Fota z sacsietak
Pra danosy stała viadoma paśla ŭzłomu milicejskich baz. U pryvatnaści, u listapadzie 2020-ha Viera Lavonik-Šylajeva paviedamiła, što «5 čałaviek viešajuć BČB-ściah pamiž damami».
U svaim fejsbuku jana vykazała svoj pohlad na situacyju:
«Što realna było i čaho nie było. Byŭ zvanok. Adzin. Nie dva, nie try. U «čornaj knizie» čamuści ŭkazana try. Dva razy ja vyklikała chutkuju dla pjanaha chłopca (u 103 tady nie adkazvali, u 102 taksama nie adkazali), jakoha ranicaj vyjaviła pad padjezdam (jość śviedka). A muž telefanavaŭ adnojčy ŭ DAI, kali chtości pieraharadziŭ vyjezd z dvara. Usio. Fakt — adzin zvanok. Adzin. Bolš ničoha nie było i być nie mahło.
Jak heta było.
Bolšuju častku padziej siaredziny 2020 hoda my pieražyvali ŭ vioscy z dvuma maleńkimi dziećmi (pandemija, samaizalacyja). Nas nie było ŭ horadzie, i pra toje, što adbyvajecca ŭ našym žyłym kompleksie my daviedvalisia jak i ŭsie praz čaty, naviny.
Viarnulisia ŭ horad, usie byli na niervach. Usie heta pamiatajuć. Było strašna vyjści na vulicu.
Ja ŭsie dni vielmi pieražyvała za svajho muža i svaich rodnych, jakich mahli zatrymać za ich pohlady, dy i prosta tak — biez usialakaj padstavy (jak heta časta adbyvałasia ŭ toj čas). Na fonie paślarodavaj depresii ja ŭbačyła pahrozu ŭ tym, što pobač sa mnoj i maim dziciem na dziciačaj placoŭcy chłopcy sprabavali naciahnuć ściah. Pabajałasia, što traplu na kamiery, padumajuć, što ja taksama ŭ hetym udzielničała, mianie zatrymajuć, traplu na Akreścina, zastanusia bieź dziaciej… Heta było adzinym matyvam na toj momant — pakazać, što ja ŭ hetym nie ŭdzielničaju. Tak, ja tysiaču razoŭ dakarała siabie za heta. Ale ni źmianić, ni pierakreślić hetaha nielha.
Ź pieršaj chviliny, kali moj muž daviedaŭsia ab zvanku, žyćcio majoj siamji źmianiłasia. Dla jaho było vielmi składana pryniać moj učynak. Muž, prytrymlivajučysia svajoj hramadzianskaj pazicyi, ŭdzielničaŭ u pahašeńni štrafaŭ našamu tavarystvu za pratesnuju aktyŭnaść.
Abvinavačvańni, jakija byli paznačany ŭ pieršapačatkovym paście ŭ telehram-kanale, nie adlustroŭvali i nie adlustroŭvajuć ni našu pazicyju, ni našy pohlady.
Ja nie kryvažerny čałaviek i vybačyć siabie za hety ŭčynak tak i nie zmahła.
Usie, chto pisaŭ praklony mnie i majmu mužu — vy majecie prava na hnieŭ, na ŭsie emocyi. My razumiejem i prymajem emocyi, jakija my pačuli ŭ svoj adras za apošnija dni. Razumiejem, praz što mnohija prajšli i praz što prachodziać ciapier. I paviercie, my, jak i ŭsie vy, nie chočam, kab heta praciahvałasia», — napisała Viera Lavonik-Šylajeva.
Čytajcie taksama:
Prahramistka daniesła ŭ 2020-m na susiedziaŭ za BČB-ściah, a ciapier sama ŭciakła ŭ Litvu. Dyjaspara choča dabicca jaje departacyi ź ES
