«U sieradu kala dziesiaci rabotnikaŭ Maładziečanskaha vytvorčaha ŭčastka AAT «Minski harmałzavod numar 1» (raniej — małočny kambinat) vyjšli za prachadnuju, kab sustrecca z kiraŭnictvam, — piša «Maładziečanskaja hazieta». — Tut ich čakaŭ miascovy błohier. Ludzi na kamieru kazali: «Niama pracy, niama zarobku, zastałosia 50 supracoŭnikaŭ, jak žyć dalej? Žadajem sustrecca z kiraŭnictvam… U hety ž dzień sustreča adbyłasia».
Pavodle rajonki, u vyniku akazałasia, što novaja prahrama pry naličeńni zarpłaty dała zboj. «Budzie praviedzieny pieraraźlik, i ludzi atrymajuć toje, što im naležyć».
Vydańnie nibyta parazmaŭlała z rabotnikami pradpryjemstva, jakija vychodzili za prachadnuju. Nijakich ich cytat aŭtar nie pryvodzić, a piša nastupnaje:
«Ludziam soramna. I ich možna zrazumieć. Jany stali «lalkami» u rukach umiełaha režysiora».
Pa viersii rajonki, z krasavika małočny kambinat uvajšoŭ u staličny chołdynh jak vytvorčy ŭčastak, jakim kiruje Lidzija Staŭrava. 10 traŭnia ludzi atrymali raźlikovyja listy. Niekatoryja rabotniki byli ździŭlenyja, što zarobak u ich nižejšy, čym u minułym miesiacy.
Ale błohieru Raścisłavu Čapurnovu supracoŭniki raspaviali, što rearhanizacyja na pradpryjemstvie adbyłasia ŭ lutym. I prablemy z zarobkam pačalisia ŭ lutym, a nie ŭčora.
Supracoŭnica pradpryjemstva pa imieni Maryja, jakaja ŭdzielničała ŭ stačcy, raskazała «Miedyjazonie», što raniej na kambinacie atrymlivali ŭ siarednim kala tysiačy rubloŭ, a «samy mizerny zarobak byŭ 660». Ciapier rabotniki atrymlivajuć pa 300—400 rubloŭ.
«Kali nas dałučyli da Minska ŭ lutym, skazali, što zarobki mienšymi nie buduć. Chto vinavaty ŭ hetaj situacyi — nichto nie viedaje. My atrymali zarobki i nie razumiejem, jak na ich žyć — heta prosta vielmi strašna», — raskazvała supracoŭnica.
