Čytajcie: Va Ukrainie paciarpieli dva biełaruskija dalnabojniki. Bambili z samalotaŭ, što prylacieli ź Biełarusi
Pra stan Ivana pakul mała što viadoma. Sa słovaŭ kiraŭnika Koraścienia Uładzimira Maskalenki, u vyniku vybuchu dva biełarusy atrymali mocnyja apioki. Samaloty, jakija bambili horad, prylacieli ź Biełarusi.
Jon nazvaŭ ich «niežyvymi», ale viadoma, što jany ŭsio ž žyvyja i znachodziacca ŭ špitali, a za ich žyćcio zmahajucca.
Jak Ivan akazaŭsia va Ukrainie?
Tam jon byŭ na svajoj mašynie — vioz hruz.
Zajmacca ŭłasnym biźniesam mužčyna pačaŭ zusim niadaŭna — pry kancy 2020-ha adkryŭ IP, pačaŭ vykonvać rejsy ŭ intaresach roznych kampanij. Heta tak i pracuje ŭ łahistycy, amal jak u taksi — pryvoziš hruz u adzin horad, a tam šukaješ, što i kudy vieźci ŭ zvarotnym kirunku.
Tak było i ŭ hety raz. Ivan pavioz hruz va Uźbiekistan, a tam znajšoŭ zamovu va Ukrainu — krainu, zusim blizkuju da jaho rodnaha Mazyra.
Vajna pačałasia, pakul jahony hruz byŭ na ŭkrainskaj mytni.
Kali stała jasna, što rasijskija rakiety laciać z terytoryi Biełarusi, staŭleńnie da biełarusaŭ pastrožyłsia.
«U Ivana zabrali dakumienty, klučy ad mašyny i mabilnik — usio dla pravierki, jak u biełarusa. Klučy chutka addali, a voś dakumienty i mabilnik — nie. Słužboviec, što zabiraŭ, niekudy źnik, voś jon čakaŭ, pakul jany skončać pravierku i ŭsio viernuć, kab sprabavać prajechać dalej», — voś jak znajomyja ź situacyjaj apisvajuć chadu padziej da padzieńnia rasijskaj bomby.
Ivan Rohaŭ žanaty, maje 13-hadovuju dačku. Svajaki spadziajucca, što tyja, kaho «pachavali» jašče pry žyćci, zmohuć vykaraskacca.
Nahadajem, trahiedyja adbyłasia na terytoryi byłoha małakazavoda. U dvanaccać hadzin nočy 9 sakavika pačaŭsia mocny abstreł.
Nastupstvy avijaŭdaru
Pa słovach kiraŭnika horada Uładzimira Maskalenki, horad bambili rasijskija samaloty, jakija vylecieli ź biełaruskich aeradromaŭ.
«Vyniki abstrełu z samalotaŭ vy možacie ŭbačyć: faktyčna razburanyja ŭsie pamiaškańni. Na žal, jość zahinuły, dva čałavieki akazalisia ŭ balnicy ź vielmi značnymi apiokami, jakija nie sumiaščalnyja z žyćciom, tamu faktyčna troje zahinułych ludziej. Dva ź ich — biełarusy, jakija mašynami stajali tut, paprasilisia na pieryjad, pakul buduć vyjazdžać. I jany nie viedali, što jakraz ź biełaruskich aeradromaŭ vylaciać rasijskija samaloty i buduć bambić horad Koraścień», — raskazaŭ Uładzimir Maskalenka.
«Adzin pamior, ale cieły tak abhareli, što nie jasna chto». Stała viadoma asoba druhoha biełaruskaha dalnabojščyka, jaki trapiŭ pad bomby
Kanfiskavana 130 fur, sotnia biełarusaŭ nie moža vybracca z-pad abstrełaŭ: biazradasny los dalnabojščykaŭ va Ukrainie
