Siarhiej Kałacej razam z rasijskimi sałdatami padčas adsyłki pasyłki ŭ punkcie słužby dastaŭki ŭ Mazyry
U nas dastatkova dokazaŭ dla taho, kab padazravać hetuju asobu ŭ inkryminavanych joj złačynstvach. Dasudovaje rasśledavańnie praciahvajecca, — rastłumačyli ŭ pres-słužbie prakuratury Kijeŭskaj vobłaści. — Razhałošvańnie inšych źviestak, zhodna z art. 222 KPK Ukrainy, niemahčymaje, pakolki heta moža naškodzić śledstvu».
Jašče Zerkalo.io sprabavała ŭdakładnić u prakuratury Kijeŭskaj vobłaści, čamu, kali rasśledavańnie jašče praciahvajecca, imia padazravanaha było nazvanaje. Adkaz na pytańnie im paraili šukać u bryfinhu hienieralnaha prakurora Ukrainy Iryny Vieniedyktavaj, jaki prajšoŭ 4 traŭnia. Voś jak jana patłumačyła toje, što adbyłosia:
«My budziem ich pakazvać. Kali my razumiejem, što praviali ŭsie nieabchodnyja pracesualna-śledčyja dziejańni i ŭ nas jość usie zakonnyja i abhruntavanyja padstavy pačynać padazravać kankretnych rasijskich vajskoŭcaŭ, jakija tut zabivali, katavali, hvałtavali, my budziem abaviazkova apubličvać ich fota i źviestki, kab inšyja achviary, jakija, nie daj Boh, taksama byli ŭ ich łapach, mahli nam [pra heta] paviedamlać.
Heta z adnaho boku. A z druhoha, niachaj hetyja nieludzi i inšyja, jakija ciapier vajujuć u inšych častkach našaj krainy, viedajuć, što my kožnaha vyśvietlim, vinu kožnaha dakažam i budziem pryciahvać kožnaha da adkaznaści. Tamu što asnoŭnaje, što robić ich takimi žorstkimi, heta biespakaranaść. A biespakaranaści nie moža być u sučasnym śviecie».
Padčas pres-kanfierencyi hienieralnaha prakurora taksama paprasili prakamientavać situacyju z padazreńniem, jakoje było vystaŭlena ŭradžencu Mazyra.
«My vydatna razumieli, chto ŭ nas budzie hety padazravany, — adkazała Iryna Vieniedyktava. — My vielmi staranna da hetaha padychodzili. Tak, u jaho takoje hramadzianstva, što ž z hetym zrobiš. Ale, u pryncypie, heta ž nie pytańnie, chto ŭ vojsku krainy-ahresara, ź jakim hramadzianstvam vajuje. Heta pytańnie da krainy-ahresara. Da nas pytańnie, ci jość u nas dastatkova dokazaŭ, što hety čałaviek, źjaŭlajučysia vajskoŭcam Rasijskaj Fiederacyi, zabivaŭ (u nas jość zakonnyja i arhumientavanyja padstavy ličyć, što jon zabiŭ čatyroch čałaviek i katavaŭ jak minimum adnaho čałavieka).
U nas, dziakuj bohu, jość ludzi, jakija mohuć davać pakazańni. Tamu ŭ hetym vypadku hramadzianstva Biełarusi… Nu što ž, takoje taksama byvaje. Ale heta nie aznačaje, što my nie budziem praciahvać pryciahvać da adkaznaści».
Nahadajem, što hienieralny prakuror Ukrainy 2 traŭnia ahučyła imia pieršaha padazravanaha ŭ zabojstvach u Bučy — im akazaŭsia ŭradženiec Mazyra Siarhiej Kałacej. Sam jon admaŭlaje vinu, jak i toj fakt, što ŭ apošni čas naviedvaŭ Ukrainu. Pa słovach Kałaceja, jon maje tolki biełaruski pašpart i sam ciapier znachodzicca ŭ Biełarusi.
Čytajcie taksama:
Siarhiej Kałacej, abvinavačany ŭ złačynstvach u Bučy, patłumačyŭ situacyju ŭ Instagram
Pieršy abvinavačany ŭ zabojstvach u Bučy biełarus? Moža być pamyłka: hety čałaviek dvojčy sudzimy
Pieršy padazravany z Bučy — hramadzianin Biełarusi?
