Bai za «Azoŭstal» u Maryupali
Vajna, jakuju Rasija raźviazała suprać Ukrainy 24 lutaha, doŭžycca ŭžo bolš za try miesiacy. Niahledziačy na toje, što na mnohich napramkach nastup rasijskich vojskaŭ nie mieŭ pośpiechu, na pačatkovym etapie ŭvarvańnia za košt chutkaha prasoŭvańnia vojskaŭ z anieksavanaha Kryma Rasii ŭdałosia zachapić značnuju častku poŭdnia Ukrainy — amal usiu Chiersonskuju vobłaść, paŭdniovuju častku Zaparožskaj vobłaści i nievialikuju častku Mikałajeŭskaj. Rasiejskija vojski zaniali Chierson, Kachoŭku, Novuju Kachoŭku, Biardziansk, Mielitopal i Enierhadar.
Rasiejskija častki z anieksavanaha Kryma abjadnalisia z vojskami, jakija pravodzili nastupalnuju apieracyju ŭ Danbasie, kab sumiesna akružyć i bambić Maryupal u Danieckaj vobłaści. Paśla amal trochmiesiačnaj abarony horada ŭkrainskija vajskoŭcy pakinuli terytoryju «Azoŭstali», apošniaha ačaha ŭkrainskaha supracivu ŭ Maryupali.
Čamu Ukrainie nie ŭdałosia ŭtrymać paŭdniovyja rajony ŭ pačatku poŭnamaštabnaha ŭvarvańnia RF? Va ŭkrainskim abaronnym viedamstvie admovilisia kamientavać hetaje pytańnie. Tak, śpikier Minabarony Ukrainy Alaksandr Matuzianik skazaŭ karespandentu DW, što abmierkavańnie situacyi na poŭdni ŭ pieršyja dni ŭvarvańnia «vychodzić za miežy» jaho kampietencyi.
U toj ža čas načalnik hałoŭnaha ŭpraŭleńnia raźviedki Minabarony Ukrainy Kirył Budanaŭ u intervju «Ukrainskaj praŭdzie» ŭ adkaz na pytańnie ab tym, čamu Ukraina nie ŭtrymała Chiersonskuju vobłaść, zajaviŭ: «Pytańnie adkrytaje, jano budzie patrabavać hruntoŭnaha rasśledavańnia paśla zakančeńnia vajny».
«Płan abarony poŭdnia Ukrainy nie spracavaŭ»
Ukrainski žurnalist i vajskovy ekśpiert Juryj Butusaŭ pierakanany, što rasijskim vojskam udałosia chutka prasunucca z Kryma na macierykovuju častku Ukrainy praz toje, što «nie spracavaŭ płan abarony poŭdnia».
Razburany Maryupal
Pa słovach Butusava, tam nibyta nie pryniali nijakich zachadaŭ pa abaronie.
«My dakładna nie viedajem, čamu nie byli ŭzarvanyja masty na Čanhary, most u Chiersonie, raźviazki i masty ŭ Mielitopali, — skazaŭ jon u kamientary DW. — Praciŭnik biez usialakaha supracivu zajechaŭ u Mielitopal, jaki źjaŭlajecca klučavym dla kantrolu nad poŭdniem Ukrainy i tak zvanaha «suchaputnaha kalidora» ŭ Krym».
Taksama, pa źviestkach ekśpierta, «biez usialakich vajennych namahańniaŭ» rasijskija vojski ŭziali pad kantrol Biardziansk i akružyli Maryupal, kudy byli adpraŭlenyja asnoŭnyja ŭkrainskija reziervy.
«Połk» Azoŭ «byŭ nakiravany nie na prykryćcio Mielitopala, a byŭ adpraŭleny ŭ Maryupal — u samuju addalenuju kropku na poŭdni», — adznačyŭ jon.
Praliki ŭ abaronie
Na vialikuju kolkaść pralikaŭ u abaronie poŭdnia Ukrainy źviartaje ŭvahu i dyrektar vajennych prahram Centra Razumkova Mikałaj Sunhuroŭski. Jon, jak i Butusaŭ, adznačaje, što na poŭdni nie ŭzarvali masty i nie zadziejničali minnyja zaharody dla strymlivańnia rasijskaha nastupleńnia.
«Tam adbyłosia šmat usiaho pa niezrazumiełych pryčynach, i hetyja pryčyny treba vyśvietlić», — ličyć Sunhuroŭski.
Rasijskaja vajskovaja technika ŭjazdžaje ŭ Chierson. 1 sakavika 2022 hoda
Ekśpiert źviartaje ŭvahu na toje, što, niahledziačy na vajskovuju pieravahu Rasii na Čornym mory, z bujnych haradoŭ na poŭdni rasijskim vojskam udałosia zachapić tolki Chierson.
«Mikałajeŭ staić i abaraniajecca, Adesa staić i abaraniajecca, i nijakich pośpiechaŭ tam u rasijskich vojskaŭ niama. Tak, u Rasii jość pieravaha na Čornym mory, ale va Ukrainy na ŭzbrajeńni jość rakiety «Niaptun», jakija ŭžo paćvierdzili svaju efiektyŭnaść, jość taksama pierśpiektyvy atrymańnia i inšych rakiet. Za košt hetaha panavańnie Rasii na mory istotna abmiežavanaje», — ličyć jon.
Taksama, na dumku Sunhuroŭskaha, kali b rasijskija vojski nie zmahli «amal bieśpieraškodna» trapić na macierykovuju Ukrainu z Kryma, to dla ich «było b toje ž, što i pad Kijevam, kali nie horš».
Armija mirnaha času ŭ pačatku vajny
U toj ža čas ukrainski vajskovy ekśpiert Aleh Ždanaŭ u razmovie z DW vykazaŭ sumnieŭ u tym, što ŭ Ukrainy była mahčymaść u pačatku ŭvarvańnia RF utrymać asobnyja rajony poŭdnia.
«U pačatku ŭvarvańnia, kali vojski RF zachodzili va Ukrainu pa ŭsich napramkach, ukrainskija siły abarony akazvali nie taki mocny supraciŭ, jaki moh by spynić prasoŭvańnie vojskaŭ RF. Adzinaje, što my mahli vyjhrać — heta čas, kali rasijskaja armija pačała zachoplivać našu terytoryju», — ličyć jon.
Kijeŭ, 21 sakavika 2022 hoda
Taksama Ždanaŭ kaža pra toje, što ŭ pačatku ŭvarvańnia situacyja na poŭdni Ukrainy była padobnaja na situacyju na poŭnačy. «Dzie my pačali supraciŭlacca na poŭnačy? Užo pad Kijevam. Pieršyja broniehrupy ŭvarvalisia ŭ Kijeŭ i ich źniščali ŭžo na vulicach stalicy Ukrainy. Toje ž adbyłosia i na poŭdni: dzie my mahli bolš-mienš arhanizavana spynić nastup praciŭnika, tam my heta i zrabili, a da taho času rasijskija vojski prasoŭvalisia i zachoplivali terytoryju», — pierakanany jon.
Ekśpiert śćviardžaje, što niepasredna ŭ pačatku ŭvarvańnia va Ukrainy nie było ni sił, ni srodkaŭ, kab spynić rasijskija vojski. «Da pačatku vajny Ukraina nie razharnuła svaje ŭzbrojenyja siły. My sustrakali vajnu i pačynali bajavyja dziejańni armijaj mirnaha času. U nas mabilizacyja była abvieščanaja 24 lutaha ŭviečary, i adpaviednaje razhortvańnie siłaŭ abarony adbyłosia tolki ŭ pačatku sakavika. I tolki tady Ukraina ździajśniała bolš-mienš arhanizavany supraciŭ rasijskim vojskam», — dadaŭ jon.
«Rylca butelki» abo «drennaje miesca dla abarony»?
Adnak sam Pierakopski piaresmyk, jaki złučaje anieksavany Krym z macierykovaj častkaj Ukrainy, Ždanaŭ paraŭnaŭ z «rylcam butelki», jakoje možna było «zakarkavać i strymlivać». Pavodle jaho pierakanańnia, «pakolki rasijskija vojski na pačatkovym etapie zachodzili va Ukrainu kałonami, to dla ich možna było stvaryć ciažkaści ŭ prasoŭvańni praz administracyjnuju miažu z Krymam, u tym liku dystancyjna z dapamohaj artyleryi, a taksama za košt abstalavańnia doŭhačasovych ahniavych kropak pobač z darohaj».
U takim vypadku hety ŭčastak, na dumku Ždanava, ukrainskija siły mahli b utrymlivać.
U vajskovaha analityka, zasnavalnika rasśledvalnaj hrupy Conflict Intelligence Team (CIT) Rusłana Lavijeva — procilehły punkt hledžańnia. Jon u adnoj sa svaich niadaŭnich zvodak nazvaŭ Pierakopski piaresmyk «vielmi drennym miescam, kab abaraniacca». Pavodle jaho pierakanańnia, składanaść abarony tam zaklučajecca ŭ blizkaści raźmiaščeńnia rasijskich vajskovych bazaŭ.
«U cełym heta miesca vielmi vuzkaje, i Rasija moža lohka zabiaśpiečyć ščylnaść vojskaŭ na hetym kirunku, kab na adnu bataljonnuju taktyčnuju hrupu davodziłasia jak maha mienš linii frontu dla nastupleńnia», — miarkuje jon.
Pa słovach analityka, pakolki ŭsie vajskovyja bazy raźmieščanyja pobač z kanałam, vojski RF mahli dosyć chutka padvozić bojeprypasy dla artyleryi. Taksama ŭ hetym miescy rasijskaj avijacyi značna zručniej pracavać, bo lotać niedaloka, tamu samalotam nie treba vykarystoŭvać padviasnyja paliŭnyja baki i brać bolš snaradaŭ dla bambavańniaŭ.
Tamu, na dumku Lavijeva, kali b ukrainskaja abarona budavałasia, u pryvatnaści, na paŭvostravie Čanhar, heta było b «bujnamaštabnaj parazaj ukrainskich siłaŭ».
Pierachod Ukrainy ŭ kontrnastupleńnie ŭ lipieni-žniŭni?
U ciapierašni čas, pa słovach Ždanava, rasijskija vajskoŭcy pierachodziać da inžyniernaha ŭładkavańnia svaich pazicyj, u tym liku i na poŭdni Ukrainy. «Na asobnych kirunkach, takich jak Chiersonskaja vobłaść, vajskoŭcy RF rychtujuć užo niekalki ešałonaŭ abarony. Heta kaža ab tym, što RF źbirajecca ŭtrymlivać hetyja rubiažy i rychtujecca da zaciažnoj vajny», — dadaŭ jon.
Pavodle pierakanańnia apytanych DW vajskovych ekśpiertaŭ, ukrainskaja armija ŭžo hatovaja pierachodzić da aktyŭnaha kontrnastupleńnia, ale dla jaho efiektyŭnaści patrabujecca ciažkaje ŭzbrajeńnie ad mižnarodnych partnioraŭ.
Aleh Ždanaŭ dadaje, što ŭkrainskija siły abarony spadziajucca atrymać asnoŭnyja partyi ciažkaha ŭzbrajeńnia da kanca červienia, a pierachod u nastupleńnie moža adbycca ŭ lipieni abo žniŭni.
