Haryć rasijskaja technika ŭ aeraporcie Chiersona. Fota z drona: Hienštab Ukrainy.
Rasijskija vojski za apošnija sutki nie prasunulisia ni na adnym z kirunkaŭ. U toj ža čas ukrainskaja armija kontratakavała pad Kijevam, dzie ceły dzień upartyja pierastrełki išli ŭ rajonach Irpienia, Bučy i Hastomiela. Videazapisy pakazvajuć taksama nastupstvy paśpiachovaha ŭdaru pa aeraporcie Chiersona, dzie była skancentravanaja rasijskaja technika. Tam było źniščana niekalki dziasiatkaŭ viertalotaŭ i mašyn.
Akramia taho, ukraincy vyzvalili z pałonu mera Mielitopala. Ukrainskija ŭłady apublikavali videa radasnaj razmovy prezidenta Zialenskaha ź im.
U toj ža čas rasijskija vojski praciahvali bambić harady. Rakietnyja ŭdary byli naniesienyja pa Charkavie, Kijevie, Vińnicy, navakollach Adesy. Samy strašny pryjšoŭsia pa Maryupali. Tam bomba ci rakieta vialikaj mahutnaści trapiła ŭ haradski teatr, jaki słužyŭ bombaschoviščam sotniam mirnych žycharoŭ. Budynak ruchnuŭ, zavaliŭ uvachody ŭ bambaschovišča. Mahčyma, tam adbyłasia samaja žachlivaja trahiedyja hetaj vajny.
Što hetamu papiaredničała
Mer Kijeva u aŭtorak zajaviŭ, što ŭvodzić kamiendanckuju hadzinu na 36 hadzin i što stalica sutyknułasia z «ciažkim i niebiaśpiečnym momantam». U aŭtorak ciažkija abstreły i pierastrełki znoŭ skałanali horad.
U vakolicach Kijeva zahinuli dvoje žurnalistaŭ, jakija pracavali na Fox News, jašče adzin karespandent byŭ paranieny ŭ vyniku abstrełu ich mašyny kala rasijskich pazicyj. Apieratar Fox News Pjer Zakžeŭski i kansultant Alaksandra Kuŭšynava viali repartažy razam z karespandentam pa zamiežnych spravach Biendžaminam Chołam, kali ich aŭtamabil trapiŭ pad abstreł. Choł byŭ špitalizavany, vyratavać jaho kalehaŭ nie ŭdałosia.
Rasijskija vojski ŭnačy vypuścili dźvie rakiety pa aeraporcie ŭ Dniapry, jakija źniščyli ŭźlotna-pasadačnuju pałasu i paškodzili terminał.
U paniadziełak pozna ŭviečary praz abstreł Charkava paškodžany skład i žyłyja damy ŭ Chaładnahorskim rajonie.
Rakieta źniščyła budynak ŭ centry Kijeva, jaki naležaŭ pradpryjemstvu VPK, i vybiła vokny z budynkaŭ u radyusie adnaho kvartała. Taksama paciarpieli dva žyłyja damy, adzin ź ich zahareŭsia.
Nie mienš za dvoje žycharoŭ zahinuli, a dziasiatki byli dastaŭlenyja ŭ susiedniuju balnicu ŭ vyniku atručvańnia dymam. Ułady śćviardžajuć, što na pradpryjemstvie VPK nichto nie zahinuŭ.
Zamiežnaja dypłamatyja ŭ dapamohu Ukrainie
Bieły dom zajaviŭ u aŭtorak, što prezident Bajden nakirujecca ŭ Brusiel 24 sakavika dla sustreč ź lidarami sajuźnikaŭ. Zachad imkniecca ŭzmacnić cisk na Maskvu i pry hetym paźbiehnuć pramoha vajennaha kanfliktu pamiž krainami NATA i Rasijaj.
Amierykanski prezident Bajden padpisaŭ u aŭtorak zakonaprajekt ab dziaržaŭnych vydatkach, jaki ŭklučaje 13,6 miljardaŭ dołaraŭ na zbroju, a taksama humanitarnuju i ekanamičnuju dapamohu dla Ukrainy. U sieradu, kali prezident Zialenski vystupiŭ pierad Kanhresam ZŠA, prezident Bajden abvieściŭ ab pieradačy Ukrainie ciaham tydnia zbroi bolš jak na 1 miljard dołaraŭ.
U aŭtorak delehacyja lideraŭ Centralnaj Jeŭropy ŭpieršyniu naviedała Kijeŭ — usie z krain NATA, — i paabiacała Ukrainie maksimalna šyrokuju padtrymku. Premjer-ministr Polščy Matevuš Maraviecki i vice-premjer Jarasłaŭ Kačyński, premjer-ministr Čechii Piotr Fijała i premjer-ministr Słavienii Janez Janša sustrelisia z prezidentam Zialenskim i premjer-ministram Šmyhalem u jakaści pradstaŭnikoŭ Jeŭrapiejskaj rady. Delehacyja prybyła ŭ Kijeŭ na ciahniku.
«Ja ŭpeŭnieny, što z takimi siabrami, z takimi krainami, z takimi susiedziami i partniorami my sapraŭdy zmožam pieramahčy», — skazaŭ Zialenski žurnalistam paśla sustrečy. Jon dadaŭ, što hutarki byli pryśviečany harantyjam biaśpieki Ukrainy, uzmacnieńniu sankcyj suprać Rasii, a taksama pierśpiektyvam siabroŭstva Ukrainy ŭ Jeŭrasajuzie.
U pramovie pierad Kanhresam ZŠA ŭ sieradu, jak i pierad parłamientam Kanady ŭ aŭtorak Zialenski emacyjna prasiŭ pavialičyć vajennuju padtrymku i dapamahčy ŭvieści biespalotnuju zonu nad jaho krainaj, kab spynić rasijskija bambiožki. Jon paviedamiŭ kanadskim zakanadaŭcam, što 97 dziaciej zahinuli z taho času, jak rasiejskija vajskoŭcy pačali avijaŭdary pa Ŭkrainie.
«Kali łaska, zakryjcie nieba», — paŭtaraŭ jon. «Vam usim treba zrabić bolš, kab spynić Rasiju, abaranić Ukrainu i abaranić Jeŭropu. Jany ŭsio źniščajuć».
NATA praciahvaje adchilać zapyty ab stvareńni biespalotnaj zony i tłumačyć heta tym, što takim čynam Zachad ryzykuje ŭciahnucca ŭ vajnu z Rasijaj.
Abmien sankcyjami
Jeŭrasajuz i Vialikabrytanija damovilisia ab asobnych pakietach novych sankcyj i abmiežavańniaŭ, nakiravanych na Rasiju. Za dzień da hetaha ZŠA dadali śpis słužbovych asob Minabarony Rasii ŭ svoj ułasny śpis metaŭ, pakolki ŭsie troje imknucca ŭzmacnić cisk na prezidenta Rasii Uładzimira Pucina.
Maskva ŭ aŭtorak uviała sankcyi suprać Bajdena i niekalkich vyšejšych čynoŭnikaŭ ZŠA, u tym liku dziaržsakratara Entani Blinkiena, ministra abarony Łojda Ościna, dyrektara Centralnaha raźviedvalnaha ŭpraŭleńnia Uiljama Biernsa i pres-sakratara Biełaha doma Džen Psaki, nakiravanyja na abmiežavańnie ich pajezdak u Rasiju. Ministerstva zamiežnych spraŭ Rasii zajaviła, što abmiežavańni stali adkazam na «biesprecedentnyja sankcyi», jakija pieraškadžajuć rasijskim čynoŭnikam ujazdžać u ZŠA.
Psaki zajaviła ŭ aŭtorak, što rasijskija sankcyi nie buduć mieć vialikaha ŭpłyvu na tych, suprać kaho jany nakiravanyja. «Nichto z nas nie płanuje turystyčnyja pajezdki ŭ Rasiju, i nichto z nas nie maje bankaŭskich rachunkaŭ, da jakich my nie zmožam atrymać dostup», — skazała jana.
Tym časam intensifikavalisia pieramovy miž Rasijaj i Ukrainaj.
Pamočnik Kramla Uładzimir Miadzinski, jaki ŭznačalvaje rasijskuju delehacyju na pieramovach, zajaviŭ, što pieramovy z ukrainskim bokam buduć praciahvacca «kožny dzień, siem dzion na tydzień» u režymie videakanfierencyi.
U ŚMI źjavilisia i detali mahčymaha kampramisu. Zdajecca, Maskva idzie na ŭsio novyja sastupki, paśla taho jak jaje nastup zachłynuŭsia.
Stanovišča na froncie
Za try tydni vajny Rasija zachapiła značnuju terytoryju na poŭdni Ukrainy, ale nie zdoleła ŭziać ani Kijeŭ, ani Charkaŭ, ani Sumy, ani Čarnihaŭ, ani stratehična važny port Mikałajeŭ. Sutyknuŭšysia z upartym supracivam, jana pierajšła da bambiožak žyłych rajonaŭ i hramadzianskaj infrastruktury, kab złamać duch ukraincaŭ. Kolkaść zahinułych u vyniku rakietnaha abstrełu horada Roŭna na zachadzie krainy ŭ paniadziełak vyrasła da 19.
Uzbrajeńnie, pastaŭlenaje Ukrainie ZŠA i ich jeŭrapiejskimi sajuźnikami, asabliva supraćtankavaje i zienitnaje, adyhrała važnuju rolu ŭ strymańni prasoŭvańnia rasijskich suchaputnych vojskaŭ, jakija panieśli vialikija straty na poŭnačy, kali sprabavali akružyć Kijeŭ.
U aŭtorak prezident Zialenski zaklikaŭ rasijskija vojski skłaści zbroju. «Kali vy zdajaciesia našym siłam, my budziem stavicca da vas tak, jak pavinny stavicca da ludziej. Jak ludzi, prystojna. U vašaj armii da vas u peŭnym sensie tak nie stavilisia», — skazaŭ jon. Jon padziakavaŭ tym rasijanam, jakija pratestujuć suprać vajny.
Ministerstva abarony Rasii ŭ aŭtorak zajaviła, što jaje vojski zachapili «aporny punkt nacyjanalistaŭ i zamiežnych najmitaŭ» na poŭnač ad Kijeva, zdabyŭšy 10 rakietnych kompleksaŭ Javelin i inšuju zbroju, pastaŭlenuju zachodnimi krainami va Ŭkrainu.
Humanitarnaja katastrofa
Ułady Ukrainy papiaredžvajuć, što straty siarod mirnaha nasielnictva rezka rastuć tam, dzie bai pieranosiacca z pryharadaŭ u centry haradoŭ.
Naprykład, mirnyja žychary horada Izium u Charkaŭskaj vobłaści znachodziacca ŭ pastcy biez vady i ježy, tamu što rasijskija vojski kantralujuć darohu, jakaja viadzie na poŭnač da Charkava, i abstrelvajuć darohu, jakaja idzie na poŭdzień.
Pavodle danych AAN, kolkaść uciekačoŭ z Ukrainy, jakija vyjechali ŭ krainy Jeŭrasajuza i Małdovu, składaje na siońnia prykładna try miljony čałaviek. U Biełaruś vyjechali kala 600 čałaviek.
«Kolki ŭžo možna płakać?» Biełaruskija vałanciorki, jakija dapamahajuć ukraincam, raspaviali svaje historyi
Kudy źnikaje biełaruskaja muka?
