Historyja z sudovym pracesam nad uradžencam Biełarusi Antonam, jaki ŭ minułym hodzie padpaliŭ dźviery biełaruskaj ambasady ŭ Brusieli, skončyłasia adnosna dobra: zamiest drakonaŭskich 15-20 hadoŭ, jakija «śviacili» jamu pa bielhijskim zakanadaŭstvie, jon maje najbolš miakkaje pakarańnie — try hady ŭmoŭna. Pra heta sam biełarus raspavioŭ redakcyi.
Nahadajem, Anton, jaki pražyvaje ŭ Bielhii, u noč z 8 na 9 žniŭnia minułaha hoda padpaliŭ dźviery ambasady Biełarusi ŭ Brusieli — takim čynam jon chacieŭ pakazać, što «biełarusy za miažoj pamiatajuć pra falsifikavanyja vyniki prezidenckich vybaraŭ i trochi pryčynić škodu».
Z-za taho, što ŭ budynku znachodziŭsia achoŭnik (na ščaście, jon nie paciarpieŭ), biełarusa abvinavacili ŭ «padpale nočču budynka, u jakim znachodzilisia ludzi». Zhodna ź bielhijskim Kryminalnym kodeksam, za taki ŭčynak moža pahražać ad 15 da 20 hadoŭ źniavoleńnia.
Tym nie mienš sudździa, prakuror i advakat Antona, uličvajučy jaho stanoŭčyja charaktarystyki i źmiakčalnyja abstaviny, pryjšli da kampramisu — pryznać biełarusa vinavatym z admovaj ad vykanańnia pakarańnia ci ž u jakaści alternatyvy prysudzić hramadskija pracy.
Praŭda, paśla spravu ŭsio ž pieradali ŭ sud vyšejšaj instancyi. Adnak pry hetym z Antona źniali abmiežavańni na vyjezd ź Bielhii, i jon navat paśpieŭ źjeździć u Charkaŭ z humanitarnaj misijaj.
U vyniku sud vynies biełarusu najbolš miakki pa jaho artykule prysud — try hady ŭmoŭna. Mienavita takoje pakarańnie dla jaho zapytaŭ prakuror.
Jak raspavioŭ Anton, kalehija sudździaŭ paśla narady vyrašyła, što naohuł admovicca ad pakarańnia abo abmiežavacca hramadskimi pracami było b niezakonna.
— I sapraŭdy, miarkujučy pa miascovym KK, heta tak, — adznačyŭ jon.
Rabić vyklučeńnie dziela biełarusa taksama nie stali, kab nie stvarać precedent z ryzykaj, što kamu-niebudź zachočacca paŭtaryć jaho ŭčynak.
Pa słovach Antona, u dakumienty źviestki ab sudzimaści ŭsio ž uniasuć, ale praz try hady jaje možna budzie źniać.
