Biežanka na ŭkrainska-małdaŭskaj miažy. Fota: AR.
Uciekačy raskazvajuć historyi pra hałodnych i nietreniravanych rasijskich sałdat, jakija stralajuć u biazzbrojnych ludziej, uzłomy ŭ mahazinach i rejdy pa chatach u pošukach ježy i kaštoŭnych rečaŭ, bo sami akupanty majuć vialikija prablemy z pastaŭkami, piša Wall Street Journal.
64-hadovaja Valancina Chodas ź vioski Mirnaje niekalki dzion chavałasia ŭ sklepie z dačkoj i ŭnukam, pakul rasijskija sałdaty abšukvali dom za domam. Žančyna raskazvaje pra heta tak: «Jany prosta nachabna zachodziać, biez anijakaha soramu, i biaruć usio, što žadajuć».
Valancina kaža, što dva jaje susieda, jakija vadzili mašynu z ukrainskim ściaham, byli na minułym tydni zastrelenyja rasijskim patrulom. Ich cieły nichto nie prybraŭ.
Tym časam Maskva śćviardžaje, što jana nie płaniruje akupiravać Ukrainu — chutčej, Kreml žadaje jaje «vyzvalić». Rasijski režym kaža, nibyta jon nanosić udary tolki pa vajennych celach, a lubyja achviary siarod mirnych ludziej — vina tak zvanych nacyjanalistaŭ i ekstremistaŭ.
Žančyna vybiraje sabie adzieńnie ŭ centry dla biežancaŭ, Zaparožža. Fota: Wall Street Journal.
U sprobach zaniać Kijeŭ i Charkaŭ Rasija pakul sutykajecca z žorstkim supraciŭleńniem ukraincaŭ. Ale za pieršy tydzień vajny akupanty zdoleli zachapić niekalki rehijonaŭ na poŭdni krainy, u tym liku častki Zaparožskaj, Mikałajeŭskaj i Chiersonskaj abłaściej. Apošniaja zaraz całkam znachodzicca pad kantrolem Rasii.
Heta dazvoliła stvaryć suchaputny kalidor pamiž Rasijaj i Krymam, jaki Maskva anieksiravała jašče ŭ 2014 hodzie. Jość prykmiety, što Kreml źbirajecca doŭha imi kiravać.
Budučynia akupiravanych ziemlaŭ
Ministr zamiežnych spraŭ Ukrainy Dźmitryj Kuleba papiaredžvaŭ, što ŭ Chiersonskaja vobłaści akupanty rychtujuć refierendum ab adździaleńni jaje ad Ukrainy i abviaščeńni tak zvanaj «narodnaj respubliki». Anałahičnym čynam Rasija ŭ svoj čas adarvała ad Ukrainy Krym i častki Danieckaj i Łuhanskaj abłaściej.
U akupiravanym Mielitopali Rasija pryznačyła novaha mera — Halinu Danilčanka, byłuju deputatku Mielitopalskaj haradskoj rady. Były mer horada, Ivan Fiodaraŭ, byŭ vykradzieny.
U rehijonach, zaniatych ruskimi, prachodziać praŭkrainskija demanstracyi. Tydzień tamu tysiačy ludziej prajšli pa centru Chiersona, i razam ź imi byŭ vialiki ŭkrainski ściah. Vialiki mitynh prajšoŭ i ŭ Mielitopali na nastupny dzień paśla źniknieńnia mera. Bližej da kanca mitynhu da mielitopalskich demanstrantaŭ padjechała čornaja mašyna. Niechta kinuŭ dymavuju šašku, z mašyny vyskačyli ludzi ŭ čornym i prosta ź mitynhu skrali 54-hadovuju Volhu Hajsumavu, viadomuju haradskuju aktyvistku.
Na nastupny dzień prykładna tysiača mielitopalcaŭ sabrałasia pad ścienami štab-kvatery rasijskich vojskaŭ, kab spytać, dzie ich mer i dzie zaraz Hajsumava. Ruskija sałdaty adšturchnuli tych ź mielitopalcaŭ, chto sprabavaŭ padyści bližej da budynka. Jak śviedčyć Kuleba, u toj ža dzień akupanty skrali i mera horada Dnieprarudnaje kala Mielitopala.
Praŭkrainski mitynh u akupiravanym Chiersonie. Fota: pravda.com.ua.
Ukrainskija ŭłady kažuć, što ŭsie palityki i dziaržsłužboŭcy, jakija buduć supracoŭničać z akupantami, buduć abvinavačanyja ŭ zdradzie i žorstka pakaranyja. Ale ž dla Maskvy vielmi važna, kab ukrainskija słužboŭcy pierachodzili na jaje bok, bo tak akupacyjny režym atrymaje lehitymnaść.
Historyi z zachoplenaj Ukrainy
Demanstranty ź Mielitopala kažuć pra toje, što akupantaŭ ździŭlaje, nakolki miascovyja žychary im nie rady. 40-hadovaja Taćciana Kumok, dyzajnierka viasielnych sukienak, apisvaje heta tak: «Jany nie mohuć pavieryć, što ludzi vychodziać pratestavać nie za hrošy i što my nie majem adzinaha lidara».
Šmat chto z žycharoŭ akupiravanych rehijonaŭ vierać u chutkaje viartańnie ŭkrainskaj armii. Valancina Chodus ź Mirnaha raspaviadaje pra hutarki z rasijskimi sałdatami, jakija pytalisia ŭ viaskoŭcaŭ, ci ceniać jany toje, što ruskija pryjšli ich «vyzvalać». Žychary Mirnaha adkazvali akupantam, što im nie treba było «dapamahać».
Centr dla biežancaŭ u Zaparožžy. Fota: Wall Street Journal.
Inšy biežaniec, Alaksandr Sitnikaŭ, kala dvuch tydniaŭ chavaŭsia ŭ sklepie z try małymi dziećmi biez dostupu da vodazabieśpiačeńnia i elektryčnaści. Jon raskazvaje pra pavodziny akupantaŭ: «Kali ruskija zachodziać u vioski, jany maradziorstvujuć usimi mahčymymi sposabami, hrabiać i rasstrelvajuć ludziej. Tam vielmi ciažka».
Darja Prystupa, byłaja aficyjantka, była vymušanaja pierasiačy liniju frontu razam z dvuchhadovaj dačkoj Safijaj. Jana kaža, što ŭ jaje horadzie Małačansku, akupiravanym ruskimi, jość vialikija prablemy ź ježaj, tam niama ni soli, ni cukru, ni lekaŭ. Na rasijskim KPP, što na šlachu ŭ Zaparožža, sałdaty dajuć ukraincam prajechać tolki paśla taho, jak atrymajuć ad ich ježu ci cyharety. Admovicca nielha — ruskija nastaŭlajuć na ciabie zbroju.
Pryjechaŭ vajavać sa 100 dalarami ŭ kišeni, maryŭ pra kvateru na Dniapry. Historyja biełaruskaha dobraachvotnika, jaki zahinuŭ va Ukrainie
«Zaviali nas u duš i zalili hazam, bili». Jak adbyvali «sutki» zatrymanyja na antyvajennych akcyjach
