Skrynšot: videa BT
Što pakazvajuć u siužecie? U kadry — videa z kamier nazirańnia kala pasolstva Šviecyi ŭ Minsku. Pakazvajuć, jak 1 červienia da pasolstva prychodzić žančyna i pieradaje achoŭniku siniuju sumku z tryma dyvankami. Toj paśla chodzić ź joj pa dvary i addaje sumku ŭ padvał, u jakim, jak kažuć na BT, siadzieli Kuźniečyki. Paśla prychodzić ambasadarka Šviecyi Kryścina Juchaniensan. Paźniej pakazvajuć, jak jana pierastaŭlaje mašynu bližej da padvała.
«Biełaśniežka pieraparkoŭvaje mašynu», — hučyć hołas, jaki nibyta pieradaje hetu infarmacyju pa racyi.
Były namieśnik ambasadarki Rykardsan niekalki razoŭ spuskajecca ŭ padvał, paśla robić niejkija žesty rukami. Pakazvajuć, jak Rykardsan vynosić da mašyny vializny płakat.
«Spartsmien vychodzić z płakatam», — znoŭ pieradaje hołas pa racyi.
Za płakatam — Kuźniečyki. BT kaža, nibyta supracoŭniki orhanaŭ ich lohka vyličyli pa cieniach na asfalcie.
Paśla ŭ siužecie pakazvajuć, jak pieraśledujuć dypłamatyčnaje aŭto, jakoje nakiroŭvajecca da punktu propusku «Łoša» na biełaruska-litoŭskaj miažy. Tam aŭto było a 18-j hadzinie. Pamiežnik paprasiŭ ambasadarku adkryć zadnija dźviery i bahažnik dla nadhladu. Tam nikoha i ničoha nie było — siniaja sumka stajała biez dyvankoŭ.
U kancy źjaŭlajecca kadr ź pieraśledu.
«Pieršy» daŭ kamandu adpuskać, idziom na bazu, DAI zdymaju», — kaža niečy hołas u racyju.
Prapahandysty padajuć heta tak, nibyta ŭłady vyrašyli prosta adpuścić Kuźniečykaŭ, na jakich była zaviedziena kryminalnaja sprava pa artykule 364 KK (hvałt ci pahroza jaho prymianieńnia ŭ dačynieńnia da supracoŭnika ŭnutranych orhanaŭ).
«A navošta Kuźniečyki nam? Jak akazałasia, abuzaj jany byli dla šviedaŭ, nu a ciapier niachaj Łatvija nachodzić prymianieńnie čarhovym biehłym, jaduć jany šmat», — tłumačyć viadučaja.
Na praciahu siužetu jana to i sprava ździekliva vykazvajecca pra dypłamatyčnych rabotnikaŭ i Kuźniečykaŭ.
Ale siužet pakidaje jašče bolš pytańniaŭ. Naprykład, videa z kamier nazirańnia. Zvyčajna jany zapisvajuć karcinku biez huku, a kali z hukam, to było b łahična, kab heta byŭ huk z terytoryi pierad ambasadaj, a nie z budki, dzie siadzić supracoŭnik. Tym bolš zapisam bieź pieraškod.
Ci navošta praviarajuć dypłamatyčnuju mašynu Juchaniensan i zazirajuć u bahažnik, kali ŭžo vyrašyli adpuścić Kuźniečykaŭ?
Čamu videa apublikavali tolki praź miesiac paśla ŭciokaŭ?
Ale hałoŭnaje pytańnie, kali vieryć hetaj viersii: čamu ich adpuścili? Raniej ułady nie zadumvalisia pra ekanamičnuju niemetazhodnaść utrymańnia palitviaźniaŭ u turmach.
Kuźniečyki, jakija amal dva hady žyli ŭ pasolstvie Šviecyi, źbiehli z krainy
«Znajomy pisaŭ: idzi prasi prabačeńnia, prybiary svoj honar, a to siadziš u ambasadzie». Kuźniečyki, jakija ŭciakli ź Biełarusi, raskazali i pakazali, jak žyvuć ciapier
Pres-sakratar MZS: Historyja z uciokami Kuźniečykaŭ jašče nie skončanaja
