Antyvajenny nadpis na budynku meryi Vilni
Maksim Sakałoŭ piša, što «ŭ 90-je nie było nijakaha ruskaha impieryjalizmu, Maskva hatova była iści na ŭsio, ale prybałtaŭ heta tolki padbadziorvała i razharačała», nie ŭspaminajučy šturm Vilniuskaj televiežy i paliŭnuju błakadu Litvy.
«Renacyfikacyja byłych savieckich respublik pajšła pa narastajučaj», — śćviardžaje Sakałoŭ. Pad «nacyzmam» i «renacyfikacyjaj» u Rasii razumiejuć addaleńnie ad Rasii i budaŭnictva niezaležnych dziaržaŭ narodami, jakija niekali byli padparadkavanyja Rasijskaj Impieryjaj i SSSR.
Sakałoŭ pieraličvaje siońniašnija inicyjatyvy krain Bałtyi — błakada Kalininhrada (chłuślivaja infarmacyja, u sapraŭdnaści błakady niama), znos savieckich pomnikaŭ, vizavyja zabarony, prapanovy, kab rasijanie, jakija ŭjazdžajuć, «padpisvali papieru ab svaim poŭnym nieprymańni palityki RF» i hetak dalej.
«Vidavočna, i ciapier tam znoŭ vyrašyli, što pieramoha jeŭrarejcha — sprava vyrašanaja, i całkam razbeścilisia», — piša prapahandyst. Pad «jeŭrarejcham» aŭtar maje na ŭvazie Jeŭrasajuz i ZŠA.
Jon stavić pytańnie, «što rabić z Estlandyjaj, Kurlandyjaj, Liflandyjaj i inš. paśla pieramohi va ŭkrainskaj kampanii» — heta nazvy terytoryj krain Bałtyi ŭ Rasijskaj Impieryi.
Mierkavańnie Zachadu ŭžo nie maje nijakaha strymlivajučaha faktara, ale, pavodle jaho, jość inšy faktar strymlivańnia.
«Ruskamoŭnyja (de facto pa kultury i samaśviadomaści — ruskija ci impierskija) mienšaści. Kali Litva ŭ hetych adnosinach bolš adnastajnaja, ruskich tam kala piaci pracentaŭ, to ŭ Estonii — prykładna 30%, u Łatvii — kala 35%. Pryčym u vialikich haradach (Ryha, Vienstpiłs, Dźvinsk u Łatvii, Talin i Narva ŭ Estonii) ich dola jašče bolšaja. Tym samym lubyja miery, nakiravanyja suprać prybałtyjskich uradaŭ, bjuć pa suajčyńnikach, pryčym časta ŭ pieršuju čarhu pa suajčyńnikach».
Nibyta pytańnie, «što budzie z ruskimi?» — toje, što strymlivaje «haračyja hałovy», jakija «havorać ab nieabchodnaści poŭnaj błakady limitrofaŭ».
U suviazi z płanami rasijan spynić ekanamičnyja adnosiny z krainami Bałtyi, na paradak dnia vychodzić pytańnie ab repatryjacyi suajčyńnikaŭ z terytoryi limitrofaŭ u Rasiju, piša Sakałoŭ.
«Rana ci pozna, pryčym užo chutčej rana, čym pozna, inšaha vyjścia nie zastajecca».
Adnym z prykładaŭ «adnosna paśpiachovaj repatryjacyi» aŭtar pryvodzić sijaniscki ruch. Pavodle jaho, repatryjacyja tady nie ŭsich vabiła. Ale chto nie zachacieŭ pamianiać Niamieččynu na padjom z nula palestynskaj sielskaj haspadarki, u kancy 30-ch hadoŭ palestynski kibuc ujaŭlaŭ nie horšym varyjantam, ale było ŭžo pozna, pryvodzić anałohii aŭtar.
Jon pradkazvaje, što toje samaje moža być i zaraz. «Prybałty — kulturnaja nacyja. Možna jeździć u Jeŭropu pa «šenhienie». Dom i pobyt niejak naładžany. Kinuć usio heta i adpravicca ŭ nieviadomuju Ćmutarakań nie vielmi ciahnie», — pryvodzić aŭtar mahčymy varyjant mierkavańnia «suajčyńnikaŭ».
«Ale ž prahrama repatryjacyi — heta nie toje, kab usich siłkom ciahnuć na Śviatuju Ruś. Heta ŭsiaho tolki dać šaniec na viartańnie i ŭładkavańnie (z padjomnymi i inšym) usim, chto taho žadaje. Tym ža, chto nie žadaje, — chaj budzie tvaja vola. Ale chto adkaža rašučaj admovaj, pavinien razumieć, što z taho času Rasija zdymaje ź siabie abaviazacielstvy pa abaronie suajčyńnikaŭ u Prybałtycy. Chto nie schavaŭsia, ja nie vinavaty».
Paśla prahramy repatryacyi, «u znosinach ź limitrofami ruki buduć raźviazany».
«Žadajecie być za čartapałocham — što ž, budziecie za čartapałocham. Inšaha sposabu ŭładkavańnia adnosin z Estlandyjaj, Kurlandyjaj, etc. — kali, viadoma, nie paŭtarać 1940 hod, — nie prahladajecca», — piša jon.
Taki kirunak dumak na sajcie aficyjnaha rasijskaha ahienctva moža adlustroŭvać pravał sprob vykarystoŭvać rasiejcaŭ Bałtyi ŭ jakaści «piataj kałony».
Krainy Bałtyi pravodziać paśladoŭnuju palityku na ŭmacavańnie svajoj dziaržaŭnaści i abaronazdolnaści z aporaj na NATA. Jany taksama nadali značnuju vajskovuju dapamohu Ukrainie paśla napadu na jaje Rasii ŭ lutym 2022 hoda. Heta adbyvajecca na fonie stabilnaha ekanamičnaha rostu krain Bałtyi. Pa klučavym ekanamičnym pakazčyku — pamiery VUP na dušu nasielnictva — Estonija, Łatvija i Litva abahnali Hrecyju, a Estonija i Litva taksama i Partuhaliju, i zdahaniajuć Italiju.
