Siabry i kalehi paeta raspaviali «Našaj Nivie», što ŭ Sierža (Siarhieja Myćko) zdaryŭsia hipiertaničny kryz, da jakoha pryviali kavidnyja ŭskładnieńni. Mužčynu było 53 hady.
«U Sierža byli prablemy sa straŭnikam, a voś kab z sercam — nie pamiataju», — kaža paet i litaraturaznaviec Viktar Žybul.
Sierž Minskievič. Fota: Fejsbuk
«Ja jaho nie paznaŭ, kali niadaŭna razmaŭlali — tak składana jamu było havaryć. Kazaŭ, što niekalki razoŭ chvareŭ na kavid i ŭsio nie moža adnavić zdaroŭje. Było adčuvańnie čałavieka paśla insultu», — adznačaje krytyk Cichan Čarniakievič.
Padobnyja ŭražańni ad apošniaj razmovy apisvaje i paet Źmicier Višnioŭ.
Raźvitańnie ź Sieržam Minskievičam adbudziecca 10 červienia ŭ 13.45 pa adrasie zavułak Kabuškina, 49, Dom smutku «Cyrymanijał» (uvachod z boku vulicy Kulašova).
U 1990-ja Minskievič byŭ adnym z arhanizataraŭ i aktyŭnych udzielnikaŭ litaraturna-mastackaha ruchu «Bum-Bam-Lit». Ën zrabiŭ poŭny pierakład «Dziadoŭ» Adama Mickieviča, «Krymskich sanietaŭ», abaraniŭ kandydackuju dysiertacyju pa tvorčaści kłasika. Taksama pierakładaŭ Słavackaha, Ivaškieviča, Hałčynskaha, Masłoŭskuju, Hierbierta, Mrožeka, i dziasiatki inšych aŭtaraŭ.
Ën pisaŭ fantastyku («Sad zamknionych hor») i knihi dla dziaciej («Pryhody Kakosa Marakosa»). U apošnija hady vystupaŭ jak litaraturaznaŭca.
