Jak možna adpravić dekłaracyju
Padać padatkovuju dekłaracyju možna asabista ŭ padatkovaj, adpravić jaje pa pošcie z vopisam układańnia albo anłajn praz Asabisty kabiniet płacielščyka. Atrymać dostup da takoha kabinieta možna albo praz łahin i parol, jakija treba atrymać u padatkovaj, albo praz elektronny ličbavy podpis.
Jaki štraf pahražaje, kali «zabycca» pra dekłaracyju
Kali praterminavaŭ padaču dekłaracyi, to možna atrymać štraf — 2 bazavyja vieličyni (u hetym hodzie — 64 rubli). Za kožny miesiac praterminoŭki jon pavialičvajecca na 0,5 bazavaj, ale ŭ ahulnaj sumie nie moža pieravysić 10 bazavych (320 rubloŭ). Ale tut jość niuans. Kali vam naličyli padatak da vypłaty, to praterminoŭka pavinna pieravyšać 3 dni, kab vypisali štraf. Taksama pryjdziecca zapłacić tym, chto na 12 miesiacaŭ spoźnicca z padačaj dekłaracyi, ale jamu pa fakcie nie vystaviać padatak dla vypłaty.
Kamu treba padavać dekłaracyju
U Ministerstvie pa padatkach i zborach pieraličvajuć tych, kamu treba padavać dekłaracyju za minuły hod.
— Tyja, chto ŭ 2021 hodzie pradaŭ transpartny srodak (pačynajučy z druhoha aŭtamabila).
— Tyja, chto za apošnija piać hadoŭ (z 2017-ha pa 2021 hod) pradaŭ bolš za adnu kvateru, žyły dom, daču, sadovy domik, haraž, mašyna-miesca, ziamielny ŭčastak, niezavieršany kapitalny budynak na ziamielnym učastku, a taksama doli na vyšejpakazanaj majomaści. Padavać padatkovuju dekłaracyju i płacić padatak treba ŭ tym vypadku, kali vy pradali dva abjekty nieruchomaści adnaho typu — naprykład, dźvie kvatery ci dźvie dačy. Kali vy pradali roznyja abjekty nieruchomaści (naprykład, kvateru i daču), płacić padatak nie treba.
— Tyja, chto ŭ 2021 hodzie pradaŭ adzin i bolš abjekt nieruchomaści, jakija nie adnosiacca da pieraličanych vyšej. Heta mohuć być, naprykład, handlovyja, ofisnyja, administracyjnyja pamiaškańni.
— Tyja, chto ŭ 2021 hodzie atrymaŭ u padarunak sumu bolš 7521 rubla (u sumie ad usich krynic na praciahu hoda). Vyklučeńnie-hrašovyja padarunki ad blizkich svajakoŭ i blizkich svajakoŭ z boku muža/žonki. Hrašovyja padarunki ad ich nie abkładajucca padatkam niezaležna ad sumy.
— Tyja, chto ŭ 2021 hodzie atrymaŭ dachod za miažoj abo z-za miažy. Chto na praciahu hoda pravioŭ za miežami Biełarusi 183 ci bolš dnia, nie ličycca jaje padatkovymi rezidentami i dekłaracyju padavać nie pavinny.
