Kolki kaštujuć i jak vyhladajuć samyja darahija katedžy ŭ abłasnych centrach?

Brest. Ścieny, zašpaklavanyja pad špalery

Samy darahi katedž u stalicy pradajecca za 1,5 miljona dalaraŭ, u toj čas jak samy darahi dom Bresta acenieny «ŭsiaho» ŭ 799 000 dalaraŭ.

Stolki prosiać za hety hustoŭny dom u paŭnočnym pryharadzie Bresta z ahulnaj płoščaj 453 m².

Dom pabudavany ŭ 2014 hodzie, znachodzicca jon u ahraharadku Černi na ŭčastku ŭ 15 sotak. Niahledziačy na toje, što heta samaja darahaja prapanova ŭ Breście i rajonie, dom nie hatovy da zasialeńnia. Jak adznačana ŭ apisańni — ścieny zašpaklavanyja pad špalery, na padłozie lažyć parkiet.

Z całkam hatovych dla vykarystańnia pamiaškańniaŭ — tolki sanvuzły, jakich u domie try.

Aproč asnoŭnaha doma, na ŭčastku majecca haspadarčy kompleks ź letniaj kuchniaj, chleŭ i haraž. Na cokalnym paviersie — basiejn, saŭna, padsobnyja pamiaškańni.

«Moj dom — maja krepaść»

Druhi pa košcie dom u Breście pradajecca za 690 000 dalaraŭ. U adroźnieńnie ad papiaredniaha varyjanta, jaki znachodzicca za administracyjnymi miežami horada, hety dom raźmieščany ŭ samim Breście.

Ahulnaja płošča trochpaviarchovaha doma — 299 m², žyłaja — 144. Pamier učastka — 13 sotak.

«Dom byŭ stvorany dla taho, kab davać kamfort i ŭtulnaść jaho ŭładalniku. Moj dom — maja krepaść!» — tak ułaśnik apisvaje svoj katedž ź nievialikim staŭkom na ŭčastku.

Na nižnim uzroŭni doma znachodziacca haraž, łaźnia, basiejn, trenažornaja zała i zimovy sad. U domie piać spalnych pakojaŭ i try sanvuzły — pa adnym na kožnym paviersie.

Treci pa košcie dom u Breście acenieny ŭ 550 000 dalaraŭ, što značna tańniej za dva pieršyja. Ahułam u hetym abłasnym centry pradajecca 9 katedžaŭ pa cenach, vyšejšych za 500 tysiač dalaraŭ.

Viciebsk. Dom u centry z saleńniami ŭ padvale

Samy darahi dom Viciebska, acenieny ŭ 899 tysiač dalaraŭ, — katedž z ahulnyj płoščaj u 462 m², raźmieščany ŭ centry horada pobač z centralnaj płoščaj.

«U domie 5 spalniaŭ, kabiniet, try sanvuzły, sauna, sklep, padsobnyja pamiaškańni, haraž na 2 mašyny. Altanka dla adpačynku. Unutranaje azdableńnie doma — dub, vieniecyjanskaja tynkoŭka, kamin — naturalny kamień, lustry — kryštal. Dom abstalavany sihnalizacyjaj i videanahladam», — havorycca ŭ apisańni da abjekta.

Na ŭčastku šmat sadovych drevaŭ i 2 ciaplicy. Jakija, jak vyhladaje, vykarystoŭvajucca napoŭnicu. Całkam vierahodna, što pakupniki doma za 899 tysiač dalaraŭ mohuć raźličvać na bonus u vyhladzie saleńniaŭ.

Katedž z centralnym aciapleńniem

Druhi pa darahoŭli dom Viciebska kaštuje adrazu ŭ try razy tańniej. Za katedž na Kałhasnaj vulicy prosiać 300 000 dalaraŭ. Ahulnaja płošča doma — 430 m², žyłaja — 200, a voś učastak davoli maleńki — usiaho 6 sotak.

Na cokalnym uzroŭni znachodziacca: trenažornaja zała, harderobnaja, padsobnyja pamiaškańni, na pieršym paviersie — haścioŭnia, kuchnia-stałovaja, spalnia, na druhim mieściacca dva spalnyja pakoi i pracoŭny kabiniet.

Dom pradajecca razam z meblaj. Usie kamunikacyi ŭ domie, uklučajučy aciapleńnie, centralizavanyja.

Treci pa košcie katedž u Viciebsku acenieny ŭ 250 tysiač dalaraŭ.

Homiel. Dom z sosnami

Najdaražejšy katedž Homiela mieścicca ŭ sanatorna-kurortnaj zonie haradskoha pasiołka Čonki, što za 10 chvilin jazdy ad horada. Prosiać za dom z sosnami na ŭčastku 470 000 dalaraŭ.

Płošča asnoŭnaha doma 435 m², pamier učastka — 20 sotak. «Darahoje azdableńnie, dva kaminy, darahaja kuchnia, vialikaja terasa, u domie nie žyli, usio novaje», — havorycca ŭ apisańni.

U domie jość vialiki basiejn i chamam, całkam vykanany z marmuru.

Aproč asnoŭnaha pradajecca i letni dom, ale haspadar hatovy pradać i tolki adzin asnoŭny, cana pytańnia — 350 000 dalaraŭ.

«U domie jašče nichto nie žyŭ»

Druhi pa košcie dom Homiela pradajecca za 310 000 dalaraŭ. U adroźnieńnie ad pieršaha varyjanta katedž mieścicca ŭ miežach abłasnoha centra.

Ahulnaja płošča budynka 333 m², žyłaja — 124 m². Płošča ŭčastka amal 15 sotak.

Budynak novy i hatovy da žyćcia. U domie jašče nichto nie žyŭ. Na ŭčastku šmat nasadžeńniaŭ, jość i staryja drevy.

U domie majecca łaźnievy kompleks z basiejnam, zakrytaja altanka z manhalnym kompleksam, dva vielizarnyja haražy.

Treci pa košcie dom Homiela pradajecca pa canie 270 000 dalaraŭ.

Hrodna. Dom z kratami

Samy darahi dom u Hrodnie kaštuje roŭna 500 tysiač dalaraŭ. Stolki prosiać za dom z kavanymi kratami na voknach u mikrarajonie Baranavičy.

Ahulnaja płošča katedža — 385 m², žyłaja — amal 300 m². Dom staić na pryvatyzavanym učastku pamieram 14 sotak. Katedž hatovy dla žylla i pradajecca razam z meblaj i technikaj.

U domie jość łaźnia z zonaj adpačynku, dva dušy, tualet, prastornaja parnaja. Na mansardnym paviersie raźmieščanyja biehavaja ściežka i biljardny stoł.

Aproč asnoŭnaha doma na ŭčastku mieściacca haraž i dvuchpaviarchovy haściavy dom z kuchniaj i sanvuzłom.

50 sotak i haściavy dom na 150 m²

Druhi pa košcie dom u Hrodnie acenieny ŭ 455 tysiač dalaraŭ. Katedž mieścicca u vioscy Navumavičy, što za 10 chvilin jazdy ad horada na mašynie.

Katedž z ahulnaj płoščaj u 534 m² pradajecca razam z učastkam pamieram 50 sotak. Učastak z troch bakoŭ akružany lesam. Aproč asnoŭnaha doma, za hetyja hrošy vy atrymajecie zakansiervavany haściavy dom na 150 m².

Na cokalnym paviersie abstalavanyja trenažornaja zała, sauna z basiejnam i dušavoj, kacielnia i pralnia.

«Z terytoryi ŭčastka pabudavanaja leśvica z kamfortnym vychadam u les. Na ŭčastku jość nievialikaja sažałka, manhalnaja zona, miesca dla zachoŭvańnia sadovaha invientaru», — havorycca ŭ apisańni.

Treci pa košcie dom Hrodna pradajecca za 330 000 dalaraŭ.

Mahiloŭ. Dom z francuzskimi voknami

Vyhladaje, što katedžy ŭ Mahilovie kaštujuć mienš, čym u inšych abłasnych centrach. Samy darahi ź ich pradajecca «ŭsiaho» za 280 000 dalaraŭ.

Stolki prosiać za dvuchpaviarchovy katedž niepadalok ad lesu ŭ rajonie abłasnoj balnicy. Aproč asnoŭnaha doma płoščaj 275 m² na ŭčastku pamieram 15 sotak staić haściavy domik z adkrytaj terasaj, na jakoj jość cahlany manhał i pieč.

«Ramont vykanany z užyvańniem vysokajakasnych darahich materyjałaŭ. Francuzskija vokny. Harmaničnaja płaniroŭka. Dva sanvuzły. Harderobnaja. Padvał, haraž. Učastak z łandšaftnym dyzajnam i sistemaj paliva, pryvatnaja ŭłasnaść», — havorycca ŭ apisańni.

«Za domam znajšłosia miesca dla aharoda i dźviuch ciaplic»

Inšy dom u Mahilovie taksama acenieny ŭ 280 tysiač dalaraŭ.

Za hetyja hrošy prapanujecca całkam hatovy da pražyvańnia dom z meblaj 2006 hoda pabudovy. Ahulnaja płošča 302 m², žyłaja — 100 m².

Na cokalnym paviersie znachodziacca: pakoj dla adpačynku, basiejn ź niamieckaj sistemaj ačystki i padačy vady, sauna na drovach, duš, pralnia z sanvuzłom. Pa paviersie raźviedzienaja stereasistema, jakaja dazvalaje słuchać muzyku navat u saunie.

Na pieršym paviersie, aproč choła i sanvuzła, znachodzicca prastornaja stałovaja-haścioŭnia płoščaj 53 m².

Na druhim paviersie: 4 spalnyja pakoi i sanvuzieł. Na ŭčastku pamieram u 15 sotak vykanany łandšaftny dyzajn.

«Vysadžana mnostva roznych pładanosnych dreŭ i kustoŭ, ustalavanaja zakrytaja altanka z brusa z barbiekiu. Za domam znajšłosia miesca dla aharoda, dźviuch ciaplic i chlava», — havorycca ŭ apisańni.