Hetyja intervju ź biznesoŭcam Dźmitryjem Bohušam (źleva) i repietytaram Jaŭhienam Liviantam źniaty, mierkavana, u adnym z kabinietaŭ HUBAZiKa. Skryny videa BT i ANT
Kiraŭnik «Bajpoła» Alaksandr Azaraŭ kaža, što da 2020 hoda siłavyja struktury nie zapisvali masava videa z zatrymanymi. Hetuju technałohiju prydumali ŭ 3-m upraŭleńni HUBAZiKa pad kiraŭnictvam Michaiła Biedunkieviča dla dyskredytacyi pratestaŭ.
Takija filmy mielisia pakazać, što pratestoŭcy — bajaźliŭcy, jakija lohka admaŭlajucca ad svaich pohladaŭ dy raskajvajucca va ŭčynienym. Heta mieła davieści, što «treba padtrymlivać Łukašenku, a nie pratesty».
Bolšaść videarolikaŭ z zastrašanymi ludźmi zdymajucca na fonie dźviarej, časam dadajecca fon horada ci pradpryjemstva. Pišucca jany i ŭ kabinietach.
«Na dopycie čałaviek pryznajecca, padpisvaje pratakoł i tady jamu zajaŭlajuć, što treba jašče źniać videa, kab mieć šansy vyjści na svabodu. Kali dopyt viadzie śledčy KDB, to zapisvać videa moža opier KDB. Kali śledčy Śledčaha kamiteta, to moža zdymać i supracoŭnik HUBAZiK. Kali dopyt adbyvajecca ŭ HUBAZiKu, to paśla dopytu, jaki niaredka supravadžajecca źbićciom, prynižeńniem i psichałahičnymi katavańniami, zdymaje videa supracoŭnik hetaj arhanizacyi», — patłumačyŭ «Našaj Nivie» były aficer Ministerstva ŭnutranych spraŭ, jaki ciapier znachodzicca za miažoju.
Alaksandr Azaraŭ kaža, što na pieršych videa z zatrymanymi jon paznaŭ svoj były słužbovy kabiniet. Ciapier u im siadzić načalnik adździeła 3-ha ŭpraŭleńnia Ihar Łunievič, jaki raniej byŭ jaho padnačalenym.
Kiraŭnik «Bajpoła» dapuskaje, što hetyja videa z zatrymanymi prydumaŭ mienavita Łunievič.
Intervju z repietytaram Jaŭhienam Liviantam i biznesoŭcam Dźmitryjem Bohušam taksama mahło zdymacca ŭ hubazikaŭskim kabiniecie, nie vyklučaje Azaraŭ.
Prapahandystka Lebiedzieva zapisvała intervju z zatrymanymi žurnalistkami Tut.by, mierkavana, u techničnym kabiniecie śpiecsłužby. Skryn videa BT
Pamiaškańnie, dzie zapisvali intervju z zatrymanymi žurnalistkami Tut.by, pa nazirańniach kiraŭnika «Bajpoła», padobnaje da techničnaha kabinieta niejkaj śpiecsłužby. Na toje ŭkazvaje šafa i papki ŭ joj.
Na jašče adnym videa, z byłoj administratarkaj sietki čataŭ «97%» Taćcianaj Kurylinaj, dapuskaje Alaksandr Azaraŭ, moža być pryjomnaja namieśnika ministra ŭnutranych spravaŭ. Ab tym śviedčyć anturaž sa skuranymi fatelami.
«Heta aznačaje, što źniavolenaha vazili na hutarku da namieśnika ministra ci navat samoha ministra. Značyć, aryštavanaja vałodaje važnymi źviestkami i tamu jaje pryvieźli, kab raskazała. Vieźli nie dla videa. Jaho zdymali, najchutčej, paśla hutarki ź ministerskimi», — miarkuje Alaksandr Azaraŭ.
Intervju, mierkavana, u pryjomnaj namieśnika ministra MUS. Skryn videa BT
Za pieryjad masavych represij u telehram-kanałach siłavikoŭ vystaŭlena mnostva videa z zatrymanymi.
U pieršyja miesiacy ŭ sieciva trapiła niamała videa sa śladami katavańniaŭ. Tak vyhladaŭ na videa levy aktyvist Mikoła Dziadok.
Z časami łukašysty stali bolš aściarožnymi, filtrujuć kantent. Siłaviki zdymajuć razhublenych paśla vobšukaŭ ludziej. Z nahavoranaha na kamieru vyrazajuć patrebnyja vykazvańni. Ludziej prymušajuć abhavorvać siabie, časam staviačy pierad nieabchodnaściu zmahacca za biaśpieku svaju i rodnych.
Videa z zatrymanymi zdymajuć nie tolki siłaviki, ale i prapahandysty.
Tak, padčas pratestaŭ u 2020-m ludziej na kamieru dapytvała Ludmiła Hładkaja z «SB. Biełaruś siehodnia». U SIZA jeździli Ksienija Lebiedzieva i Nastaśsia Bieniedziasiuk z BT. Niekatorych palitviaźniaŭ adpraŭlajuć na intervju da kiraŭnika ANT Marata Markava — mahčyma, zapis takoha videa stavicca ŭmovaj vyzvaleńnia.
Telegram pieryjadyčna błakuje prapahandysckija kanały, u tym liku, hubazikaŭskija, dzie publikujucca takija videa, a taksama videa brutalnych zatrymańniaŭ dy pahromy kvater apazicyjna nastrojenych ludziej.
U toj ža čas archiŭ takich videa moža stać važnym śviedčańniem pry rasśledavańni masavych palityčnych represij.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Jak pasvarylisia prapahandyst SB, viadučaja kanała HUBAZiKa i sakratarka «Biełaj Rusi»
