Jak piša «Hajun», vierahodna, hienierały prybyli na aeradrom u Mačuliščach učora. Jany prainśpiektujuć chod sumiesnaj padrychtoŭki tak zvanaj rehijanalnaj hrupoŭki vojskaŭ na palihonach RB.
Paśla zasłuchoŭvańnia dakładaŭ ab stupieni hatoŭnaści rasijskaj častki hrupoŭki da vykanańnia zadač, hienierały ahledziać punkty kiravańnia, navučalnyja miescy i kazarmy vajskoŭcaŭ. Asobnaja ŭvaha budzie nadadziena pytańniam arhanizacyi zabieśpiačeńnia i ŭdaskanaleńniu bytavych umoŭ dla vajskoŭcaŭ.
Taksama płanujecca naviedvańnie zaniatkaŭ tankavych i motastrałkovych padraździaleńniaŭ, ramontna-adnaŭlenčych bataljonaŭ, aznajamleńnie z pracaj rasijska-biełaruskaha palavoha špitala. Akramia hetaha, Siarhiej Rudski paznajomicca z paradkam vykanańnia bajavych zadač padraździaleńniami US RB pa prykryćci dziaržaŭnaj miažy RB na paŭdniovym kirunku.
Jak piša «Hajun», heta pieršaja publičnaja inśpiekcyja načalnikaŭ z Maskvy rasijskaha kantynhientu ŭ Biełarusi.
Kanał vykazvaje mierkavańnie, što pa vynikach inśpiekcyi budzie zrobleny dakład kiraŭnictvu Minabarony RF, na padstavie jakoha buduć prymacca dalejšyja rašeńni adnosna rasijskaha kantynhientu ŭ RB.
Cikava, što Minabarony Biełarusi ŭ svaim telehram-kanale nie apublikavała pres-reliza pra vizit rasijskich hienierałaŭ.
«Hety fakt u tym liku pakazvaje ŭzrovień adnosin pamiž RB i RF u vajennaj śfiery. Niešta padobnaje było i padčas vučeńniaŭ «Sajuznaja rašučaść-2022», kali zvodki MA RB nie adpaviadali faktyčnamu znachodžańniu rasijskich vojskaŭ u RB. Tady vajskoŭcy US RF nie ličyli nieabchodnym infarmavać svaich biełaruskich kalehaŭ. Heta ž adbyvajecca i ciapier?» — piša «Biełaruski Hajun».
