Ilustracyjny zdymak
«Siońnia dastatkova vyniać u mahazinie telefon i navieści kamieru na ceńnik, kab tavaraznaviec prybieh z tłumačeńniami. Ryzykavać nichto nie choča. U minułuju niadzielu mianie, naprykład, navat supravadzili ŭ adździeł ź jajkami, kab pakazać, što marožanyja kuraniaty-brojlery znachodziacca mienavita tut. Uvieś zajaŭleny asartymient, pavodle słoŭ adkaznaha rabotnika, prysutničaje, a dziŭnaja łahistyka, dakładniej, łohika, tłumačycca tym, što heta profilny tavar. Kurania pa sutnaści — byłoje jajka, tolki ŭkormlenaje.
Jašče tydzień tamu pra takuju raskošu čałaviečych znosin pamiž pradaŭcom i pakupnikom možna było tolki maryć.
Zrazumieła, što piersanał luboj kramy jašče ź viečara minuŭłaha čaćviarha atrymaŭ vyrazny instruktaž na vypadak pravierak, buchhałteryja praviała niezvyčajnuju pracu pa adpaviednaści handlovych nadbavak normam zakanadaŭstva. Tamu siońnia šukać kampramat na palicach niama sensu», — piša karespandent.
Tamu, pavodle jaho, «zastajecca praciahvać fatahrafavać ceńniki i dzivicca». I znachodzić dzivosy.
Naprykład, u hipiermarkiecie słaniečnikavy alej, raźlity ŭ litrovyja butelki, kaštuje 5,99 rubla. Dakładna taki ž u tary pa 0,5 ł acenieny ŭ 3,34 rubla.
«Raźbiežka ŭ 69 kapiejek ź litra davoli istotnaja. Padkreślu: alej adnaho i taho ž vytvorcy», — robić vysnovu karespandent.
Dalej jon źviarnuŭ uvahu na sasiski.
«Ja ŭziaŭ na vahu šeść štuk svajho lubimaha hatunku. Pakupka abyšłasia ŭ 4,08 rubla. Kali b ja abraŭ užo fasavanyja vytvorcam, tyja ž paŭtuzina kaštavali b 4,25 rubla. Drobiaź, ale, uličvajučy šmatlikija tony sasisak, jakija vypuskajucca, vytvorca niadrenna zarablaje navat na pakavańni. Sam handal, tak i być, vydaje pakunki biaspłatna», — znachodzić novyja niedachopy žurnalist.
Pavodle jaho, navat fiermiery na kirmašy źnizili ceny. «U Malinaŭcy minułym razam bulbačka išła ŭ asnoŭnym pa 1 rubli za kiło, ciapier masavym koštam stali 90 kapiejek», — pišuć «Minsk-novosti».
