Łukašenka 1 sakavika 2022 hoda pakazvaje, jak nibyta źbiralisia napadać na Biełaruś. Fota: Puł pieršaha.
Narady my padličvali pa paviedamleńniach pres-słužby Łukašenki ci dziaržaŭnych ŚMI.
22 śniežnia Łukašenka sklikaŭ naradu ab vynikach pravierki siłavoha błoka krainy.
Pavodle jaho, praviarali siły nieadkładnaha reahavańnia pa dvuch napramkach — zachodni i paŭnočna-zachodni. Adkaznym byŭ dziaržaŭny sakratar Rady biaśpieki Alaksandr Valfovič.
«My pravodzili i pravodzim treniroŭki. Ciapier jany z pryčyny situacyi, jakaja skłałasia, i pahroz — bolš maštabnyja. Tamu my na svajoj terytoryi pravodzim vučeńni. Pieramiaščajem tudy, kudy my ličym patrebnym, i sumiesnuju hrupoŭku ŭzbrojenych sił, i svaje ŭzbrojenyja siły. Kropka. Nijakaj inšaj zadumy, nijakaj kanśpirałohii», — kazaŭ Łukašenka.
6 śniežnia jon pravioŭ naradu pa pytańniach zabieśpiačeńnia žyllom vajskoŭcaŭ i pryroŭnienych da ich asob.
Na joj zajaviŭ, što «zabieśpiačeńnie žyllom biudžetnikaŭ i asabliva ludziej, jakija stajać na abaronie Biełarusi, zaŭsiody budzie ŭ pryjarytecie dziaržaŭnaj žyllovaj palityki».
«Słužyš — žyvi, adsłužyŭ patrebnuju kolkaść hadoŭ, dapuścim, 25 hadoŭ, — dziaržava pavinna zahadzia skazać: my hetamu čałavieku paśla 25 hadoŭ (kali jon sychodzić sa słužby, zvalniajecca ŭ zapas ci pa jašče niejkich abjektyŭnych pryčynach) biaspłatna addajom hetuju kvateru, žyllo ci jon 3% pavinien zapłacić, ci pa reštkavym košcie?» — razvažaŭ palityk.
1 śniežnia Łukašenka sklikaŭ naradu pa pytańniach abarony Biełarusi.
Pavodle jaho, usie siłavyja viedamstvy adznačajuć rost kolkaści pravakacyj pablizu dziaržaŭnaj hranicy.
«Z boku biehłaj apazicyi ŭsio čaściej hučać zakliki da zachopu ŭłady siłavym šlacham i ździajśnieńnia terarystyčnych aktaŭ na terytoryi Biełarusi», — pałochaŭ jon.
29 listapada staršynia Śledčaha kamiteta Dźmitryj Hara dakładvaŭ Łukašenku ab pracy Śledčaha kamiteta.
Na sustrečy prysutničaŭ dziaržaŭny sakratar Rady biaśpieki Alaksandr Valfovič.
Dźmitryj Hara daŭ spravazdaču ab rasśledavańni kryminalnych spraŭ «ekstremisckaj nakiravanaści», jakich, pavodle Łukašenki, niamała i navat «zapas utvaryŭsia», a taksama jak pracuje padraździaleńnie pa supraćdziejańni kibierzłačynstvam.
14 listapada kiraŭnictva MUS dakładvała Łukašenku pra stan apieratyŭnaj abstanoŭki ŭ Biełarusi i raźvićcio viedamstva.
Asnoŭnym dakładčykam byŭ ministr unutranych spraŭ Ivan Kubrakoŭ. U naradzie ŭdzielničali dziaržaŭny sakratar Rady biaśpieki Alaksandr Valfovič i namieśniki kiraŭnika MUS — Mikałaj Karpiankoŭ i Dźmitryj Karziuk.
Tady było anansavana stvareńnie ŭ MUS novych śpiecpadraździaleńniaŭ.
21 kastryčnika Łukašenka na ahulnavajskovym palihonie Abuz-Lasnoŭski ŭ Bresckaj vobłaści ahladaŭ ajčynnyja raspracoŭki vajenna-pramysłovaha kompleksu.
Palityku tady demanstravali biełaruskija bieśpiłotniki. Supravadžali jaho Ivan Kubrakoŭ i Viktar Chrenin.
«Vajna nam nie patrebnaja, ale da ŭsiaho treba być hatovym», — zajaviŭ na ahledzinach Łukašenka.
10 kastryčnika — narada pa pytańniach biaśpieki.
Na joj Łukašenka «pieraściaroh Ukrainu ad mahčymaha naniasieńnia ŭdaru pa Biełarusi».
«Krymski most im zdasca kvietačkami, kali tolki jany dakranucca svaimi brudnymi rukami choć da adnaho mietra našaj terytoryi», — zajaviŭ jon siłavikam.
4 kastryčnika Łukašenka sklikaŭ naradu pa pytańniach vajennaj biaśpieki, kab praanalizavać vajenna-palityčnuju abstanoŭku i vypracavać miery reahavańnia.
Na toj naradzie palityk upieršyniu publična pryznaŭ što Biełaruś biare ŭdzieł u «śpiecyjalnaj vajennaj apieracyi va Ukrainie». Jon vykarystaŭ hety prydumany ŭładami Rasii eŭfiemizm, kab nie kazać słova «vajna».
«Što tyčycca našaha ŭdziełu ŭ śpiecyjalnaj vajennaj apieracyi va Ukrainie, my ŭdzielničajem tam. My hetaha nie chavajem. Ale my nikoha nie zabivajem. My nikudy nie pasyłajem svaich vajskoŭcaŭ. My nie parušajem svaje abaviazki», — zajaviŭ jon.
20 vieraśnia Łukašenka sustreŭsia ź dziaržaŭnym sakratarom Rady biaśpieki Alaksandram Valfovičam.
Łukašenka zajaviŭ, što praź Biełaruś nijakaha ŭdaru ŭ śpinu pa rasijskich vojskach być nie pavinna i nie budzie. Jon pryznaŭ, što Biełaruś adčuvaje niehatyŭny efiekt ad zachodnich sankcyj z pryčyny adkrytaści svajoj ekanomiki.
«Nam nielha supakojvacca. My ŭ hetym katle. Nam spakojna žyć nie daduć. Nas uvieś čas buduć cisnuć pa ŭsich napramkach. A hetyja «śviadomyja» — heta vorahi», — kazaŭ palityk.
6 vieraśnia Łukašenka z kiraŭnikami siłavoha błoka pravioŭ naradu pa pytańniach udaskanaleńnia zakanadaŭstva ab hramadzianstvie i praviadzieńnia amnistyi.
Łukašenka zapatrabavaŭ ad MUS, kab jano razabrałasia z uładalnikami karty palaka, ci hramadzianie jany Biełarusi. Što da amnistyi, to jon zajaviŭ:
«My nie možam naleva i naprava adpuskać usich. Chto pavinien siadzieć u turmie, pavinien siadzieć. Ale jašče raz padkreślivaju, jość ludzi, jakich my svabodna možam vyzvalić daterminova. Pasłableńni dapuščalnyja tolki ŭ adnosinach da tych, chto realna hetaha zasłuhoŭvaje».
13 červienia Łukašenku dakładvali, jak udaskanalvajecca praca KDB.
Davali jamu spravazdaču kiraŭnik KDB Ivan Cierciel, a taksama kiraŭnik Administracyi Ihar Sierhiajenka dy dziaržaŭny sakratar Rady biaśpieki Alaksandr Valfovič.
«Treba ŭzmacniać dziejnaść niekatorych napramkaŭ. Niedzie, mahčyma, stvarać i novyja. Asabliva z pryčyny toj infarmacyjnaj biaśpieki, jakaja pavinna być u krainie, i toj hibrydnaj vajny, jakaja razhornutaja nie tolki suprać Biełarusi. Jana pa ŭsim śviecie ŭžo isnuje», — adznačaŭ Łukašenka.
29 maja — narada pa ŭdaskanaleńni infarmacyjnaj palityki.
«Amal treć stahodździa my budujem svaju dziaržavu, i ŭvieś čas sutykajemsia ź ideałahičnymi, infarmacyjnymi, vajennymi i psichałahičnymi pahrozami. My znachodzimsia faktyčna pad hetym presam z boku kalektyŭnaha Zachadu — Vašynhtona i jaho sajuźnikaŭ», — zajaŭlaŭ Łukašenka na naradzie, bolšaściu ŭdzielnikaŭ jakoj byli siłaviki.
26 maja — narada ŭ Ministerstvie abarony pa pytańniach zabieśpiačeńnia vajennaj biaśpieki.
Łukašenka zajaviŭ, što «mierapryjemstvy, jakija pravodziacca NATA vakoł miežaŭ Biełarusi, — heta raźviedka i asvajeńnie mahčymaha ŭ budučym teatra vajennych dziejańniaŭ».
Palityk rasparadziŭsia stvaryć Paŭdniovaje apieratyŭnaje kamandavańnie na ŭkrainskim kirunku.
«Na žal, adkryŭsia novy kirunak, jak u nas pryniata kazać, novy front, i my nie možam nie nadavać hetamu ŭvahi», — adznačyŭ jon.
10 maja — narada, pryśviečanaja dziaržabaronzakazu na 2022 hod.
Łukašenka tady zajaviŭ, što Biełaruś stvaraje anałah «Iskanderaŭ». Taksama jon patrabavaŭ ad vajskoŭcaŭ vyznačycca, jakaja vajna budzie ŭ Biełarusi, «kali nie daj boh», i jakaja zbroja patrebnaja.
19 krasavika na naradzie, pryśviečanaj pytańniam zabieśpiačeńnia zakonnaści i pravaparadku, Łukašenka zapatrabavaŭ ad pravaachoŭnaha błoka i orhanaŭ dziaržaŭnaha kiravańnia sistemnaj i ŭdumlivaj raboty.
«Vy što, zabylisia, što ŭ 2020 hodzie było? Ci tut try čverci ludziej siadziać, jakija rady tamu, što adbyłosia ŭ 2020 hodzie, i chočuć paŭtareńnia projdzienaha? Zapomnicie: hetaha nie atrymajecca. U mianie dastatkova sił i srodkaŭ i tych chłopcaŭ, jakija stanuć pobač, i my źniasiom hałavu lubomu, chto siońnia choča parušyć mir i spakoj u našaj krainie», — aburaŭsia na joj palityk.
A hienprakuror Švied narakaŭ na «vałakitu i biaździejańnie» pry rasśledavańni palityčnych spraŭ. Jon kazaŭ, što pa «ekstremisckich spravach» raskryvalnaść składaje mienš za pałovu.
10 sakavika — narada z kiraŭnictvam Ministerstva abarony ab vajennaj biaśpiecy krainy.
Alaksandr Łukašenka zajaviŭ, što raźviedka «znajšła va Ukrainie najmitaŭ, jakija pieramiaščajucca ŭzdoŭž biełaruskaj hranicy». Jon daručyŭ vajskoŭcam i pamiežnikam nie dapuścić parušeńnia dziaržaŭnaj miažy.
1 sakavika — narada z členami Rady biaśpieki i kiraŭnictvam urada.
Łukašenka na karcie pakazaŭ, ź jakoha boku nibyta źbiralisia atakavać Biełaruś, i raskazaŭ, jakija zadačy stajać pa ŭzmacnieńni achovy dziaržaŭnaj miažy na paŭdniovym i zachodnim napramkach.
«Adnačasova z abjavaj rašeńnia na praviadzieńnie apieracyi Rasijaj byŭ naniesieny papieradžalny ŭdar pa hetym ciažkim uzbrajeńni, pazicyjach, kab praduchilić svaje straty i ŭździejańnie na Biełaruś. Kali b hetaha nie zrabili, hetyja rakiety prylacieli b u Homiel i Mazyr», — zajaŭlaŭ jon.
24 lutaha, u dzień napadu Rasii na Ukrainu, Łukašenka sabraŭ naradu z vajskoŭcami.
Jon zajaviŭ: «Biełaruskija vojski nie biaruć nijakaha ŭdziełu ŭ rasijskaj śpiecapieracyi». Pry hetym jon uskłaŭ vinu za vajnu na Ukrainu i demanstravaŭ viernaść Rasii.
7 lutaha — narada pa ŭdaskanaleńni struktury sistemy MNS.
Udzielničali kiraŭnik viedamstva Vadzim Siniaŭski i dziaržaŭny sakratar Rady biaśpieki Alaksandr Valfovič.
Adnoj z tem narady było ŭzbrajeńnie častki supracoŭnikaŭ MNS.
«Usie supracoŭniki MNS, asabliva pry ciapierašnim ministru, chočuć być siłavym błokam. Siłaviki. My tak ich i ličym. Ale, dla taho kab być siłavikom, treba vydatna vałodać zbrojaj.
Jakoj? Pistalety, aŭtamaty, kulamioty, hranatamioty, abo my ich budziem uzbrojvać jašče i niejkaj technikaj? Dumaju, tak. I hety aktyŭ budzie, surjozny aktyŭ, i dapamoha dla našaha vojska na vypadak, kali raptam», — kazaŭ palityk.
21 studzienia — narada pa ŭmacavańni vajennaj biaśpieki Biełarusi.
«Z bolem u sercy my nazirajem usio toje, što robicca va Ukrainie. Jaje ciapierašniaje palityčnaje kiraŭnictva, znachodziačysia pad vonkavym kiravańniem, viadzie časam siabie niepradkazalna i nieadekvatna», — zajaŭlaŭ na joj Łukašenka.
I dadavaŭ, što miažu z Ukrainaj treba nadziejna abaranić «na vypadak niepradkazalnaści, nieadekvatnaści».
17 studzienia Łukašenku dakładali ab zadumie sumiesnaha apieratyŭnaha vučeńnia Uzbrojenych sił Biełarusi i Rasii.
«Ukraina praciahvaje naroščvać siły, zasiarodžvajučy padraździaleńni nacyjanalnaj hvardyi z «nacyjanalistaŭ-radykałaŭ». Heta jašče bolš mocna, čym nataŭskija vajskoŭcy», — zajaŭlaŭ palityk vajskoŭcam.
Usiaho za hod — 21 narada ź siłavym błokam.
Aproč hetaha, siłaviki časam prysutničali na mierapryjemstvach pa inšych pytańniach (naprykład, Kubrakoŭ byŭ na naradzie pa žnivie).
Za 2021 hod my naličyli 11 narad ź siłavikami i vajskoŭcami, u dva razy mienš.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Dziaržsakratar Rady biaśpieki Biełarusi prahnazuje pravakacyi z vykarystańniem zbroi na zachodniaj miažy
Cierciel raskazaŭ, adkul u Biełaruś rychtujucca ŭvieści vajskovyja kantynhienty
Chrenin: My ŭličym vopyt Rasii pa mabilizacyi i padkarektujem zakanadaŭstva
