«Na zachadzie Łuhanskaj vobłaści ŭkrainskija vojski ŭstanavili kantrol nad Stalmachoŭkaj i Miasažaraŭkaj. Heta ŭžo na levym bierazie raki Žarabiec. Takim čynam, USU imknucca da trasy R-66, pa jakoj na hetym učastku zabiaśpiečvajecca rasijskaja hrupoŭka na apošniaj linii abarony pierad Svatavym. A praz hety nasieleny punkt prachodzić hałoŭny łahistyčny maršrut dla ŭsiaho kantynhientu Uzbrojenych Sił RF na Danbasie», — piša WarGonzo.
Inšy rasijski błohier, Ramanaŭ, pisaŭ pra stratu Stalmachoŭki dva dni nazad.
Zvyčajna WarGonzo paviedamlaje pra zdaču nasielenych punktaŭ tady, kali ŭkraincy prasunulisia ŭ nastupnyja za imi.
Pakul išła začystka vyzvalenaha Limana, pieradavyja ŭkrainskija vojski zamacavalisia ŭ Torskim, Ciornach i zaniali vakolicy Kramiannoj — horada, raźmieščanaha za 35 kiłamietraŭ na ŭschod ad Limana. Rasijskija vojski sprabujuć vystraić liniju abarony pa linii Kramiannaja — Svatava, ale, miarkujučy pa tonie rasijskich błohieraŭ, jany nie nadta raźličvajuć na pośpiech.
«Paŭstaje pytańnie ab utrymańni Kramiannoj — adnaho z klučavych punktaŭ, jakija zabiaśpiečvajuć paŭnočny fłanh abarony Lisičanska. Kramiannuju zdavać nielha ni ŭ jakim razie», — zaklikaje pałkoŭnik Hirkin.
Kramiannaja — horad, u jakim da vajny žyło 18 tysiač čałaviek. Ën staić na levym bierazie Sievierskaha Danca adrazu nad dalinaj raki. Ad jaho 30 km da Lisičanska. Kramiannuju rasijanie zaniali 18 krasavika.
Nahadajem, što 1 kastryčnika rasijskaje Minabarony pryznała stratu Limana. «U suviazi sa stvareńniem pahrozy akružeńnia sajuznyja vojski byli adviedzienyja z nasielenaha punkta Čyrvony Liman na bolš vyhadnyja rubiažy», — havorycca ŭ zajavie Maskvy.
Paŭnočniej ukraincy stvaryli šmatlikija płacdarmy na levym bierazie raki Askoł i nastupajuć ad Łazavoj, Kupianska dy Dvurečnaj.
Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.
Vyzvaleńnie Svatava mieła b jak stratehičnyja, tak i maralnyja nastupstvy. Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
