Maładziečna. 9 žniŭnia 2020 hoda
Zhodna ź viersijaj abvinavačvańnia, 9 žniŭnia 2020 hoda Anton Drazdovič, Alaksandr Novaš, Rusłan Šapunoŭ i Volha Čarniak na «niesankcyjanavanym masavym mierapryjemstvie» ŭ Maładziečnie stali ŭ «sčepku», «vykrykvali łozunhi i kryčałki, hučna plaskali ŭ dałoni, z metaj ździajśnieńnia pravakacyjnych dziejańniaŭ, nakiravanych na abvastreńnie situacyi na płoščy, razharnuli pałotny bieła-čyrvona-biełaha koleraŭ. Dvoje ź ich nie tolki ŭdzielničali, ale i arhanizoŭvali padobnyja dziejańni, jakija hruba parušajuć hramadski paradak.
Pavodle materyjałaŭ spravy, 22-hadovaja Volha Čarniak 9 žniŭnia 2020 hoda ŭ viačerni čas, nakinuŭšy sabie na plečy razhornutaje pałatno bieła-čyrvona-biełaha koleru, a taksama jaje znajomy 30-hadovy Alaksandr Novaš, ruchalisia pa vulicy Prytyckaha ŭ bok płoščy Centralnaj u horadzie Maładziečna. Zaklikajučy na płoščy minakoŭ dałučycca da ich, jany nieśli z saboj niezarehistravanuju simvoliku, vykrykvali łozunhi. Paśla 23— i 24-hadovyja miascovyja žychary Anton Drazdovič i Rusłan Šapunoŭ dałučylisia da ich, i ŭsie paśla pryniali aktyŭny ŭdzieł u niesankcyjanavanym mitynhu.
Na sudzie ŭsie čaćviora pryznali vinu.
Sud prachodziŭ kala dvuch tydniaŭ. Prakurorka Julija Žuk zaprasiła ŭ suda dla ŭsich abvinavačanych maładziečancaŭ pakarańnie ŭ vyhladzie adnaho hoda i šaści miesiacaŭ kałonii. Sudździa Volha Dubovik vyniesła taki prysud trom chłopcam, a dziaŭčynie pryznačyła źniavoleńnie na paŭhoda mienšaje.
