«Ja źjechała ź Biełarusi ŭ sakaviku, budučy jašče supracoŭnicaj minskaj kampanii. Tolki 8 krasavika ja zvolniłasia i stała pracavać u polskim ofisie. A 16 maja baćki atrymali hety list na majo imia», — raskazvaje dziaŭčyna.
U liście havaryłasia, što jana trapiła ŭ śpis pracazdolnych hramadzian, nie zaniatych u ekanomicy, jakija vyjechali za miežy Biełarusi. Tamu kamunalnyja pasłuhi joj buduć naličvać pa poŭnych taryfach. Pry hetym ułaśnikam kvatery źjaŭlajecca baćka dziaŭčyny — piensijanier.
Kali dziaŭčyna patelefanavała pa numary, ukazanym u apaviaščeńni, joj skazali, što z baćkoŭ buduć brać pavyšanuju kamunałku, bo jana prapisanaja ŭ ich.
Zhodna z pastanovaj Saŭmina №166 ad 25 sakavika 2022 hoda ŭ śpis «darmajedaŭ» sapraŭdy ŭnosiać tych, chto źjechaŭ za miažu bolš čym na 30 dzion. Pry hetym uładkavanymi na pracu za miažoj ličacca tolki tyja, chto pracuje ŭ krainach JEAES — Rasii, Kazachstanie, Kyrhyzstanie i Armienii.
Praŭda, adjezd za miažu nie robić čałavieka płacielščykam «kamunałki» aŭtamatyčna. Imi ličacca ŭłaśnik pamiaškańnia, najmalnik, arandatar, lizinhaatrymalnik i člen arhanizacyi zabudoŭščykaŭ.
Kali dziaŭčyna padrychtavałasia da hutarki z čynoŭnikami i patelefanavała jašče raz, joj zajavili, što va ŭsim vinavaty Pamiežny kamitet. «Heta jany dasyłajuć śpisy, a sakratar unosić imiony ŭ rassyłku pa adrasach, jak ja razumieju, nie ŭnikajučy, ułaśnik ty ci nie. Ale horš za ŭsio, što hetaja rassyłka potym idzie ŭ raźlikova-daviedačny centr, i kali tam nie pravierać, što ja nie ŭłaśnik — vystaviać pa poŭnaj», — dzielicca jana padrabiaznaściami.
Ajcišnicy paraili pieratelefanavać 30 maja, kali sakratar vyjdzie z adpačynku, i jašče raz raskazać usio.
«Ale samy prykoł u tym, što ja była ŭklučanaja ŭ śpisy niezaniatych jašče za sakavik, choć zvolniłasia tolki 8 krasavika», — padkreślivaje dziaŭčyna.
