amierykanskaha kanhresa pa biudžecie papiaredziła ab «značnaj ryzycy taho, što da pačatku červienia ŭ Minfina skončacca srodki». «Razam z tym, zastajecca niezrazumiełym, kali mienavita fondy mohuć skončycca, tak jak u najbližejšyja tydni ciažka pradkazać abjom vydatkaŭ, a taksama čas i pamiery padatkovych pastupleńniaŭ», — skazana ŭ dakładzie.
Da kanca kvartała, heta značyć da červienia, Minfin płanuje pavialičyć svaje zapazyčańni prykładna na 449 młrd dalaraŭ u paraŭnańni z papiarednimi płanami. Takim čynam, ich suma składzie blizu 726 młrd dalaraŭ.
Amierykanskija čynoŭniki kažuć, što im davodzicca zajmać bolš srodkaŭ, bo pastupleńni ad padatku na prybytak akazalisia mienšyja za čakanyja, a vydatki ŭrada, naadvarot, pieravysili zapłanavanyja pakazčyki. Akramia taho, pa stanie na pačatak kvartała na ŭradavych rachunkach akazałasia mienš srodkaŭ, čym mierkavałasia.
Pavyšeńnie stoli dziaržaŭnaha doŭhu — pracedura dla ZŠA davoli zvyčajnaja: z 1960 hoda heta adbyvałasia ŭžo 78 razoŭ.
Adnak ciapier respublikancy, jakija kantralujuć Pałatu pradstaŭnikoŭ, piarečać prahramie vydatkaŭ, abvieščanaj prezidentam-demakratam Džo Bajdenam. U abmien na dazvoł pavysić maksimalny pamier pazyk jany zapatrabavali rezkaha skaračeńnia dziaržaŭnych vydatkaŭ i admieny niekatorych vielmi važnych dla Biełaha doma rašeńniaŭ, u tym liku prahramy prabačeńnia studenckich daŭhoŭ i padatkovych kredytaŭ dla ekałahičnych technałohij.
U svaju čarhu suprać takich patrabavańniaŭ vystupili demakraty, u jakich bolšaść u Sienacie — vierchniaj pałacie Kanhresa. Prezident Bajden na minułym tydni zajaviŭ, što pa hetych pytańniach «pieramovaŭ być nie moža».
Pahroza defołtu
Adnak na kiraŭnika Biełaha doma akazvajecca ŭsio bolšy cisk z tym, kab jon pahadziŭsia abmierkavać respublikanskija prapanovy.
U advarotnym vypadku nad ZŠA moža navisnuć pahroza defołtu, heta značyć farmalnaj niazdolnaści ŭrada absłuhoŭvać svaje daŭhi. Padobnaje raźvićcio padziej moža abrynuć suśvietnyja finansavyja rynki i razburyć vieru ŭ ZŠA jak u nadziejnaha hulca.
Ekśpierty papiaredžvajuć, što defołt taksama moža pryvieści da recesii i pavyšeńnia biespracoŭja.
U vypadku, kali va ŭrada ZŠA skončacca srodki, jon nie zmoža zajmać hrošy dla vypłaty zarabotnaj płaty supracoŭnikam dziaržaŭnych struktur i vajskoŭcam, taksama pad pahrozaj akažucca sacyjalnyja vypłaty hramadzianam i inšyja abaviazacielstvy ŭładaŭ, naprykład, apłata pasłuh pastaŭščykoŭ Ministerstva abarony.
Paciarpieć mohuć navat prahnozy nadvorja na telebačańni, bo mnohija telekampanii karystajucca danymi Nacyjanalnaj mietearałahičnaj słužby, jakaja finansujecca ź fiederalnaha biudžetu.
«Pa vopycie minułych tupikovych situacyj z daŭhavym limitam nam viadoma, što, kali čakać pavieličeńnia abo prypynieńnia pazykovaj stoli da samaha apošniaha momantu, heta moža pryvieści da surjoznaj škody dla dziełavoj i spažyvieckaj upeŭnienaści, pavysić karotkačasovy košt pazyk dla padatkapłacielščykaŭ i niehatyŭna adbicca na kredytnym rejtynhu ZŠA», — napisała kanhresmienam Jelen u aŭtorak.
Jana dadała, što nie moža pradkazać, kali mienavita va ŭrada ZŠA mohuć skončycca srodki.
U inšym liście, adpraŭlenym u Kanhres u studzieni, Jelen paviedamlała, što Minfin pačaŭ realizoŭvać «ekstrannyja miery», kab paźbiehnuć defołtu.
Čytać taksama:
Kab raspłacicca z doŭham, Šry-Łanka pieradaść Kitaju 100 tysiač makak. Ale dla čaho?