Fota: AR
Zaraz dalar možna nabyć za 99 rubloŭ. Heta na 17% horšy kurs dla rasijskaj valuty, čym danyja pa stanie da rasijskaha ŭvarvańnia, ale našmat lepš, čym rekordny minimum pa stanie na 7 sakavika, kali za dalar davali 151 rubiel.
Kali nacyjanalnaja valuta raście, heta moža śviedčyć i pra rost nacyjanalnaj ekanomiki — ale tolki nie ŭ vypadku z Rasijaj. Chutčej, tam adbyłosia voś što: ruchi Centrabanka pa abmiežavańniu prodažu rubloŭ i stymulavańniu ich kupli spryjali rostu popytu na valutu, tłumačyć Wall Street Journal.
Rasija abmiežavała kolkaść dalaraŭ, jakija jaje rezidenty mohuć źniać z rachunkaŭ u zamiežnaj valucie, i zabaraniła bankam pradavać klijentam zamiežnuju valutu ŭ bližejšyja šeść miesiacaŭ. Takija miery zrabili bolš ciažkim prodaž rubla, što dapamahło źnizić jaho straty.
U zachodnich sankcyjach suprać Rasii jość vyklučeńnie — ekspart enierharesursaŭ, ad jakich Jeŭropa vielmi zaležyć. Hetaja halina dapamahaje zachoŭvać pastupleńnie dalaraŭ i jeŭra ŭ krainu. Rasija prymusiła hetych eksparcioraŭ pradavać 80% ich valutnaj vyručki i kuplać rubli, što znoŭ-taki spryjaje rostu rasijskaj valuty.
Robin Bruks, hałoŭny ekanamist Instytuta mižnarodnych finansaŭ, nie ličyć situacyju aptymistyčnaj dla Maskvy: «Było b ščyra skazać, što rubiel zaraz tarhujecca nie pa rynačnaj canie. Kali b byŭ svabodny ruch hrošaŭ u abodvuch kirunkach, my b bačyli našmat słabiejšy rubiel».
Čytajcie taksama: «Pry čym tut prablemy miru?» Deputat aryhinalna patłumačyŭ prysutnaść rasijskich vojskaŭ u Biełarusi
Uładzimir Pucin niadaŭna skazaŭ, što jon žadaje, kab jeŭrapiejskija krainy kuplali haz za rubli, a nie za dalary i jeŭra. Taki krok małavierahodny, ale, kali b hety namier Pucina spraŭdziŭsia, heta nakiravała b u advarotny bok ciapierašni ruch hrošaŭ i prymusiła b krainy, što ŭviali sankcyi suprać Rasii, padtrymlivać jaje ekanomiku.
Zaraz ciažka vyznačyć pa kursu rubla, u jakim stanie znachodzicca rasijskaja ekanomika. Sotni kampanij abviaścili ab svaim sychodzie z Rasii, što śviedčyć pra vierahodnaje chutkaje padzieńnie impartu. U toj ža čas Rasija praciahvaje pradavać svaju naftu, to bok ekspart i atrymanaja za jaho vyručka, chutčej za ŭsio, bolš čym kampiensirujuć stračanyja na imparcie hrošy.
Vysokaja cana nafty (bolš čym 100 dalaraŭ za baral) taksama spryjaje rostu rubla, ale heta nie značyć, što rasijskaja ekanomika robicca macniejšaj, bo jość šmat rečaŭ, jakija nielha kupić ci pradać. Bolš za toje, jeŭrapiejskija krainy abviaścili pra płany admovicca ŭ bližejšyja hady ad rasijskich enierharesursaŭ, što taksama vyklikaje doŭhaterminovaje asłableńnie rubla.
«Naša Niva» adnaŭlaje zbor danataŭ — padtrymać prosta
