Viadučy Styvien Sakur pačaŭ z ahulnaha pytańnia: «Praz sto dzion z pačatku ŭzbrojenaha kanfliktu ci možacie vy skazać, što rasijskaje ŭvarvańnie va Ukrainu idzie pa płanie?»
«Mnie zdajecca, prahres jość, — nie źbiantežyŭsia Niabienzia. — Nichto nie abiacaŭ vyniku praz try dni abo praz tydzień. Ciapier niekatoryja ekśpierty zapeŭnivajuć, što rasijskaja vajennaja apieracyja zabuksavała i idzie značna pavolniej, čym płanavałasia. Ale prahres jość, jon praciahvajecca, i heta jasna jak božy dzień».
«Maštaby strat uražvajuć»
«Ci pryznajecie vy, što pieršapačatkovy płan zachopu Kijeva i ŭstalavańnia tam prarasijskaha režymu całkam pravaliŭsia?» — spytaŭ Styvien Sakur.
«Mnie pra takija płany ničoha nie viadoma», — zajaviŭ Niabienzia, adznačyŭšy, što nichto z rasijskaha kamandavańnia nikoli nie zajaŭlaŭ usłych pra toje, što Maskva mieła namier uziać pad kantrol Kijeŭ, ustalavaŭšy tam maryjanietkavy ŭrad.
Ukrainski bok zajaŭlaje, što rasijskaje vojska straciła na vajnie ŭžo 30 tysiač zabitymi, nahadaŭ viadučy, zaznačyŭšy, što niezaležna paćvierdzić hetyja ličby niemahčyma. Raźviedka ZŠA aceńvaje straty ŭ asabistym składzie rasijskaha vojska z pačatku vajny na ŭzroŭni kala 15 tysiač zahinułych, heta bolš, čym za 10 hadoŭ vajny ŭ Afhanistanie straciŭ Saviecki Sajuz.
«Maštaby vašych strat za apošnija sto dzion uražvajuć. Ludzi, jakija žyvuć u Rasii, byli b absalutna šakavanyja hetymi ličbami, kali b pra ich viedali», — adznačyŭ Sakur.
«Ja taksama nie mahu paćvierdzić ahučanyja straty, — zajaviŭ Niabienzia. — Jak ja ŭžo kazaŭ, aficyjna ich nie raskryvajuć, a padčas luboha kanfliktu baki schilnyja mocna zavyšać straty adzin adnaho. Ja nie mahu paviedamić vam ličby i ja nie mahu kamientavać, što tam Ukraina ci ZŠA kažuć z hetaj nahody».
Ale za sto dzion kanflikt faktyčna zajšoŭ u patavaje stanovišča, zaŭvažyŭ Sakur: «Vy tak i nie ŭziali Sievieradanieck. Vy nie možacie ŭziać całkam navat Łuhansk, nie kažučy ŭžo pra ŭvieś Danbas. Kali heta, pa vašamu, prahres, to mnie vielmi cikava: a ŭ čym, ułasna, naohuł składajecca płan?!»
Pa słovach rasijskaha pastajannaha pradstaŭnika, asnoŭnaja meta ciapier — vyzvaleńnie Danbasa. «Dajcie tolki čas, — paabiacaŭ Niabienzia. — I vy ŭbačycie Danieckuju i Łuhanskuju vobłaści vyzvalenymi. I, spadziavajusia, adbudziecca heta vielmi chutka».
Jašče ŭ sakaviku, nahadaŭ viadučy, rasijski MZS pahražaŭ, što pastaŭki Ukrainie ciažkich uzbrajeńniaŭ z ZŠA ci inšych krain NATO spravakujuć surjoznuju eskałacyju kanfliktu — mahčyma, da ŭzroŭniu jadziernaha supraćstajańnia. I voś — pastaŭki iduć, a vynikaŭ nie vidać.
U adkaz Niabienzia pryvioŭ cytatu nie nazvanaha im pa imieni pamočnika dziaržsakratara ZŠA pra toje, što Vašynhton nie choča eskałacyi kanfliktu, ale i Maskva nie budzie pakazvać amierykancam, kamu jany pavinny pastaŭlać svaju zbroju.
«Z druhoj častkaj ja b z radaściu pahadziŭsia, — zapeŭniŭ rasijski pasłańnik. — Ale nijak nie mahu pryniać pieršuju: heta vidavočnaja eskałacyja kanfliktu».
Ź jaho słoŭ, pieradača ŭkrainskim vajskovym artyleryi bolšaj dalokaści prymusić rasijskija vojski adsunuć ukraincaŭ na bolšuju adlehłaść, kab navat z novaj zbrojaj tyja nie mieli mahčymaści abstrelvać terytoryju Rasii ci Danbasa.
Chto čyniŭ źvierstvy va Ukrainie?
Rasijski dypłamat niekalki razoŭ zajaviŭ, što Zachad nastrojeny da Rasii praduziata, i navat zaŭvažyŭ viadučamu: «Toje, što vy nazyvajecie mižnarodnaj supolnaściu, znachodzicca ŭ tryźnieńni z nahody taho, što adbyvajecca va Ukrainie».
Ale ž rasijskija dziejańni va Ukrainie asudžaje nie tolki ŭmoŭny kalektyŭny Zachad, ale i pieravažnaja bolšaść inšych krain, nahadaŭ viadučy. U jakaści ilustracyi svajho śćviardžeńnia jon začytaŭ zaklik Viarchoŭnaha kamisara AAN pa pravach čałavieka Mišel Bačelet, u minułym prezidenta Čyli:
«Rasijskija ŭzbrojenyja siły abstrelvajuć i bambiać žyłyja rajony, zabivajučy mirnych žycharoŭ i rujnujučy balnicy, škoły i inšyja abjekty cyvilnaj infrastruktury. Hetyja dziejańni mohuć być pryraŭnianyja da vajennych złačynstvaŭ».
«My šmat čujem pra źvierstvy, jakija nibyta ździajśniajucca na terytoryi Ukrainy rasijskaj armijaj, — adkazaŭ rasijski dypłamat. — Hetyja zajavy nie byli paćvierdžanyja — prynamsi niezaležnych paćviardžeńniaŭ nie było. Kudy radziej vy raspaviadajecie pra tyja źvierstvy, jakija robiać ukrainskija vojski i nacyjanalisty ŭ Danbasie…»
U hety momant Styvien Sakur pierabiŭ Niabienziu: «Vam, mahčyma, viadoma, što ja braŭ intervju ŭ pradstaŭnikoŭ ukrainskich uładaŭ. I ja zadavaŭ im vielmi niazručnyja pytańni. Siońnia nadyšła čarha zadavać vielmi niazručnyja pytańni vam. Jak vy kažacie, hetyja abvinavačvańni abo śćviardžeńni, nie majuć niezaležnaha paćviardžeńnia. Dyk voś, vielmi navat majuć — i byli paćvierdžanyja».
«Ekśpierty AAN, jakija znachodziacca ŭ zonie vajennaha kanfliktu, paviedamlajuć pra sotni zahinułych va Ukrainie dziaciej. Niezaležnaja NKA Save the Children śćviardžaje, što va Ukrainie byli razburanyja abo paškodžanyja ŭžo 1800 škoł. My viedajem, napeŭna, pra amal 400 abjektaŭ ukrainskaj miedycynskaj infrastruktury, jakija atrymali paškodžańni abo całkam razburanyja pry artyleryjskich abstrełach i bambardziroŭkach».
U adkaz Niabienzia prapanavaŭ viadučamu padumać, ci mahčyma, što apisanyja razbureńni stali vynikam abstrełaŭ nie rasijskaj armii, a ŭkrainskaj, bajcy jakoj, pavodle jaho słoŭ, «ź pieršaha dnia zadziejničali vajennyja abjekty, uklučajučy braniatechniku i ciažkuju artyleryju ŭ rajonie žyłych kvartałaŭ i abjektaŭ sacyjalnaj infrastruktury: škoł, balnic i dziciačych sadoŭ».
«Jany praciahvajuć heta rabić da hetaha času, — zapeŭnivaje Niabienzia, — u Mikałajevie, Kramatorsku, Słaviansku i Adesie. Jany viaduć abstreł ułasnych žyłych kvartałaŭ, i ŭ jakaści paćviardžeńnia ŭ nas jość śviedčańni ŭkrainskich vajennapałonnych».
«Vy, pasoł, kažacie niapraŭdu»
«Vy, spadar pasoł, viadoma, pa roznych pryčynach možacie śćviardžać, što razbureńnie haradoŭ nakštałt Maryupala — sprava ruk ukrainskich vajskoŭcaŭ, jakija abstrelvajuć ułasnyja žyłyja kvartały. Ja dazvolu našaj aŭdytoryi samastojna zrabić vysnovu nakont taho, nakolki praŭdapadobna hučać takija śćviardžeńni», — adazvaŭsia viadučy. —
Mnie voś tolki cikava tady: a vy vierycie, što žančyn i dziaciej ukraincy taksama hvałciać sami — svaich ułasnych? Tamu što ekśpierty AAN zadakumientavali prynamsi tysiaču vypadkaŭ ździajśnieńnia rasijskimi vojskami žachlivych seksualnych złačynstvaŭ u dačynieńni da ŭkrainskich mirnych hramadzian».
«Ja vam pieraličvaju fakty ź miescaŭ, — nahadaŭ Sakur. — U tym vyhladzie, u jakim ich paviedamlajuć niezaležnyja ekśpierty AAN, jakija znachodziacca na miescach, u zonie ŭzbrojenaha kanfliktu. Vy možacie kolki zaŭhodna admaŭlać hetyja fakty, nazyvać ich fejkami, kazać, što AAN praduziataja i nieabjektyŭnaja ŭ dačynieńni da Rasii — my z vami tak možam praciahvać da samaha kanca intervju. Ale ja ab inšym — ja ab praŭdzie. I ab tym, nakolki vašaj praŭdzie možna vieryć».
Viadučy nahadaŭ, jak rasijskaha pasłańnika ŭ AAN złavili na chłuśni. Paśla taho, jak paśla abstrełu maryupalskaj radzilni Niabienzia na pasiadžeńni Hienasamblei razmachvaŭ dźviuma fatahrafijami ŭkrainskich žančyn, śćviardžajučy, što heta na samaj spravie adzin čałaviek, padstaŭnaja aktrysa, niezaležnaje rasśledavańnie dakazała, što heta roznyja žančyny: adna pamierła ŭ vyniku abstrełu, druhuju rasijskija vojski hvałtoŭna vyvieźli ŭ Danbas.
«Vy taksama zapeŭnivali, što ŭ vas jość śviedčańni pra nibyta isnujučy va Ukrainie zavod pa vytvorčaści bijałahičnaj zbroi. Navat u Rasii adzin ź viadučych ekśpiertaŭ u hetaj śfiery nazvaŭ pradstaŭlenyja vami dokazy absurdam, jaki nie maje sensu. Heta značyć, vy, pasoł, kažacie niapraŭdu».
Sakur nahadaŭ Niabienzi historyju inšaha rasijskaha dypłamata, Barysa Bondarava, jaki zvolniŭsia paśla pačatku vajny va Ukrainie z farmuloŭkaj «Nikoli nie było tak soramna za krainu».
«Vy ličycie, što i ja pavinien zrabić toje ž samaje?» — spytaŭ Niabienzia.
«Nie, mnie tolki cikava, ci nie znachodziać hetyja słovy niejkaha vodhuku ŭ vašaj dušy», — adkazaŭ viadučy.
Apošniaje pytańnie Sakura było pra dypłamatyčnuju i ekanamičnuju izalacyju Rasii, dziejańni jakoj va Ukrainie z usioj suśvietnaj supolnaści padtrymlivajuć na siońniašni dzień tolki Biełaruś, Paŭnočnaja Kareja, Siryja i Erytreja.
«Navat Kitaj, jaki, nibyta pavinien być vašym siabram, zajaviŭ, što terytaryjalnuju cełasnaść Ukrainy nieabchodna pavažać. U vas skončylisia siabry», — reziumavaŭ viadučy.
U adkaz Niabienzia zajaviŭ, što nie zhodny z takoj acenkaj i nie ŭpeŭnieny, što sproby suśvietnaj supolnaści izalavać Rasiju dasiahnuć pośpiechu.
«Pa-mojmu, Zachad damohsia niejkich taktyčnych pośpiechaŭ, ale stratehična jon prajhraje», — zajaviŭ rasijski dypłamat.
